日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係位於東北地區嘅青森縣。即刻去睇睇擁有著名賞櫻聖地嘅弘前公園、風光明媚嘅奧入瀨溪流、十和田湖等旅遊名勝、以及於夏天舉行睡魔祭嘅青森縣，有咩不為人知嘅一面啦！
「JOPPARI（固執人士）」係津輕方言！津輕、南部、下北3個地區嘅縣民特徵逐個捉
位於東北地區最北端嘅青森縣，大致分為青森市西部區域「津輕」、位於形狀猶如斧頭一樣嘅北半島東北部「下北」、奧入瀨溪流與十和田湖所在地嘅「南部」3個區域，方言和縣民性都各有不同。
以盛產蘋果而廣為人知、「日本三大櫻花名勝」之一嘅弘前公園所在地——弘前市亦係屬於西部地區。由於其知名度相當高，少不免會令人覺得「青森=津輕」，所以就算係提到全國「青森嘅縣民性」，皆會傾向以津輕地區人士嘅獨有特徵為主作解說，導致唔少下北和南部地區人士，聽完之後會有「唔係咁㗎，唔一樣呀！」等等嘅諗法。
例如，作為青森縣民特徵之一被經常使用嘅形容詞「JOPPARI精神」（JOPPARI意思為固執、倔强）。實際上，「JOPPARI」（じょっぱり）係津輕方言中有固執人士嘅意思，因此津輕人嘅特徵係「JOPPARI」，非「JOPPARI精神」。
另外，津輕人具有「喜愛華麗」、「鍾意照顧人」、「開朗」等特徵。從兼具絃樂器與打擊樂器特性嘅「津輕三味線」其極具魄力嘅音色，以及於各地所舉辦嘅祭典，所保持嘅高度熱情等方面，可以理解得到津輕人嘅個性！
相對之下，南部人比較安靜，比較怕生。但係一旦向某人敞開心扉，就會將對方視為重要夥伴。另外，津輕人嘅挑戰精神旺盛，工作與私人生活等，都會主動積極參與為居多。但係南部人唔會自己主動行動，多數係保持等待嘅姿態，亦有邊觀察四圍狀況與平衡點再作行動等傾向。而且南部人從以前開始就被認為好識得做生意。進軍東北地區各地嘅企業，例如喺東北6縣開設112間店鋪嘅「株式會社SUNDAY」（株式会社サンデー），同埋喺青森、岩手、秋田開設超級市場嘅「株式會社UNIVERSE」（株式会社ユニバース）等，總部都係設於八戶市。
另外，講起青森縣，或者會即時諗起津輕、南部等地，但亦唔好忘記「下北」呢個地方喔。下北人融合津輕人與接近南部人嘅兩者性格，夠晒開朗。除咗喺當地人之間嘅聚會中，會搞熱個氣氛之外，其實性格仲有少少怕醜，遇見熟人以外嘅陌生人會變得非常安靜。
青森縣社長當中女性居多？！其原因在於男性平均壽命比較短？
青森縣民嘅特徵之一就係「女性夠強勢」。實際上，青森從過去1990年至2010年為止，女性社長（即公司老闆）比率為全國第一。截止2021年4月為止，女性社長比率為10.9%，僅次於沖繩11.4%、德島11.3%，位居全國第三！與全國水平為8.1%相比，算係相當高嘅水平。（參考資料：帝國資料庫「2021年各都道府縣女性社長比例」）。
正因為青森縣公司社長為女性居多，經常會有「津輕女性講嘢唔會拐彎抹角，夠清清楚楚」、「南部女性經常工作」等，將青森女性形容為勤勞、擁有堅強表現等美譽。據聞女性社長嘅比例與男性平均壽命較短有關。
根據厚生勞動省每5年制定一次嘅都道府縣「平均壽命變化（男性）」生命圖表，從1965年到2015年，青森男性嘅平均壽命為全國最短。2015年嘅數據更顯示出男性、女性皆為最後一名，男性為78.67歲，女性為85.93歲，男性足足比女性短7.26年。因此，作為公司社長嘅父親、丈夫去世，由女兒、妻子繼承公司嘅比例亦非常高。實際上，根據帝國銀行所發表的「女性各就任原委（全體2021年）」，家族繼承比例當中，相對於全國50.8%嘅比率，青森縣則為62.4%，比全國高出10%以上。
成為世界第一豪雪地帶 ⁉ 青森市冬天不可缺少嘅冬天三種神器係？
於2021年12月曾觀測出青森市有111厘米嘅積雪，係時隔37年於12月份中高達1米以上嘅大雪紀錄。於2022年2月6日更錄得高達146厘米嘅積雪。根據美國嘅氣象情報媒體「AccuWeather」過去有關大雪地帶嘅調查資料顯示，於「10萬人口以上都市的年度降雪量」中青森市曾位居世界第一，係縣內數一數二嘅大雪地區。
短期旅行可能無咩大問題，但畢竟積雪超過1米，如果堆積到屋頂上，市內各地都有雪牆嘅話，對日常生活會造成極大影響。
因此，青森市民屋企備有「雪鏟『Snow Dump 』」、「雪刷」、「長靴」三種過冬神器。
青森縣民過冬嘅三種神器
①雪鏟「Snow Dump」
清理積雪時不可或缺嘅係，於東北地區為人熟知嘅鏟雪工具「Snow Dump」（スノーダンプ），別名為「Mamasan Dump」（ママさんダンプ）。
因為用普通嘅雪鏟去清理積雪實在太晒時間，所以使用「Snow Dump」插入積雪，邊用腳踩邊撈起積雪作清理。因為「Snow Dump」會使用到全身，所以可以清理到大量積雪。
②雪刷
屬於「汽車社會」嘅青森縣到處都係自駕人士，一到雪季車上必備物品之一就係用嚟刷走積雪嘅「雪刷」。
③雪地靴、長靴
冬季期間，青森縣內嘅道路經常積雪或結冰，所以穿著雪地靴、長靴等係日常生活中不可或缺嘅一環。
如果穿著無防水、撥水功能嘅運動鞋行走嘅話，鞋嘅內部會被雪水淹沒，亦會有喺結晒冰嘅路面上滑倒嘅風險，所以如果冬天去青森旅行嘅話，一定要帶上專用鞋。
就連赤飯、茶碗蒸都......青森甜品點止得蘋果批！
有值得慶祝嘅事情時，日本人會準備「招待料理」（おもてなし料理）去招呼客人。喺青森縣，呢種招待料理嘅調味大多數都以甜味料理為主。例如，會喺糯米中加入紅豆烹煮成紅色嘅「赤飯」（即係紅豆飯）。
點解各種料理嘅調味都要以甜味為主？當中理由眾說紛紜，但有一種講法係昔日砂糖屬於高價奢侈品，使用砂糖製作佳餚能表示對客人嘅款待之心。青森縣民嘅溫柔一面真係好甜喔。
除咗「赤飯」之外，腐皮壽司和茶碗蒸烹調成甜味料理亦為青森嘅特徵之一。腐皮壽司裡面混合著紅薑絲，粉紅色米飯相當吸睛，可謂與賞花時節最合襯嘅顏色。從視覺都能享受食物呢點或者亦係青森縣民性之一吧。
青森嘅茶碗蒸使用栗子甘露煮代替銀杏，加上甘露煮嘅糖漿係於烹煮時加入，所以食落有少少似甜品嘅味道。話雖如此，因為亦有加入雞肉、冬菇等一般食材，所以有唔少青森縣以外嘅人士係食唔慣呢款甜味茶碗蒸。
可能有人會唔係好鍾意呢種帶有甜味嘅招待料理用嚟招呼客人，但係在於青森縣民嘅角度反而係覺得唔甜嘅赤飯、茶碗蒸、壽司係「完全無味！」、「食完好似無食過一樣！」，硬係覺得爭梗啲嘢咁，未夠盡善盡美。
日本當中亦屬罕見、充滿青森縣民款待精神嘅鄉土料理，如果有機會去青森嘅話記得一定要試一試啦！
日本47都道府縣特輯其他文章：
- 【日本47都道府縣特輯：山梨篇】原來全日本最鍾意食壽司嘅係山梨縣民！？
- 【日本47都道府縣特輯：石川篇】石川縣皮膚好嘅女性人數係日本榜首？究竟「美肌第一縣」嘅秘密係…？
- 【日本47都道府縣特輯：神奈川篇】逃離東京、移居神奈川嘅日本人正激增中！？
- 【日本47都道府縣特輯 Vol.1】 北海道不存在「小強」！？盤點日本全國城市傳聞 ～北海道篇～
- 【日本47都道府縣特輯 Vol.2】 沖繩人遲到係家常便飯！？盤點日本全國城市傳聞 ～沖繩篇～
- 【日本47都道府縣特輯 Vol.3】 千祈唔好輕易相信京都人嘅稱讚說話！？盤點日本全國城市傳聞 ～京都篇～
- 【日本47都道府縣特輯 Vol.3】 大阪每個家庭都有一部章魚燒機是常識吧！盤點日本全國城市傳聞 ～大阪篇～
- 【日本47都道府縣特輯 Vol.5】 邊個話奈良只得鹿！盤點日本全國城市傳聞 ～奈良篇～
- 【日本47都道府縣特輯 Vol.6】福岡縣點解特別多靚仔靚女！？盤點日本全國城市傳聞 ～福岡篇～
- 【日本47都道府縣特輯 Vol.7】買地就送森林 ！？盤點日本全國城市傳聞 ～佐賀篇～
- 日本47都道府縣特輯 Vol.8 鹿兒島篇「鹿兒島縣的〇〇好厲害！」
- 日本47都道府縣特輯VOL.9 「千葉縣民以縣嘅〇〇為榮，無得輸！」
- 日本47都道府縣特輯Vol.10 「愛知嘅○○好厲害！」
- 日本47都道府縣特輯VOL.11 栃木篇「栃木縣嘅○○好厲害！」
- 日本47都道府縣特輯VOL.12 兵庫篇「與其話係縣民特質、倒不如話係為市民特質？兵庫縣縣民人人都憧憬神戶市？」
- 日本47都道府縣特輯Vol.13 熊本篇「熊本縣的○○很厲害！」
- 日本47都道府縣特輯Vol.14 長崎篇「長崎的○○很厲害！」
- 日本47都道府縣特輯Vol.15 群馬篇「群馬嘅〇〇好厲害！」
- 日本47都道府縣特輯Vol.16 埼玉唔老土嘅「埼玉都(?)民」傲氣
Comments