日本國土北至北海道、南至沖繩，但其實東邊至西邊就距離卻唔算太遠。因應每個地方嘅氣候同地勢不一，價值觀同氣質都會跟住唔同。有啲當地嘅風俗文化、美食等係代代相傳，其他地方無嘅，所以我哋就可以喺呢啲差異上對方出身係嚟自邊個縣。而如果熟知當地人嘅習性，旅行時就可以更輕鬆咁暢遊日本各地啦！
「日本47都道府縣特輯」系列將要介紹有別於一般旅遊書嘅內容，讓您更了解當地人嘅真實生活常識。今次要介紹嘅喺，就有以1200年歷史引以為豪嘅京都府！
唔好隨便相信京都人嘅稱讚說話！？
有留意開日本電視節目嘅讀者，或者都會曾經聽聞過就連日本人都好難搞清楚京都人內心，因為佢哋會為咗唔好hurt到人而講嘢極度婉轉，好多時都要估佢咁講嘅真正意思究竟係咩。好聽就係婉轉有禮貌；唔好聽嘅話，京都人就係講野轉彎抹角，唔會直接入直題，令人搞唔清佢想講咩！
舉個例子，如果去餐廳食飯時被店員話：「您身上嘅氣味好香啊！請問你係用邊款牌子嘅香水呢？」。呢個時候，千祈咪以為佢讚梗你，真係想問你喺邊到買香水？其實佢真正嘅意思可能係「嚟餐廳食飯就唔好噴咁濃嘅香水啦！」
再舉一個例子，通常見到帶住嘈喧巴閉嘅小朋友，就會有人同佢家長話：「你嘅小朋友真係好活潑可愛呢～」。當然，真正意思並唔係真心讚小朋友，而係「你可唔可以管好你個細路？」京都人嘅心，係咪仲難過海底針呢？
唔可以用家常小菜招呼客人
喺京都，如果有客人要嚟屋企作客，用一般家常便飯招待客人係件好失禮嘅事！京都人通常都會叫京都傳統料理到會嚟招待客人，皆因傳統京都料理夠晒精緻細膩，相信可以會為客人帶嚟驚喜！仲有啲舖頭並唔只係外賣到會咁簡單，而係直接去你屋企即席煮出嚟招待客人呢。
「要唔要沖碗茶泡飯畀你？」其實係「你係時候返歸喇」嘅意思
日本人普遍都聽過有關京都人嘅「茶泡飯傳說」—到京都人屋企玩，如果對方問來你「要不要食碗茶泡飯（お茶漬け）啊」，其實就係「你係時候要走人喇！」嘅意思，如果「真心」留低嘅話，京都人就會話「乜你仲真係諗住留低食茶泡飯啊？」，意思係你好厚臉皮。雖然聽起嚟京都人好難相處，但調轉諗可能係京都人特別嘅「體貼」方法，唔想直接講出嚟令人難堪吧。
不可思議嘅地址表示方法
京都市有一套非常特別嘅地址表示方式，難免會叫第一次去京都嘅人感到相當錯愕！京都地址常見其他縣內無嘅「往上、往下、往東、往西」4個字眼，例如「往上」就即係向北面。 由於京都街道向東南西北四個方向延伸，因此呢到嘅「上下」、「東西」其實係用作街口，交叉口。京都地址會窯清楚到底係邊條街嘅方向入口，然後先寫建築物名。對於唔熟路嘅人，其實都會好容易記！
冬天凍過加拿大，夏天熱過香港！？
京都地形係一個四周環山嘅典型盆地，每年一到夏天就會密封悶熱唔通風，氣溫非常高，濕熱天氣令人無法呼吸，感到窒息咁！而到咗冬天，就會有冷空氣包住成個盆地，又乾又凍令人好難受。不過亦因為呢種氣候，京都先會咁四季分明，櫻花亦都開得特別靚。
喺日本全國仲有好多令外地人唔敢相信嘅城市傳聞，同埋一啲喺其他人眼中顯得非常奇怪、超乎想像嘅地方。各位讀者又有無親身經歷過以上嘅京都「地道體驗」呢？
Comments