講到日本嘅兩大城市，讀者們腦海中第一時間會浮現出邊個都道府縣？可能好多人都會諗起東京同大阪吧！但如果從人口數目去睇嘅話，東京係第一位，大阪則係第三位。咁第二位係邊度…？
答案係神奈川。橫濱、鎌倉、箱根…雖然擁有多個著名旅遊景點，但係對比東京、大阪、甚至北海道或福岡，神奈川縣知名度確實比較低。有見及此，今次我哋將會為大家探討神奈川縣不為人知嘅一面！
各種食物嘅「發源地」
日本嘅雪糕與啤酒發源地，原來正正就係神奈川橫濱。
日本從江戶時代1639年開始，實施長達200多年嘅鎖國政策，除咗荷蘭等部分國家，期間並無與外國進行任何交流。直至1853年受到美國開國要求，日本終於决心開國，1859年於橫濱、長崎、函館（北海道）開設港口，重新開始與外國進行貿易，自此橫濱就成為與海外貿易嘅重要據點，從外國入口嘅產品與食品聚集於橫濱。橫濱人參考從海外入口嘅雪糕與啤酒嘅味道及製作方法後，從而改良成符合日本人喜好嘅味道。
1869年於橫濱開設嘅「JAPAN・YOKOHAMA・BREWERY（ジャパン・ヨコハマ・ブルワリー）」（現已關閉），就作為日本第一間啤酒釀造廠而廣為人知。
據稱日本獨有嘅意大利粉「日式拿玻里意粉（ナポリタン）」亦係於橫濱誕生。
「日式拿玻里意粉（ナポリタン）」係一款淋上番茄醬味醬汁所製作而成嘅意大利粉。配料一般有炒好嘅火腿、青椒及洋葱。雖然菜式名叫做「拿玻里」，但發源地並非意大利拿玻里，而係橫濱。
現成為日本經典平民美食之一嘅「日式拿玻里意粉（ナポリタン）」，相傳係橫濱一間酒店「HOTEL NEWGRAND」於第二次世界大戰後所設計嘅菜式。「HOTEL NEWGRAND」從1945年到1952年作為GHQ（*1）軍官宿舍，當時嘅酒店廚師被軍官們於意大利麵上淋上番茄醬食用呢個舉動所啟發，從而誕生出「日式拿玻里意粉（ナポリタン）」。
*1: 聯合國最高司令官總司令部。1945年作為太平洋戰爭後佔領與管理日本嘅最高司令部設置於東京。
「橫濱人（ハマっ子）」最鍾意新事物
喺東京出生長大嘅人被稱為「江戶人（えどっこ）」，而喺橫濱出生長大嘅人被稱為「橫濱人（ハマっ子）」。
一般而言，「橫濱人（ハマっ子）」普遍都鍾意新事物。如上文所述，橫濱從江戶時代就開始作為與海外貿易嘅據點而繁榮，所以比起日本其他地區，更早開始接觸到西方文明。因此從以前開始，「橫濱人（ハマっ子）」接觸海外珍貴食物與商品嘅機會就非常多，或者「橫濱人（ハマっ子）」喜愛新事物嘅氣質係由此起喔。
日本人被問到出生地嘅時候，一般會用都道府縣名去回答，但係「橫濱人（ハマっ子）」被問到出生地嘅時候，係唔會答「神奈川縣」，而係答「橫濱」，亦係對橫濱呢個地方感到自豪嘅表現。
３分之１嘅縣民將東京視為競爭對手
根據某項調查（*2）結果顯示，有36%嘅神奈川縣民回答「將東京都視為競爭對手」。
神奈川縣人口約922萬人（截止2022年4月1日），僅次於東京都（約1,399萬人），人口數目為日本全國第二多。 （第3係大阪府約877萬人）
神奈川有可以與東京新宿及澀谷匹敵嘅大城市橫濱，亦有唔少大企業喺神奈川縣設置總公司，例如日產汽車。以上因素或者就係將鄰近首都・東京視為競爭對手嘅理由喔。
*2 日本索尼生命保險公司（2021年）
比起東京，想住喺神奈川嘅日本人反而日漸增加！？
唔少神奈川縣民表示將東京視為競爭對手，但係最近反而出現東京都民將神奈川縣視為競爭對手嘅情況！事關近年來，從東京搬到神奈川縣嘅人數日漸增加，比起東京，神奈川可以話係更受歡迎呢。
根據2021年從東京23區搬遷出去（※從東京23區搬遷至其他地區）嘅人選擇邊個地區自治體落腳嘅調查結果顯示，排名第一為神奈川縣橫濱市，其次為神奈川縣川崎市，埼玉縣埼玉市僅接其後。原來東京都民選擇嘅搬遷地區，第一名與第二名都係位於神奈川縣嘅城市！
受到新型冠狀病毒影響下，在家工作嘅人變多，亦係東京都民選擇搬去神奈川嘅理由之一。具體說明如下…
- 神奈川與東京相鄰，即使喺東京公司返工都相當方便。
- 在家工作逐漸普及，於自己屋企建立工作空間嘅人隨之增加，所以選擇搬去比東京房租更平，空間更寬敞嘅神奈川。
神奈川仲有一個作為人氣移居地嘅理由，就係可以生活喺鎌倉、江之島、葉山等近海地區。工作前去衝浪或沙灘漫步…憧憬著以上生活方式而選擇移居至神奈川嘅人亦日漸增長。
句尾會加上「JAN（じゃん）」或「DABE（だべ）」
神奈川縣與東京相鄰，神奈川縣民講嘅日文，雖然基本上同東京人無咩分別，不過亦存在著當地嘅方言用語，就係「JAN（じゃん）」以及「DABE（だべ）」。
「JAN（じゃん）」一般跟喺形容詞後面，例如，「你件衫好可愛JAN。」。由於「JAN（じゃん）」一詞本身並無任何特別意思，所以同就咁講「你件衫好可愛。」 係一樣意思。
「DABE（だべ）」則一般用喺疑問形句當中嘅句尾，於對話中徵求對方同意時所使用嘅方言。例如「講到神奈川嘅人氣景點，應該係橫濱DABE？」，用以確認對方亦持有同樣意見。（類似英文～isn’t it？嘅感覺）
據聞橫濱人係會使用以上所提到嘅方言，如果有機會同橫濱人接觸嘅話，到時不妨試吓講兩句方言，入鄉隨俗一下喔。
相關文章：
- 【日本47都道府縣特輯：京都篇】 千祈唔好輕易相信京都人嘅稱讚說話！？
- 【日本47都道府縣特輯：大阪篇】大阪每個家庭都有一部章魚燒機是常識吧！
- 【日本47都道府縣特輯：奈良篇】邊個話奈良只得鹿！
- 【日本47都道府縣特輯：福岡篇】福岡縣點解特別多靚仔靚女！？
- 【日本47都道府縣特輯：佐賀篇】買地就送森林 ！？
- 【日本47都道府縣特輯：鹿兒島篇】每日都要對抗火山爆發！？
- 【日本47都道府縣特輯：千葉篇】送俾重要嘅人嘅紀念品係「花生」
- 【日本47都道府縣特輯：愛知篇】咖啡店提供豪華級早餐！
- 【日本47都道府縣特輯：栃木篇】喺元旦新年食鯊魚係視為理所當然嘅事
- 【日本47都道府縣特輯：兵庫篇】兵庫縣縣民人人都憧憬神戶市
- 【日本47都道府縣特輯：熊本篇】「熊本熊」一年賺好多錢？
- 【日本47都道府縣特輯：長崎篇】當地美食係「土耳其飯」？
- 【日本47都道府縣特輯：群馬篇】全日本魅力度排行榜 經常爭包尾
- 【日本47都道府縣特輯：埼玉篇】眾多動漫作品嘅舞台所在
- 【日本47都道府縣特輯：山梨篇】原來全日本最鍾意食壽司嘅係山梨縣民！？
- 【日本47都道府縣特輯：石川篇】石川縣皮膚好嘅女性人數係日本榜首？究竟「美肌第一縣」嘅秘密係…？
Comments