香甜蘋果、白雪、櫻花美景，相信以上種種都係提到青森縣時您會諗起嘅幾個特色！座落於日本北部、北海道下方嘅青森（Aomori）係日本嘅夢幻雪世界之一，亦係可以欣賞到秋天紅葉與春日櫻花盛開嘅最佳地點。
青森必去景點
青森有著名嘅歷史文化同自然景點，每個景點都具有獨特吸引力。以下為大家簡單介紹去青森縣旅行就唔可以錯過嘅景點。
弘前城
弘前城建於1611年，隸屬於津輕氏一族。其周圍成千上百株櫻花樹盛開嘅優美景象總係令人嘆為觀止，作為青森最佳賞櫻勝地實在當之無愧。除咗美不勝收嘅櫻花景色，遊客到此仲可以一覽青森市景色，又或同時參觀極具歷史價值嘅史料館。
另外，冬季雪景都好有魅力。弘前城雪燈籠祭會喺2月份舉行5日，夜間夢幻燈飾都唔好錯過呀！
景點資訊
- 名稱：弘前城
- 地址：青森縣弘前市下白銀町1
- 交通方式：JR弘前站 → [土手町循環巴士] 15分鐘 → 市役所前巴士站
- 開放時間：9:00 - 17:00（弘前櫻花季期間會延長開放時間）
津輕藩睡魔村
津輕藩睡魔村內有展示巨大嘅睡魔花車、經典花車同津輕風箏，仲有津輕三味線嘅現場表演，等參觀者可以更了解喺青森好受歡迎嘅睡魔祭。另外仲有工作坊同紀念品店，可以體驗製作當地手工藝品，或者買紀念品返香港又得。
景點資訊
- 名稱：津輕藩睡魔村
- 地址：青森縣弘前市龜甲町61
- 交通方式：JR弘前站→ [土手町循環巴士] 15分鐘 → 津輕藩睡魔村站
奧入瀨溪流及十和田湖
奧入瀨溪流喺四季都有唔同變化嘅景觀。最推薦喺秋天去遊，落葉鋪地，形成一片美麗紅毯。遊完奧入瀨溪流之後，可以去附近嘅十和田湖，一邊眺望美麗湖景，一邊享受溫泉，係玩完一整日最正嘅放鬆方式！
景點資訊
- 名稱：奧入瀨溪流
- 地址：青森縣十和田市奧瀨字櫪久保183
- 交通方式：R青森站/JR新青森站→ [JR巴士MIZUUMI號] 120分鐘→燒山站
- 名稱：十和田湖
- 地址：青森縣十和田市大字奥瀨字十和田湖畔休屋486番地
- 交通方式：JR青森站→ [JR巴士MIZUUMI號] 180分鐘→ [十和田湖巴士站（冬季期間巴士暫停服務）
八甲田連峰
八甲田連峰實為八座睡火山群嘅山脈總稱，其宏偉連峰可謂青森瑰寶。此地區非常適合冬天滑雪，而其餘時節則較適合行山。因為被雪覆蓋嘅樹林景色形狀酷似「雪怪」，八甲田地區亦因而聞名。你可以在此享受一天滑雪或行山之旅後，再到火山地區周邊溫泉好好放鬆一下。
景點資訊
- 名稱：八甲田連峰 (八甲田纜車)
- 地址：青森縣青森市大字荒川寒水澤1-12
- 交通方式：青森站→ [JR巴士] 60分鐘→ 八甲田纜車站前
- 票價：成人纜車單程票1,250日圓、來回票2,000日圓。孩童纜車單程票450日圓、來回票700日圓。
青森購物景點
JR青森站同JR新青森站等主要車站周邊都有好多商店同餐廳。JR青森車站有一個叫做「LOVINA」嘅購物中心，站附近仲有一條大街，兩旁有小商店可以行。另一個購物中心位於JR新青森站，名為「青森旬味館」，遊客可以喺度買青森當地美食同特色手信。
最佳到訪時節
青森縣春夏秋冬都各自有魅力，一年四季無論邊一個時節都係最佳造訪時節。而邊一個季節好玩，則要按個人喜好。如果你想賞櫻，可以於3月或4月到訪；如果想滑雪或玩滑雪板等冬季活動，有大降雪量嘅12月至2月期間就會最適合你喇！
去青森的交通方式
你可以從日本境內搭飛機至青森機場。如果從東京羽田機場出發的話，單程飛行時間大約為80分鐘左右。如果你鍾情搭電車的話，亦可以乘坐新幹線，迅速穿越多個縣嚟到青森。從東京乘搭新幹線車程大約為4個鐘。建議買JR東日本鐵路周遊券（東北地區），從東京出發去青森更抵！
Comments