日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特當地人民性格， 日文稱之為「縣民性」。
正所謂「知己知彼，百戰百勝」，如果可以事先瞭解日本各個都道府縣嘅不同特色，絕對可以令您嘅旅程更順利，更準確地揀選出下一個日本之旅嘅心水目的地。 有見及此，FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係「石川縣」！
雨遮係必需品
有計劃去石川縣旅行嘅話，記得到時候要隨身攜帶雨遮，因為石川縣經常都會落雨喔。
根據日本總務省（截至2020年）嘅統計顯示，日本47個都道府縣當中，全年落雨天日數最多嘅就係石川縣，竟然365日當中有成194日都係落雨天，係全國之冠。（順便講埋日本對「雨天」嘅定義吧！喺日本，只要當日測得降雨量達10mm以上時，就會被定義為「雨天」）
石川縣全年有一半以上嘅時間都係落緊雨，甚至有「寧可唔記得帶便當，都唔可以唔記得帶雨遮」嘅講法。 換言之，唔記得帶雨遮，比起唔記得帶午餐便當去返工或返學，更加頭痕！以上講法聽落可能有啲誇張，但係處身於任何時候都有可能落雨嘅石川縣，雨遮真係非常重要喔。
另外，根據金澤地方氣象台（Kanazawa Local Metelological Office）顯示，日本47個都道府縣當中，全年間所測到嘅行雷次數最多嘅亦係石川縣。下次去石川旅行時，記得要不時留意住當地天氣嘅狀況喇。
石川縣女性普遍皮膚都會比較好！？
其實成日落雨都未必一定係壞事。 因為雨水所形成嘅高濕氣，可能會為皮膚帶嚟良好嘅影響，間接成為獨特嘅美肌模式。
日本化妝品製造商POLA化妝品每年都會針對日本全國47個都道府縣嘅女性皮膚狀況進行調查，而喺最新（2021年）嘅「日本美肌縣大獎」排行榜當中，石川縣就榮獲第一名！
據聞石川縣民嘅皮膚所含水分量係全國之冠，眾所皆知「美肌」當中最重要嘅要素之一就係「皮膚所含水分量」，話唔定因為「落雨天多=濕氣多」嘅關係，而造就「石川美肌縣」嘅誕生呢。（小編按：香港都濕度高吖！但空氣就…）
對咖喱嘅愛係日本第一！？
石川縣位於日本海沿岸，並以螃蟹、壽司等海鮮美食聞名。但講到石川縣民喜愛嘅美食嘅話，咖喱可能更甚於海鮮喔。
根據某項調查（※）顯示，若果以人口比例計算，石川縣平均每10萬人口就有6.28間咖喱店，屬全國數量第一。與第2位北海道（每10萬人口就有4.96間咖喱店）、第3位東京（3.77間）相比，更可以睇得出係店舖數量壓倒性地多。
※來自Town page database（NTT東日本・NTT西日本）調查數據
金澤及其周邊地區所提供嘅咖喱被稱為「金澤咖喱」。 金澤咖喱雖然無任何嚴格上嘅定義，但一般嚟講「咖喱既濃厚又粘稠」、「咖喱上面放著沾上醬汁嘅炸猪扒」等等都係金澤咖喱嘅特徵。
要講到金澤嘅咖喱店當中嘅表表者，絕非創業60年以上嘅「咖喱的冠軍」（カレーのチャンピオン）莫屬。作為金澤咖喱元祖店，「咖喱的冠軍」人氣菜式係咖喱上面放上厚炸豬扒與椰菜絲嘅「L炸豬扒咖喱」（Lカツカレー）。
除咗石川縣，「咖喱的冠軍」喺東京同京都都有分店。如果您無打算去石川縣，但係會去東京或京都旅行嘅話，可以順便去食返餐「咖喱的冠軍」，感受金澤咖喱元祖店嘅好味道喔。
小朋友學力屬全國榜首
日本文部科學省每年都會以小學6年級與中學3年級嘅學生為對象，進行學力測試（國語、數學）。根據2021年學力測試當中各個都道府縣嘅平均分數顯示，石川縣小學6年級、中學3年級均為全國第一名。
喺石川縣，教師會同金澤大學研究人員合作，對小朋友嘅學習能力進行分析等措施，可能就係令到當地小朋友擁有高學力嘅原因之一。
石川縣民竟然會食「苔蘚」（コケ）！？
日語中「コケ」一般係指喺石頭上生長嘅綠色植物，即「苔蘚」。但係喺石川嘅方言裡面，「コケ」係「菇類」嘅意思（順帶一提，「菇類」嘅日文係「キノコ」）
換言之，石川縣民話想食「コケ」嘅時候，係想食「菇類」（キノコ）嘅意思。對於聽唔明石川方言嘅人，聽到「食コケ」嘅時候，好自然會非常驚訝表示：「吓！？乜苔蘚都食得嘅咩」。
以當地美食最為自豪
根據日本索尼生命保險公司於2021年實施嘅47個都道府縣縣民性調查結果顯示，石川縣民對於石川當地嘅美食感到相當自豪。根據調查報告，日本索尼生命保險公司向各個都道府縣嘅縣民詢問「對於自己縣嘅食物，會否感到自豪？」時，64%嘅石川縣民回答「會」，仲高過「美食之都」見稱嘅北海道嘅63%，係47個都道府縣中百分比最高。
海鮮、金澤咖喱…石川縣可以話係美食遍全縣。石川縣民對於當地美食感到自豪可以話係理所當然吧！
- 【日本47都道府縣特輯：京都篇】 千祈唔好輕易相信京都人嘅稱讚說話！？
- 【日本47都道府縣特輯：大阪篇】大阪每個家庭都有一部章魚燒機是常識吧！
- 【日本47都道府縣特輯：奈良篇】邊個話奈良只得鹿！
- 【日本47都道府縣特輯：福岡篇】福岡縣點解特別多靚仔靚女！？
- 【日本47都道府縣特輯：佐賀篇】買地就送森林 ！？
- 【日本47都道府縣特輯：鹿兒島篇】每日都要對抗火山爆發！？
- 【日本47都道府縣特輯：千葉篇】送俾重要嘅人嘅紀念品係「花生」
- 【日本47都道府縣特輯：愛知篇】咖啡店提供豪華級早餐！
- 【日本47都道府縣特輯：栃木篇】喺元旦新年食鯊魚係視為理所當然嘅事
- 【日本47都道府縣特輯：兵庫篇】兵庫縣縣民人人都憧憬神戶市
- 【日本47都道府縣特輯：熊本篇】「熊本熊」一年賺好多錢？
- 【日本47都道府縣特輯：長崎篇】當地美食係「土耳其飯」？
- 【日本47都道府縣特輯：群馬篇】全日本魅力度排行榜 經常爭包尾
- 【日本47都道府縣特輯：埼玉篇】眾多動漫作品嘅舞台所在
- 【日本47都道府縣特輯：山梨篇】原來全日本最鍾意食壽司嘅係山梨縣民！？
- 【日本47都道府縣特輯：神奈川篇】逃離東京、移居神奈川嘅日本人正激增中！？
Comments