日本北至北海道，南至沖繩，整體跨過南北唔同氣候地理，所以隨住每個地方嘅氣候唔同，亦會影響價值觀同性格習慣等有所差異。由習俗文化，到當地美食，因為居住環境地方唔同，而形成唔同嘅文化，就可以睇得出係邊到人。如果我哋熟知當地人嘅習慣嘅話，遊日本各地時相信可以更有趣更順利。咁次呢個系列文章將會為大家介紹熊本縣。
個性固執？
一句說話嚟來形容熊本縣縣民特質就係「肥後もっこす」，意思係頑固、固執、直腸直肚嘅硬漢。男性通常喺情感上都好講義氣。女性亦好堅強，堅忍嘅程度喺日本內可算數一數二。
熱愛自己家鄉土地
熊本人會鍾意聽到其他地方嘅人誇獎熊本，如果邊個夠膽貶熊本嘅話，就會怒髮衝冠。熊本人都相信熊本係日本最適合居住嘅地方。不過，去咗東京嘅熊本人，就好少會返故鄉.....
比起礦泉水，更多飲水喉水？
熊本市水龍頭所流出來嘅水，百分百嚟自地下水，含豐富礦物質，據說比起市面上售賣嘅礦泉水仲要好飲。
好多都打扮得時尚 對潮流敏感
熊本市經常係時裝相關企業研究調查嘅範圍，比起其他城市嚟講，似乎更加跟得貼潮流，相當趕流行。甚至有一啲商品未喺東京發售，就已經偷偷地喺熊本搶先開售。
「熊本熊」一年賺好多錢？
相信大家都認識「熊本熊」(KUMAMON)。佢嘅相關周邊商品銷售達差唔多1280億日圓，收入同大企業睇齊咁滯。以前美國報紙華爾街日報仲曾經全版報導熊本熊，亦有中國國營嘅電視節目入面介紹過。其實熊本熊嘅職業係公務員，職位係「熊本縣營業部部長兼熊本縣幸福部長」。佢嘅工作地點位於熊本市中央區鶴屋百貨公司本店東館1樓嘅「熊本熊廣場」（即係著名嘅「營業部長辦公室」），每星期二同四係定休。
用熊本腔對話，其他縣縣民會誤以為嗌交
熊本腔擁有好多獨特詞語，語尾發音亦較為強烈，所以其他縣縣民聽到熊本腔時，會覺得係嗌交。而熊本腔中發音急促嘅詞語亦比較多，所以好似缺少咗柔和同細緻感，畀人覺得起哂角，好似好粗魯、無禮貌。喺其他縣嘅舖頭入面，如果用熊本腔對話，據說有機會被店員勸阻「要嗌交請先出去」。
就連方向都要加尊稱
熊本人喺指示方向時，會講「左先生（左さん）」、「右先生（右さん）」，東南西北方向時亦會講「北先生（北さん）」等等。亦會喺物品後面都加「さん」。雖然啱啱先話熊本腔好似語氣粗魯咁，但實際上其實係好溫柔嘅方言呢。
喺日本全國有好多令人難以置信嘅各地縣民特性，喺其他縣民眼中係非常有趣嘅事。本系列文章將會陸續刊登，敬請期待！歡迎有任何意見或感想，都可以喺右邊嘅留言欄話我地聽！仲想知道邊啲縣嘅獨特縣民個性，都歡迎留言唷！
系列文章
- 日本47都道府縣特輯 Vol.1 北海道篇 真係冰天雪地著短裙？
- 日本47都道府縣特輯 Vol.2 沖繩篇 時間過得特別慢？
- 日本47都道府縣特輯 Vol.3 京都篇 講嘢有幾轉彎？
- 日本47都道府縣特輯 Vol.4 大阪篇 係咪所有人都搞笑？
- 日本47都道府縣特輯 Vol.5 奈良篇 除咗鹿仲有咩？
- 日本47都道府縣特輯 Vol.6 福岡篇 俊男美女特別多？
- 日本47都道府縣特輯 Vol.7 佐賀篇 喺縣內買地仲會附送森林！？
- 日本47都道府縣特輯 Vol.8 鹿兒島篇 唔怕火山灰？
- 日本47都道府縣特輯 Vol.9 千葉篇 迪士尼愛特別強？
- 日本47都道府縣特輯 Vol.10 愛知篇 咖啡店提供豪華級早餐！
- 日本47都道府縣特輯 Vol.11 栃木篇 喺元旦新年食鯊魚係視為理所當然嘅事
- 日本47都道府縣特輯 Vol.12 兵庫篇 全城愛神戶？
Comments