【日本47都道府縣特輯：滋賀篇】琵琶湖和CLUB HARIE係滋賀縣民嘅驕傲！

日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格，日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係位於關西地區嘅滋賀縣。即刻去睇睇擁有日本最大嘅淡水湖琵琶湖、彥根城、天台宗總本山嘅比叡山延曆寺等名勝嘅滋賀縣，有咩不為人知嘅一面啦！

經典遊車河路線和即興台詞！琵琶湖係滋賀縣民嘅心靈故鄉

滋賀縣擁有日本最大嘅湖泊——琵琶湖。琵琶湖嘅面積約670平方公里，湖岸長約235公里，其大小竟然相當於滋賀縣六分之一嘅面積！實際上，琵琶湖嘅湖水以滋賀縣為首，通過瀨田川嘅淀川，流至京都府、大阪府、兵庫縣等地，係被使用於近畿地區嘅自來水、工業用水、農業用水嘅珍貴水資源。

琵琶湖唔單止係一個代表滋賀嘅名勝，更加係與縣民嘅生活息息相關。以下落嚟，會為大家介紹一下琵琶湖嘅相關資訊！

1. 滋賀縣民稱琵琶湖為「海」！包含近江牛嘅琵琶湖體驗項目係基礎教育嘅其中一環！

實際上，有唔少滋賀縣民會將琵琶湖稱為「海」（うみ/Umi）。一去到夏天，就會聽到「要唔要去海（琵琶湖）啊？」「好啊！」等，被普遍使用於一般對話中。至於有關其「海」之一說嘅由來可謂眾說紛紜。當中，最具說服力嘅其中一種講法係，琵琶湖曾經被稱為「おうみ/Oumi」，亦即係海。原本，琵琶湖喺日本古書中被標記為「淡海乃海」（あふみのうみ/Afumi no umi）、「淡海」（あはうみ/Ahaumi）、「近淡海」（ちかあはうみ/Chikaahaumi）等，後來，其讀法「あはうみ/ahaumi」演變成「あふみ/Afumi」，不久後更被讀成「おうみ/ Oumi」。另外，淡海係湖泊嘅意思。

另外一個講法係因為滋賀縣民全員，去到小學5年級就會體驗名為「海之子」嘅湖上住宿體驗項目。「海之子」其實係一艘學習船嘅名稱，小學生們會喺艘學習船上，進行一個兩日一夜嘅住宿體驗。

到時會有2間以上嘅學校作聯校參加。將唔同學校嘅小朋友，混埋一齊學習和接受訓練，齊齊嘆近江牛嘅牛扒，令大家自然而然地打好關係，聽聞亦有唔同學校嘅小朋友透過「海之子」認識彼此，及後喺中學和高中嘅學校重遇。順帶一提，餐單中更會出現使用近江牛烹煮嘅牛扒喔！因為全縣民都非常熟悉「海之子」，所以好自然地將琵琶湖稱之為「海」。唔知邊個講法先至係真嘅呢？

2. 原來喺滋賀，要環繞琵琶湖一周先至算得上能夠獨當一面！？

喺滋賀，會將環繞「琵琶湖一周」呢件事，稱為「ビワイチ/ Biwaichi」，即「琵琶一周」。以前，Biwaichi（琵琶湖一周）係指「啱啱拎完車牌嘅新手駕駛者，喺琵琶湖揸車遊車河」，但係去到近期，踩公路單車繞琵琶湖一周嘅遊客遞增，「Biwaichi＝單車環遊」便成為而家嘅流行趨勢！去到假日和遊玩旺季，會出現好幾百位單車愛好者，喺湖邊踩單車環遊琵琶湖嘅情景，因此各處嘅單車站亦不斷增加。

另外， 11月3日更制定為「Biwaichi之日」，係為咗令大家更親近踩單車環遊琵琶湖一周呢個活動，係由與「單車之旅」甚有淵源嘅滋賀縣所制定嘅日子。據聞喺11月3日至11月9日呢一個星期仲會舉辦紀念印章收集賽和各種活動。確實，琵琶湖對於滋賀縣民嚟講，係「一生至少會環繞一周嘅地方」。

3. 滋賀縣民嘅經典台詞「我哋停供琵琶湖嘅水吖嗱！！」但實際上係無可能做得到！？

如前所述，琵琶湖嘅水除咗滋賀之外，仲會用作京都、大阪、兵庫等地嘅日常生活用水。因此，當與位於琵琶湖下游嘅京都府民發生爭執時，滋賀縣民用作反擊嘅經典台詞係「我哋停供琵琶湖嘅水吖嗱！！」。

但其實，管理琵琶湖水道嘅竟然係京都市上下水道局。而且，喺120年前，京都市仲曾經停過琵琶湖嘅水源。照咁睇，滋賀縣民有啲失勢...... 試想像如果滋賀縣民講完「我哋停供琵琶湖嘅水吖嗱！」，京都府民回應話「停水嘅權利喺我哋度囉！」，呢個咁激烈嘅場面，滋賀縣民究竟會如何對抗？到時真係好想拎定包花生，坐低慢慢睇呀。

滋賀縣民嘅經典手信係「CLUB HARIE年輪蛋糕」

人氣嘅「CLUB HARIE年輪蛋糕」，其鬆軟嘅蛋糕口感兼入口唔會乾噌噌，擁有令人食完想再食嘅好滋味。雖然，現時作為「年輪蛋糕排隊名店」於日本機場和百貨公司嘅食品賣場等亦設有分店，但其實，呢款名物係發源於滋賀縣嘅老字號西式點心店。

明治創業嘅老字號和式點心店「Taneya」（たねや）從1951年開始製作西式點心，1973年開始製作年輪蛋糕。由職人燒成嘅年輪蛋糕非常受歡迎，現時更成為日本具代表性嘅年輪蛋糕品牌。因此，對於滋賀縣民來說，「CLUB HARIE年輪蛋糕」與琵琶湖並列為「滋賀的驕傲」。據聞喺滋賀縣買年輪蛋糕作為手信，經已成為固定動作。

順帶一提，喺「CLUB HARIE八日市之杜」，可以品嚐到店鋪限定嘅朱古力味年輪蛋糕。被樹林包圍嘅隱居氛圍和限定酒吧大受歡迎，更成為開店前就大排長龍嘅觀光景點。

【日本47都道府縣特輯：滋賀篇】琵琶湖和CLUB HARIE係滋賀縣民嘅驕傲！