日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係位於日本中國地區，日本海一側嘅「鳥取縣」。即刻去睇睇擁有著名鳥取砂丘、松葉蟹嘅鳥取縣，有咩不為人知嘅一面啦！
鳥取縣雖然係日本47都道府縣中人口最少，卻孕育出擁有對本地強烈的愛與團結力量嘅鳥取縣民！
位於日本海一側，山陰地區東面嘅鳥取縣，人口約55萬人，係47個都道府縣中人口最少嘅縣市。 基礎自治體數量為4市14町1村，4市分別係鳥取市、米子市、倉吉市、境港市。鳥取縣人口少之餘，當中不得不提縣東部嘅因幡地區，由於天氣變化劇烈，為咗生存，地區內嘅互相幫助係不可缺少嘅一環。由於鳥取縣有著以上背景，令到當地縣民之間嘅聯繫性强勁之餘，亦孕育出對當地擁有強烈嘅愛、極度重視上下關係嘅鳥取縣民性喔。
因此，鳥取縣民基本上不太擅長說話，想法亦超保守。但對任何人都相當親切，非常多自願去幫助困難人士嘅縣民喔。如此誠懇嘅鳥取縣民亦係其魅力所在。
鳥取砂丘猶如當地中小學生嘅「庭院」？仲係遠足郊遊嘅經典地方兼已經去到厭？
講到鳥取嘅人氣旅遊景點，又點可以唔提鳥取砂丘呢！除咗可以喺無邊無際嘅砂丘上散步，騎駱駝、玩砂上滑板嘅「滑沙」、滑翔傘等砂丘特有體驗活動，仲可以去砂之美術館欣賞砂雕作品等，精彩位多到令人玩到唔捨得走喔！
鳥取砂丘之旅對於遊客嚟講雖然既精彩又吸引，但其實對於當地人嚟講就好似去附近公園散步一樣，更加係鳥取市內嘅小學、中學、高中學生嘅固定遠足郊遊景點，亦有聽過有人喺小學至中學嘅9年學生生涯入面，每年嘅遠足地點都係鳥取砂丘......
因此，當你向市內嘅小朋友、學生們問及砂丘，極有可能會得到「好厭吖…」嘅回覆喔。如果有機會接觸到鳥取縣出身嘅人，不妨問返句「小學嘅遠足旅行，有無去過鳥取砂丘吖？」。
喪排2小時為嘅係位於深山嘅人氣Pancake
2015年，Starbucks終於喺鳥取縣JR鳥取站附近，開設首間Starbucks Coffee Shamine鳥取店，當日吸引成1000人以上排隊，成為當時嘅人氣熱話。其實唔止Starbucks，就連7-11、唐吉訶德（DONKI）等著名連鎖店，當時皆尚未於鳥取縣開設分店（其後，7-11於2015年，DONKI於2016年開設首間分店）。
另外，原來鳥取縣未有Starbucks之前，唔少當地鳥取縣民都會為咗去嘆返杯Starbucks，而特地走去其他縣市喔。當Starbucks Coffee Shamine鳥取店開幕時，喺驚人嘅排隊人潮當中，更有通宵排隊嘅人士。其實唔單止係Starbucks，唔少鳥取縣民會為咗去名店，即使明知距離比較遠，都會特登自駕出發，就算要排長龍都在所不惜，由此可見鳥取縣民嘅強大忍耐力。
例如，位於深山嘅「大江之郷TERRASSE」，從鳥取市內自駕出發約40分鐘。「大江之郷TERRASSE」使用大江之鄉自然牧場生產嘅新鮮雞蛋製作Pancake，非常受歡迎，即使係平日都要等1個小時左右，星期六、日嘅話分分鐘要等成2至3個小時，係大排長龍嘅超級人氣店。從地理位置去睇，除咗「大江之郷TERRASSE」之外，係無其他值得去嘅地方，甚至連路途中可以順便去一遊嘅地方都無，純粹為一嚐人氣時尚美味甜品，特登自駕出發去深山，喪排2小時嘅大概就只有鳥取縣民吧。
自己縣Café自己開！「雖然無Starbucks，但係有Sunaba」而順勢誕生嘅Sunaba咖啡店
截至2014年，鳥取縣係全國47個都道府縣中，唯一無Starbucks嘅縣市。而且，偏偏喺被訂立為「鳥取縣民日」嘅9月12日，Starbucks竟然宣佈進軍鳥取縣隔離嘅島根縣，令鳥取縣成為全日本唯一無Starbucks嘅縣市......
當時，更加有電視節目中提到呢個話題，而平井伸治鳥取知事亦以鬼馬兼食字嘅回應話「我哋雖然無Sutaba（Starbucks日文簡稱），不過有日本第一嘅Sunaba（鳥取砂丘）」。
正正係因為鳥取知事呢句鬼馬發言，令全日本唯一無Starbucks嘅鳥取瞬間成為新聞、社交媒體上嘅人氣熱話。另外，由鳥取縣當地企業一手打造出嘅「Sunaba咖啡」，亦喺當時順勢而誕生。
實際上，鳥取縣嘅咖啡消費量係全國數一數二。當中，鳥取市嘅咖啡消費量曾居高全國第一，直至令和2年（2020年）為止嘅3年間，平均排名為全國第3，就連咖啡飲品嘅購買金額亦排名第4，係一個熱愛咖啡嘅地區喔。
其實喺鳥取縣嘅車站前、街道上嘅四周，曾經有唔少咖啡老舗「喫茶店」、以及對咖啡豆、烘焙等特別講究嘅專門店。由於「Sunaba咖啡」嘅開幕成為人氣話題，更確立鳥取嘅「咖啡縣」地位。利用鳥取砂丘嘅砂去烘焙嘅「砂燒咖啡」， 唔單止香滑醇厚且苦澀味恰到好處，口感極佳，現時已成為砂丘名產喔。
另外，或者係因為Starbucks嘅緣故，喺「Sunaba咖啡」嘅官網上，竟然見到呢句「目標，西雅圖！」嘅標語。可能喺不久嘅將來，「Sunaba咖啡」會越洋過海，開設「Sunaba咖啡 西雅圖店」呢！
日本47都道府縣特輯其他文章：
- 【日本47都道府縣特輯：山梨篇】原來全日本最鍾意食壽司嘅係山梨縣民！？
- 【日本47都道府縣特輯：石川篇】石川縣皮膚好嘅女性人數係日本榜首？究竟「美肌第一縣」嘅秘密係…？
- 【日本47都道府縣特輯：神奈川篇】逃離東京、移居神奈川嘅日本人正激增中！？
- 【日本47都道府縣特輯 Vol.1】 北海道不存在「小強」！？盤點日本全國城市傳聞 ～北海道篇～
- 【日本47都道府縣特輯 Vol.2】 沖繩人遲到係家常便飯！？盤點日本全國城市傳聞 ～沖繩篇～
- 【日本47都道府縣特輯 Vol.3】 千祈唔好輕易相信京都人嘅稱讚說話！？盤點日本全國城市傳聞 ～京都篇～
- 【日本47都道府縣特輯 Vol.3】 大阪每個家庭都有一部章魚燒機是常識吧！盤點日本全國城市傳聞 ～大阪篇～
- 【日本47都道府縣特輯 Vol.5】 邊個話奈良只得鹿！盤點日本全國城市傳聞 ～奈良篇～
- 【日本47都道府縣特輯 Vol.6】福岡縣點解特別多靚仔靚女！？盤點日本全國城市傳聞 ～福岡篇～
- 【日本47都道府縣特輯 Vol.7】買地就送森林 ！？盤點日本全國城市傳聞 ～佐賀篇～
- 日本47都道府縣特輯 Vol.8 鹿兒島篇「鹿兒島縣的〇〇好厲害！」
- 日本47都道府縣特輯VOL.9 「千葉縣民以縣嘅〇〇為榮，無得輸！」
- 日本47都道府縣特輯Vol.10 「愛知嘅○○好厲害！」
- 日本47都道府縣特輯VOL.11 栃木篇「栃木縣嘅○○好厲害！」
- 日本47都道府縣特輯VOL.12 兵庫篇「與其話係縣民特質、倒不如話係為市民特質？兵庫縣縣民人人都憧憬神戶市？」
- 日本47都道府縣特輯Vol.13 熊本篇「熊本縣的○○很厲害！」
- 日本47都道府縣特輯Vol.14 長崎篇「長崎的○○很厲害！」
- 日本47都道府縣特輯Vol.15 群馬篇「群馬嘅〇〇好厲害！」
- 日本47都道府縣特輯Vol.16 埼玉唔老土嘅「埼玉都(?)民」傲氣
Comments