加賀係以三個具歷史性嘅溫泉地作為中心嘅地區。除咗溫泉、自然景點豐富，仲有多間興盛嘅傳統工藝嘅會館、商店。另外，仲可以享用以新鮮海產製作嘅美食，去一次加賀旅行就可以滿足唒所有願望！
加賀的介紹
加賀位於石川縣西南部，係一片深受日本海及山脈大自然恩惠嘅地區。喺石川縣內少數嘅溫泉地當中，作為「加賀溫泉郷」而聞名。加賀溫泉郷係山中溫泉、山代溫泉、片山津溫泉，呢三個溫泉地嘅總稱。另外，加賀於17世紀作為城下町發展起來、當中宿場町（驛站）及武家屋敷（武士宅邸）等可以感受日本歷史風情嘅觀光景點都好多呀。
加賀嘅必去之處
加賀觀光地區分為加賀溫泉郷、大聖寺、橋立、動橋地區。其中，加賀溫泉郷包含三個溫泉地，每一個都有聚集各種觀光景點。今次小編就要為大家介紹3個溫泉地，各區嘅特徵同推薦嘅觀光景點啦。
加賀溫泉郷之山中溫泉地區
山中溫泉係一個位於山澗溪谷延伸出來，擁有1,300年歷史嘅溫泉地。呢一帶以被豐富自然環境圍繞嘅鶴仙溪為主要名勝景點。鶴仙溪設有行人歩道，可以邊行山散步，邊欣賞溪谷自然美景。
而呢個地區嘅代表性觀光景點當然唔少得「蟋蟀橋（こおろぎ橋）」啦！蟋蟀橋以總檜木（日本扁柏）製成，充滿日本風情。而「綾取橋（あやとりはし）」係一座呈S字造型嘅紫紅色橋。橋與周圍嘅景色互相融和，形成美麗嘅景致。
另外，山中溫泉嘅溫泉街「熱氣街道」內，有加賀嘅傳統工藝「山中漆器」嘅產業會館，及其他多種店舖。喺溫泉街散步時，又可以參觀傳統工藝嘅製作，見到啱心水嘅日本工藝製品又可以即刻買啦！
加賀溫泉郷之山代溫泉地區
山代溫泉自1,300年前開湯以來，深受日本史上留名嘅武將文人、水墨畫家等眾人愛戴。因而產生出藝術家「北大路魯山人」寓居遺址「伊呂波草庵」、「淺藏五十吉美術館」等與文人相關嘅景點。
另外，山代溫泉亦係日本具代表性嘅瓷器「九谷燒」嘅故鄉，有九谷燒美術館等多個可以接觸日本藝術及歷史文化嘅觀光景點。九谷燒係以紅色、黃色、綠色等鮮艷顏色所繪製嘅陶瓷器皿，大家肯定會被佢嘅美豔色彩迷得神魂顛倒㗎！
加賀溫泉郷之片山津溫泉地區
片山津溫泉係位於柴山潟湖畔附近嘅溫泉地。除咗以湖畔為中心嘅觀光地點，可以體驗坐船周遊，圍繞湖畔踩單車等活動都非常受歡迎。特別推薦乘坐設有屋頂座席嘅日式船—「屋形船」遊湖，體驗夠唒特別！其他仲有猶如漂浮於湖面嘅「浮御堂」、從湖面噴水、非常震撼嘅「大噴水」、湖畔旁嘅街道等，可以欣賞到各種各樣嘅景色。
加賀嘅當地美食＆餐廳
面向日本海嘅加賀，作為「香箱蟹」産地而聞名。加賀名產豐富，例如有使用大量香箱蟹精心炮製嘅御膳、丼飯等，仲有以橋立港捕獲嘅新鮮海產所製作嘅壽司，使用加賀食材製作嘅芭菲等原創甜品等都係加賀嘅特色美食嚟㗎。
順便一提，想食加賀名產美食可以喺主要車站，JR加賀溫泉站附近同各溫泉鄉附近嘅料理店享用得到！
加賀嘅酒店、旅館
加賀嘅酒店住宿大多聚集喺三個溫泉地內。各區都有酒店、旅館，但以旅館數量比較多，啱唒想去日本體驗入住日式旅館嘅朋友啦。就算係酒店，都有提供和室同和洋室嘅溫泉酒店，讓旅客充分體驗日本風情。
去加賀嘅交通方法
如果想去加賀，行程方面可以加入金澤一齊玩。加賀嘅主要車站係JR加賀溫泉站，可以從JR金澤站乘搭特急列車，約25分鐘抵達JR加賀溫泉站。
去到加賀點可以唔去埋加賀嘅溫泉鄉！喺JR加賀溫泉站再搭觀光景點周遊巴士「CANBUS」就可以輕鬆玩轉加賀溫泉啦！
景點資訊
- 景點名稱：加賀（JR加賀溫泉站）
- 地址：石川縣加賀市作見町ヲ58
- 交通方式：JR金澤站乘搭特急列車，約25分鐘抵達
- 是否提供Wi-Fi ：有（Kaga Free Wi-Fi）
- 對應語言：中文、英文、韓文
- 可使用信用卡：VISA, MasterCard, JCB, AMERICAN EXPRESS, Diners Club International
Comments