東京都世田谷區嘅世田谷公園內，有座大型噴水池同SL蒸汽火車相當顯眼。喺2012年，有間細細哋嘅蘋果批與咖啡店喺呢個可以明顯感受到四季變化嘅公園隔離開張咗。FUN! JAPAN團隊今次就前往採訪呢間用料實在同堅持使用日本國產蘋果嘅蘋果批名店「GRANNY SMITH APPLE PIE & COFFEE」總店‧三宿店。
蘋果批主打「奶奶嘅味道」 令人懷念嘅好滋味
三宿店坐落喺世田谷住宅區內嘅馬路三角窗，店面整體裝修以木頭為主，有種好似嚟到美國鄉村嘅感覺。一靠近小巧溫馨嘅店鋪，蘋果批嘅香氣就已經撲鼻而來，陳列喺店內玻璃櫥窗內嘅蘋果批，真係睇到流曬口水，美國家庭入面經常出現嘅DUTCH CRUMBLE；有萊姆葡萄風味嘅CLASSIC RUM RAISIN；添加杏仁果奶油嘅FRENCH D'MANDES同卡士達奶油嘅ENGLAND CUSTARD係「GRANNY SMITH」嘅招牌口味。另外，加上季節性期間限定口味不定期登場，以及店鋪限定口味，每日會供應大約8種商品俾顧客揀選。
同農家簽約 自己種蘋果自己用
為咗忠實呈現「奶奶嘅味道」並發揮蘋果本身嘅美味，店家所研發嘅蘋果批無使用多餘嘅調味，忠實保留蘋果本身嘅口感同香甜。而店名「GRANNY SMITH」其實亦都係蘋果品種之一，店家更加同青森以及長野嘅蘋果農家簽約，有自己嘅專屬蘋果農家。依各種蘋果嘅特徵同產季，研發出唔同口味，品項竟然多達40種以上。每種口味推出嘅時期，則係會配合各種蘋果嘅產季。令顧客每次造訪都有新鮮感。而店內販售嘅有機咖啡使用咗京都嘅小川咖啡，茶類亦堅持使用有機茶葉。
得呢度先至品嘗到 每間分店所推出嘅店鋪限定商品
三宿店雖然僅提供外賣自取，但店家特別喺店外擺放凳仔供客人即時享用蘋果批。店外白牆上大大嘅標誌，相當適合喺Ig上面打卡曬靚相，你亦可以帶住香噴噴嘅蘋果批到隔離公園搵個鐘意嘅地方細細品嘗嘎。小編今次揀咗2種口味帶走，分別係三宿店限定嘅「翻轉蘋果塔(Tarte Tatin)」同全部店家都買得到嘅「奶油起司蘋果派」。
GRANNY SMITH風嘅「翻轉蘋果塔」(下圖左)，使用帶有酸味嘅蘋果品種，可以食得出微苦滋味，係具有成熟感嘅蘋果派，單片未稅售價500日圓；而「奶油芝士蘋果批」(下圖右)係僅喺12/3~2/24期間販賣嘅冬季限定商品，蘋果餡同帶著蜂蜜香氣嘅奶油芝士，食落去甜度適中，上面配搭果乾同核桃，進一步提升香氣。單片未稅售價450日圓。而GRANNY SMITH另一個特色就係，每間店都有店鋪限定口味嘅蘋果批，唔親自造訪嘅話就食唔到嘎喇，各店鋪嘅限定口味，可以參閱下方店鋪資訊連結。
嚟到三宿店，有種唔似熱鬧嘅東京，寧靜嘅住宅區街道上，會令人不自覺放慢腳步，同當地居民踩住同樣節奏嘅步伐，而買返個GRANNY SMITH嘅蘋果批他同咖啡，拎走帶到去公園品嘗，體驗另一種不同嘅旅遊風情，都係一個唔錯嘅選擇吖。
店鋪資訊
店名：GRANNY SMITH APPLE PIE & COFFEE 三宿店
地址：東京都世田谷區下馬1-46-10
營業時間：10:00〜20:00
交通方式：東急田園都市線「池尻大橋」站徒步13分鐘；「三軒茶屋」站徒步約15分鐘
其他店鋪資訊請click：
https://grannysmith-pie.com/info.html
Comments