演唱會與電影票尾、博物館門票、鐵路紀念車票……人總係會為留著旅途嘅回憶，鍾意將某物品當做「紀念品」帶返屋企。您又知唔知喺參觀日本嘅城堡時，門票並非唯一可以帶走當紀念品嘅選擇？最近喺日本爆紅嘅「御城印（ごじょういん）」，正正係您參觀城堡之後可以帶返屋企，記錄美好回憶嘅紀念品之一！
雖然我哋已經喺 FUN! JAPAN 文章中，多次介紹過日本城堡。但難得去到城堡處卻只用肉眼觀賞，實在係太浪費啦！想要證明曾經進入過城堡，或紀念曾經登上城堡，收集御城印先至係現時最流行嘅城堡朝聖方式。如果您都係城堡迷嘅話，咁就唔使左諗右諗，下個日本之旅主題就係「城堡巡禮with御城印」！
首先介紹一下：御城印究竟係乜東東？
「御城印」係一種證明您曾進入或登上城堡嘅紀念品，有「入城記念書」、「入城記念符」、「登城証明書」等多種叫法。御城印嘅一般設計係喺和紙上以墨水寫上城名，並蓋上城主家徽或與城堡及周邊地區相關圖案嘅紅色印章。雖然有少數御城印係用人手書寫，但大多數都係預先印好。
大多數御城印售價為300日圓左右，亦有部分售價為500日圓，甚至1,000日圓。除咗有自費購買嘅御城印之外，亦有於活動中免費派發嘅御城印。每座城堡都有自己派發或售賣御城印嘅地點，例如城堡裡面、附近嘅旅遊服務中心、資料檔案館和博物館等等，喺購買前記得要先確認清楚相關地點喔。
睇完以上介紹仍然對御城印毫無頭緒嘅話，就將御城印想像成可以喺寺廟或神社獲得嘅「御朱印（*1）」城堡版本啦。由於要得到御城印並無任何高難度規則，可謂相當簡單，因此您大可將御城印當成明信片一樣，可以輕鬆購買嘅紀念品。
*1：御朱印（ごしゅいん）：喺參拜神社或寺廟時，由神社或廟方授與、作為參拜證明而印下嘅紅色蓋章
據說長野縣・松本城係最早推出御城印嘅地方，其於1991年左右推出嘅「天守閣登城記念朱印符」，可以稱得上係御城印嘅起源。不過直到最近三、四年，御城印先至真正引起全國關注。神社和寺廟嘅御朱印自2014年左右開始，喺日本成為人氣熱話，其後隨著以戰國武將為主題嘅電視劇流行，掀起一股城堡巡禮嘅熱潮。有著以上呢兩個主因，現時御城印愈來愈受注目，連帶推出御城印嘅城堡數量亦火速增加。
顏值爆棚嘅御城印簡直就係藝術作品！好想集齊全套通通帶走~
直至2020年為止，各個城堡經已發行超過500張不盡相同嘅御城印，據說現時數量更已超過1,000張！跟著落嚟嘅時間，就等我哋齊齊欣賞一下各式各樣嘅御城印設計啦。
御城印上普遍會印有以下文字或圖案：
- 右上：「登城記念」、「天守登閣記念」、「國家指定史蹟」、「特別史蹟」、「國寶」等等，不同城堡有不同寫法
- 中央：城堡名稱（以毛筆書寫）
- 左下：登城日
- 背景：城主家徽（用於識別個人或親族時所使用嘅紋章）或花印（戰國武將等人於發行文件時，喺最後簽署嘅名字或記號）
另外，也有部分設計會加入從城主信件或日記中擷取嘅文字。從中比較各種不同設計嘅御城印，亦係旅程中嘅一大樂趣喔。
香川縣・丸龜城嘅御城印（1張300日圓）上，印有最後嘅城主「京極高和」嘅家徽「四結」 。
青森縣・三戶城嘅御城印（1張300日圓），印上大大個甲斐國（現時嘅山梨縣）出身嘅氏族南部氏，其極具特色嘅家徽「向鶴紋 」。
印刷時所使用嘅和紙亦展現出各座城堡嘅個性。當中，除咗有使用當地產嘅和紙，仲會有使用與城主相關顏色嘅和紙。因為每種和紙嘅材質、觸感和厚薄度皆有所不同，所以喺收到御城印嘅時候，可能會有意想不到嘅驚喜呢。
另外，即使係同一座城堡，亦有可能會根據不同季節和時期而改變御城印嘅設計。
當中包括以「天下第一賞櫻名勝」而廣為人知嘅長野縣・高遠城（高遠城址），就會根據櫻花嘅不同開花狀況，順序推出4種不同櫻花顏色嘅御城印。惟有參觀城堡嘅當下，先至能夠擁有嘅珍貴回憶，絕對會呼喚起您嘅收藏家魂呢！
把城堡巡禮回憶好好收藏！必買御城印帳~
如果您係一個熱愛收藏嘅人，一定會非常在意收納紙製御城印嘅方式，如果想好好收納御城印，最需要嘅就係一本可以用嚟整理御城印嘅「御城印帳」！而御城印帳主要有「口袋式」和「粘貼式」兩種款式，前者有附透明收納袋，等您可以隨時取放御城印，而後者則需用膠水將御城印直接貼喺御城印帳裡面。
如果您覺得淨係收藏御城印仲未夠喉，亦可以尋找以城主、城郭或城堡特徴作主題，具有特別設計嘅御城印帳，其獨特造型可謂非常值得收藏。當中不得不提滋賀縣・彥根城於春季推出嘅櫻花設計御城印帳，擁有勁吸睛嘅粉紅色設計，令唔少人少女心無限爆發！
必須收藏！日本正捲起一股御城印風潮~
隨著推出御城印嘅城堡數量愈來愈多，日本亦正捲起一股收集御城印嘅熱潮！
例如早前兵庫縣・姫路城配合「冬季特別展」期間所推出嘅御城印，開售僅10日銷量就突破1萬張，成為當時嘅一大熱話。亦有成幾百人一大早就排隊，就係為咗入手神奈川縣・小田原城推出嘅限定御城印。由此可見，御城印嘅人氣仍持續上升，勢不可當呢。
另外，來自御城印嘅收入除咗會用於每座城堡嘅整修，仲會用於如下所述嘅各種項目。
人道援助
- 群馬縣・沼田市觀光協為向持續受俄羅斯軍事侵略嘅烏克蘭提供人道援助，以每張300日圓嘅價格，出售印有烏克蘭國旗與國花向日葵嘅沼田城特別御城印（左）。所有收益將捐贈予烏克蘭駐日本大使館。
支援志工活動
- 2022年1月，愛知縣・大野城發行了新年限定御城印。其銷售收入所得，將全部用於支援縣內青海地區免費居民巴士嘅運行，仲有「城山公園除草」等公共服務或志工活動。
支援復興
- 岐阜縣・郡上八幡城和佐賀縣・唐津城各自捐贈了御城印部分銷售收入，以支援於2016年熊本地震中受損嘅熊本縣・熊本城重建活動。
想更了解有關御城印資訊，就參考呢本書吧！
通過購買御城印，您除咗可以了解更多關於城堡嘅歷史與背景，同時亦可以為支援城堡出一分微力。最重要嘅係非常抵買，每張只需要300日圓起，買嚟當旅行紀念品可謂最適合不過！下次嚟日本旅行嘅時候，不妨出發一場城堡巡禮！如果您都有收集過御城印嘅話，可以留言同我哋開心Share喔。
今次同我哋合作進行採訪嘅 JTB Publishing，出版咗一本以顯淺易明嘅方式，解說「御城印」相關基礎知識嘅書。想從今開始收集御城印嘅話，一定唔可以錯過呢本御城印天書喔！
《 はじめての御城印めぐり》（第一次嘅御城印巡禮）
- 價格：1,430日圓（含稅）
- 頁數：128
- 商品內容：Amazon Japan
Comments