位於香川縣丸龜市嘅丸龜城建城至今已有400年歷史，屬丸龜市最具代表性嘅景點之一。石牆由内堀一路至搭建於天守所，遊客可以從外欣賞到其獨特曲線美，而樓高3層嘅木造天守則更被列為國家指定重要文化財！如此有歷史價值嘅地方名勝，一場嚟到香川縣又點可以錯過呢？
有關丸龜城
丸龜城建於海拔約66米嘅龜山上，因此亦有「龜山城」之稱。圍繞古城而建石牆以曲線美見稱，令丸龜城作為「石牆之名城」聞名日本全國。於1660年建成木造天守仍然保留至今，即使經過四百年歲月，建築仍然與自然融為一體，散發出獨有建築特色。春天時櫻花會將城內染成一片粉紅，難怪成為當地市民一大人氣賞櫻與散步休憩地方！
丸龜城必睇之處
丸龜城一大睇頭，當然係經歷咗400年仍然完好保留至今嘅史跡啦！城堡建築其中一部份嘅「天守」高約15米，以「三重三階」（重即屋頂，階指樓層）構造而成，係日本全國僅餘12棟天守嘅其中之一。作為城堡大門嘅「大手一之門」建於走廊之下，採用一種被稱為「櫓門」嘅建築樣式，以大型嘅柱同橫樑穩固地組合而成；而城堡內部亦都開放參觀，遊客仲可以睇到用作防禦嘅落石裝置𠻹！三之丸北側嘅石牆高約20米以上，屬係丸龜城內最高石牆。為穩建圍牆邊位，石牆採用一種名為「算木積み」嘅方式，從角落由長方形嘅石頭互相交砌而成，呈現出優美曲線。
丸龜城觀光資訊
丸龜城「天守」
丸龜城天守於朝早9點至下午4點半開放參觀（下午4點截止入城），進城需付維護城堡費，收費為成人200日圓、中學・初中生及小學生100日圓。景點全年無休，但可能會有臨時休城日，出發前記得要先去官網確認喔。
丸龜城「大手一之門」
「大手一之門」開放時間為朝早9點至下午4點。參觀費用全免，惟要注意雨天暫停開放。
前往丸龜城嘅交通方式
從高松機場乘搭機場巴士約1小時15分鐘後，於JR丸龜站落車徒步約10分鐘即可到達，交通非常方便！
景點資訊
- 名稱：丸龜城
- 地址：香川縣丸龜市一番丁
- 交通：高松機場→機場巴士約1時間15分鐘→JR丸龜站…徒步約10分鐘
- Wi-Fi：有提供
- 語言對應：只有日文
- 購票：售票處
- 可否使用信用卡：不可
Comments