日本唔單止擁有多個溫泉地，仲可以享受各種泉質嘅溫泉，絕對稱得上係溫泉大國。日本每年都會發表「日本溫泉100選」嘅排行榜，係由一班被稱為「旅遊專家」，身處旅遊業界嘅日本人所投票選出。今次會一舉公開2021年度嘅排行榜TOP10名單，並進一步介紹各地區嘅人氣溫泉勝地。
相關文章推薦
日本人票選出最佳溫泉TOP10排名
1位：群馬縣 草津溫泉
2位：岐阜縣 下呂溫泉
3位：大分縣 別府八湯溫泉
4位：愛媛縣 道後溫泉
5位：神奈川縣 箱根溫泉
6位：北海道 登別溫泉
7位：兵庫縣 有馬溫泉
8位：鹿兒島縣 指宿溫泉
9位：大分縣 由布院溫泉
10位：石川県 和倉温泉
※資料來源:「日本溫泉100選」2021年度總排名榜100選
群馬縣草津溫泉連續19年，被選為「日本溫泉100選」嘅第一名！草津溫泉嘅自然湧出量，位居日本溫泉之首。無論係「氣氛」、「精彩之處・休閒&體驗活動」、抑或係「泉質」等排行榜中各評分類別，草津溫泉均被評定為第一名，果然無愧於日本名湯之稱喔。下個東京之旅，不妨去群馬縣草津溫泉，嘆返個靚溫泉吧！
另外，第2~10位亦係相當著名兼受歡迎嘅溫泉勝地。鐘意溫泉嘅您，不妨數數自己稱霸咗幾多個榜上有名嘅溫泉啦！
北海道地區最佳溫泉地
| 區域 | 溫泉地（2021年排名） |
| 道央（代表性景點：札幌、小樽等） | 登別 (6)、定山溪 (39)、洞爺湖 (48) |
| 道東（代表性景點：知床、釧路等） | 十勝川 (22) |
| 道南（代表性景點：函館等） | 湯之川 (24) |
| 道北（富良野和稚內） | 層雲峽 (43) |
北海道面積廣闊，推薦配合想要踏足嘅景點位置，去規劃一場溫泉之旅。假設想嚟一趟新千歲機場、札幌、小樽周邊巡遊，2日1夜之旅嘅話，可以選擇登別和定山溪溫泉，皆因從札幌市出發嘅交通路線相當方便。如果去釧路、帶廣、紋別等道東地區嘅話，可以選擇十勝川溫泉、以及排名第52位嘅阿寒湖溫泉。
相關文章
東北地區最佳溫泉地
| 縣名 | 溫泉地（2021年排名） |
| 青森縣 | 酸湯 (42) |
| 山形縣 | 銀山 (13)、藏王 (30) |
| 岩手縣 | 花卷溫泉鄉 (34) |
| 秋田縣 | 乳頭溫泉鄉 (14) |
| 宮城縣 | 鳴子 (21)、秋保 (35) |
山形縣和青森縣由於冬季時雪量多、積雪深，所以亦被稱為「雪國」。如果您要去嘅溫泉地係位於山形縣同青森縣嘅話，推薦一邊浸露天溫泉，一邊賞雪喔。如果想同時享受滑雪等冬季運動嘅話，小編推薦藏王溫泉。皆因東北最大嘅滑雪勝地「藏王溫泉滑雪場」附近聚集唔少徒步即可去到嘅溫泉旅館。
抵達擁有500年歷史嘅銀山溫泉時，不禁產生有如走進「千與千尋」世界中嘅錯覺，正因為銀山溫泉與吉卜力工作室製作嘅動畫電影——「千與千尋」嘅舞臺相似，成為全球熱話。小編建議大家不妨於晚上喺溫泉街散散步，好好感受一下大正時代嘅懷舊景觀吧。
相關文章
東京必去！關東地區最佳溫泉地
| 縣名 | 溫泉地（2021年排名） |
| 栃木縣 | 鬼怒川・川治 (17)、鹽原 (50) |
| 神奈川縣 | 箱根 (5) |
| 群馬縣 | 草津 (1)、伊香保 (15)、萬座 (27)、四萬 (43) |
東京係廣受外國遊客歡迎嘅旅遊目的地，雖然東京都內溫泉地唔多，但東京勝在交通夠晒方便，小編推薦去東京旅行嘅時候，可以前往位於鄰近縣區、只需約2小時車程即可抵達嘅溫泉地喔。
排名第1位嘅草津溫泉，以及排名第5位嘅箱根溫泉，固然係人氣嘅溫泉景點，但其實排名第15位嘅伊香保溫泉亦非常值得一去。除咗附近有唔少遊樂園、美術館、神社之外，亦有多個大自然美景勝地，係一個可以盡情玩樂兼享受溫泉嘅好地方。
相關文章
中部地區最佳溫泉地
| 縣名 | 溫泉地（2021年排名） |
| 富山縣 | 宇奈月 (47) |
| 岐阜縣 | 下呂 (2)、奧飛驒溫泉鄉 (18)、飛驒高山 (26)、長良川 (28) |
| 新潟縣 | 月岡 (19) |
| 石川縣 | 和倉 (10)、山中 (29)、山代 (32) |
| 福井縣 | Awara (40) |
| 長野縣 | 白骨 (31)、昼神 (36)、湯田中澀溫泉鄉 (45) |
| 靜岡縣 | 熱海 (20)、修善寺 (37)、觀音 (46)、稻取 (49) |
排名第2位嘅岐阜縣下呂溫泉，與草津溫泉、有馬溫泉並稱為「日本三名泉」。下呂溫泉更被美譽為「美人之湯」，觸感滑順嘅溫泉水可謂其最大特色。
被群山包圍嘅長野縣廣受登山愛好者歡迎。長野縣各處都有多個溫泉地，推薦登完山再去慢慢嘆返個靚溫泉，緩解疲勞之餘心情仲相當舒暢喔！
相關文章
大阪、京都必去！關西地區最佳溫泉地
| 縣名 | 溫泉地（2021年排名） |
| 兵庫縣 | 有馬 (7)、城崎 (11) |
| 和歌山縣 | 白濱 (33) |
大阪和京都雖然係關西地區著名嘅旅遊目的地，但當提起關西地區嘅溫泉地嘅話，鄰近嘅兵庫縣與和歌山縣嘅城崎溫泉、有馬溫泉、或白濱溫泉，均為關西地區人氣溫泉地。
美譽為三大名泉嘅「有馬溫泉」，同時亦係日本三大古泉之一。不僅深得關西地區居民喜愛，亦係全國數一數二嘅溫泉名湯。有馬溫泉有金泉、銀泉兩種溫泉，分別具有保溫和美肌、以及提高自然治癒力等功效。另外，同樣被譽為「日本三大古泉」嘅白濱溫泉，除咗有著美麗嘅白砂海灘，仲有多間面向太平洋海景嘅溫泉旅館，充滿度假風情，想要出發一場夏日之旅嘅話，白濱就最適合不過啦。
相關文章
中國・四國地區最佳溫泉地
| 縣名 | 溫泉地（2021年排名） |
| 島根縣 | 玉造 (16) |
| 鳥取縣 | 三朝 (41) |
| 愛媛縣 | 道後 (4) |
日本嘅中國、四國地區嘅溫泉地雖然唔算多，但係被列為日本三古泉之一，位於愛媛縣嘅道後溫泉亦有入選排行榜喔！而且更係名列第4位，絕對可以稱得上係著名溫泉地。另外，島根縣出雲嘅玉造溫泉亦被稱為「美肌之湯」，其最大特徵為泉質含有多種有如化妝水般滋潤嘅成分。
相關文章
鹿兒島等地嘅九州地區最佳溫泉地
© K．P．V．B
| 縣名 | 溫泉地（2021年排名） |
| 佐賀縣 | 嬉野 (25) |
| 大分縣 | 別府八湯 (3)、由布院 (9) |
| 熊本縣 | 黑川 (12) |
| 長崎縣 | 雲仙 (38) |
| 鹿兒島縣 | 指宿 (8)、霧島 (23) |
九州嘅溫泉湧出量為日本全國之冠，亦有「溫泉天堂」之美譽。另外，九州擁有多個各具特色嘅溫泉地，當中不得不提著名嘅「別府八湯」。何謂別府八湯？別府八湯其實係八個具有代表性嘅溫泉鄉總稱，無論係泉源數目、抑或係溫泉總湧出量（自然湧出量+動力湧出量）都係位居日本第一！溫泉種類各具特色、擁有不同泉質亦係其特徵之一。
指宿溫泉則以「沙蒸溫泉」而聞名，其使用砂子覆蓋全身嘅入浴方式相當獨特，難怪會聞名全國！另外，可以邊浸溫泉，邊欣賞眼前無敵大海景嘅「玉手箱溫泉」，亦不容錯過。
本篇文章所介紹嘅溫泉地，您又已經去咗幾多個？去完又覺得點呢？歡迎大家留言，同小編分享相關感想喔！
Comments