雲仙作為日本首個國立公園帶給你能代表日本嘅自然好風光

位於長崎縣嘅雲仙，坐擁活火山雲仙岳山群，係一個大自然資源豐富嘅地區。作為日本第一個被列為國立公園嘅地方，有著能代表日本嘅自然好風光，加上因火山所形成嘅自然景觀同天然溫泉等眾多景點都好值你去一遊！

雲仙岳所在地

雲仙位於長崎縣島原半島嘅西部，包圍處於正中央嘅雲仙岳。得天獨厚嘅地理位置，讓人可以在此眺望橘灣、有明海嘅美麗海岸線，及以雲仙岳山群等雄偉風光。而且仲有雲仙溫泉等出名嘅溫泉鄉，係一個充滿魅力嘅旅遊目的地。

雲仙岳，即係由普賢岳、國見岳、妙見岳等總共8座山嘅總稱。主峰為普賢岳，作為火山曾於1663年、1792年、1991年3度爆發，現時其無火山活動跡象，所以成為可以登山嘅觀光景點。

雲仙係一個暖和多雨嘅地區，夏天時多雨量，而冬天主要因為雲仙岳落雪時會好凍，所以最佳觀光時期就推薦天氣比較穩定嘅春天同秋天。特別係秋天滿山紅葉嘅景觀零舍美豔！

雲仙以雲仙岳為中心，集結各種觀光景點，我哋就嚟睇吓雲仙有咩觀光景點，一齊玩轉雲仙啦！

近年香港人鐘意行山，出外旅行時行山都成為新興活動，雲仙岳有幾條登山路線，不妨試吓呢個日本山啦。當中最推薦去行可以眺望平成新山嘅普賢岳路線。平成新山係1900年代時，普賢岳因火山爆發而造成嘅熔岩穹丘（lava dome，又稱火山穹丘），可以近距離感受大自然嘅雄偉壯麗。

雲仙岳嘅山腳有雲仙溫泉街。去雲仙溫泉玩，就算係即日來回，都可以使用唔使入住嘅溫泉浴場、足浴、「指湯」（即浸手指嘅溫泉）等多種溫泉設施可以享用。

而且，各個溫泉鄉內都有觀光景點，其中以雲仙溫泉嘅「雲仙地獄」最受歡迎。處身強烈硫磺味嘅溫泉地帶，望住因高溫泉水而湧現噴發嘅煙霧，真係不禁令人睇到哇哇聲呀！

喺雲仙最出名嘅就係「雲仙牛肉燴飯」同「湯仙貝」。雲仙牛肉燴飯之所以出名其實係因為昔日雲仙曾經作為外國人嘅避暑勝地時，提供俾佢哋食嘅西式食物，現時喺多間餐廳或酒店都經過改良後，演變成唔同口味。而湯仙貝嘅湯喺日文即係熱水或溫泉水嘅意思，湯仙貝係用咗溫泉水製作嘅和菓子，帶微甜嘅味道為特徵。

提供雲仙特產嘅餐廳主要喺雲仙溫泉附近一帶，或者沿海都有少數餐廳。

如果想計劃喺雲仙住返晚，可以揀雲仙溫泉地區，有酒店、旅館、民宿等多種嘅天然温泉住宿設施可以選擇。房價因住宿服務而有所差異，但基本上只住唔包食唔包特別服務的話都最平5千円一房都有，而想住好啲，住內附露天溫泉嘅客房就可能預10萬円內。

要去雲仙玩，可以首先去咗距離雲仙溫泉最近嘅車站，島鐵巴士嘅「雲仙營業所」站開始玩啦。而去呢個站可以喺JR長崎站前嘅長崎巴士總站就搭到島鐵巴士，坐約1小時40分鐘就到雲仙營業所站啦。