熱海溫泉:日本三大溫泉街之一

熱海溫泉:日本三大溫泉街之一

熱海位於靜岡縣伊豆半島北部沿岸,係一個被群山大海包圍、自然環境豐饒嘅溫泉度假形區域。除咗擁有各式觀光景點,每年仲會舉辦10次以上「熱海海上煙花大會」等祭典活動。

靜岡縣熱海簡介

靜岡縣熱海簡介

熱海係位於因被多賀火山侵蝕而形成嘅傾斜土地上嘅城鎮。受惠於火山,熱海有豐富自然湧出嘅溫泉泉源,自古以來作為溫泉鄉而繁榮發展起嚟。另外,距離熱海約10公里嘅「初島」亦係一個熱門度假勝地。

熱海嘅氣候及最佳旅遊季節

熱海嘅氣候及最佳旅遊季節

熱海嘅夏天涼爽、冬天和暖,降雨量較少,一年四季都適合觀光旅遊。而且仲有欣賞到季節性花卉嘅賞花名勝景點、各種祭典同活動等,唔同季節嚟到都充滿魅力!

尤其推薦夏天去熱海,可以體驗各種活動。除咗煙花大會同各種祭典,仲可以享受海中暢泳,玩大型水上遊樂設施或各種水上活動,可以體驗多種活動。

熱海嘅必睇景點

熱海嘅必睇景點

熱海Marine Spa」有溫泉同泳池,可以著泳衣入內,而且有足浴設施「家康之湯」等各種可以輕鬆體驗溫泉嘅景點。除咗溫泉之外,仲有各式各樣嘅觀光設施。

熱海梅園、陽光海灘(Sun Beach)等自然景點

熱海梅園、陽光海灘(Sun Beach)等自然景點

熱海仲有好多觀光景點,例如有著名賞花地點「熱海梅園」同「AKAO香草玫瑰園」、綿延的斷崖風景「錦浦」等等。當中「陽光海灘(Sun Beach)」嘅蔚藍大海、白色沙灘、椰林樹影嘅海岸風景非常美麗。甚至夜晚點亮燈飾後,可以喺被染成淡藍色、充滿夢幻氣氛嘅沙灘上散步,非常浪漫。

透過MOA美術館及藝妓表演 讓你接觸藝術及傳統文化

喺熱海都有藝術嘅景點,例如喺「MOA美術館」可以欣賞東洋藝術嘅繪畫、陶器、佛像彫刻等作品;喺「熱海Trick Art迷宮館」可以欣賞立體嘅視覺藝術作品。

另外,「熱海藝妓見番歌舞練場」逢星期六、日都會舉辦表演,藝妓會著上華麗和服為大家表演優雅嘅藝妓舞蹈。

熱海城、來宮神社等歷史文化建築

講起熱海旅行,建於錦浦山頂嘅「熱海城」、擁有一棵樹齡兩千年以上神木「來宮神社」都係必去景點。

喺六層樓高嘅熱海城天守閣中,有一層係展示武器同浮世繪,又有穿著殿下同公主服裝嘅體驗活動,仲有一個足浴景點。另外,從六樓嘅展望台可以俯瞰大海同伊豆半島嘅廣闊景色,簡直靚到哇哇聲!

熱海嘅美食及餐廳

熱海著名嘅海鮮美食有海鮮丼、醬煮魚、竹莢魚乾等。其他仲有蛋包飯等西式料理、以熱海命名嘅日式及西式甜品等都出名。以熱海車站為中心,沿海嘅街上都有好多餐廳同甜品店。

使用熱海新鮮海產製作壽司

熱海嘅熱海港同網代港係竹莢魚、鮪魚、紅甘等各種魚類嘅卸貨港。熱海市內,好多壽司店都使用呢啲捕獲返嚟嘅海產嚟製作壽司,咁新鮮就一定要試吓啦!

使用日本產量第一嘅「DAIDAI(橘子)」製造嘅美食

熱海特產柑橘類水果「DAIDAI」具有清爽嘅香味同酸味,常於製作肉類料理、魚類料理及日式或西式甜品時使用。有好多餐廳同甜品店都可以食到使用「DAIDAI」製成嘅料理,有時間就喺觀光景點附近搵吓有無呢啲餐廳啦!

熱海酒店及旅館

熱海酒店及旅館

熱海嘅住宿設施建於沿海地區。特徵係大部分都附設溫泉設施,或者客室可以一望大大個美麗海景!平均價格大約10,000〜20,000日圓。而價格比較經濟實惠、約5,000~10,000日圓嘅酒店多數建於JR熱海站附近。

從東京去熱海嘅交通方式

從東京去熱海,以觀光據點JR熱海站為目標。由JR東京站乘搭東海道新幹線「HIKARI」約35分鐘抵達JR熱海站。另外,亦可以乘搭「KODAMA」約50分鐘到達。去到JR熱海站就可以搭電車或熱海市內名勝巡遊「湯~遊~巴士」去其他觀光景點

景點資訊

  • 景點名稱:熱海(JR熱海站)
  • 地址:〒413-0011 靜岡縣熱海市田原本町11-11
  • 交通方式:東京站→[東海道新幹線]約35分鐘〜50分鐘→熱海站
  • Wi-Fi:有(Free Wi-Fi ATAMI)
  • 對應語言:中文、英文
  • 信用卡:VISA, MasterCard, JCB, AMERICAN EXPRESS, Diners Club International

目錄

Survey[問卷調查] 關於日本旅遊







Recommend