喺美國有「感恩節」，日本亦有一個好相似嘅公眾假期，就係11月23日「勤勞感謝日」。一睇係咪會想問，「即係感謝邊個？」今次FUN! JAPAN編輯部就嚟為大家簡單解說「勤勞感謝日」嘅由來同埋意思。
關於勤勞感謝日 與「新嘗祭」有關？
其實，「勤勞感謝日」係源自於為咗感謝五穀豐收之神而舉辦嘅「新嘗祭」。所謂「新嘗祭」係將收穫嘅新米獻畀神明，同時感謝神明保佑五穀豐收。「新嘗祭」係日本皇室由以前傳承至今嘅重要祭典之一，亦係重要嘅皇室活動，由天皇陛下親自品嘗新米，感謝天照大神為首嘅神明。喺1873年11月23日被制定為公眾假期。時至今日，日本各地仲有好多大型神社，依然每年舉辦「新嘗祭」。
二戰後，為咗將皇室嘅宮中活動「新嘗祭」與人民自發嘅活動作出分別，於是喺1948年將呢日命為「勤勞感謝日」，旨在於「崇尚勤勞、慶祝生産、國民互相感謝」，將重點放喺感謝人民的辛勤勞動。到今時今日已經係日本人相當熟悉嘅公眾假期之一。
「勤勞感謝日」要向誰表達感謝呢？
「勤勞」一詞，喺日本係有「努力工作」、「工作獲得報酬」嘅意思含義。雖然原本係因為「新嘗祭」，要向穀物之神表達感謝之意嘅日子。但係而家就會廣泛感謝從事「工作」嘅人，無論係公司上班族，定係雖然無人工但從事家務嘅人等，全部都包哂。
好重要！時常心懷感謝
相信大家喺日劇入面，成日佰見到日本人會喺食飯前講「いただきます (通常譯：要開動了) 」，而食完飯亦會講「ご馳走様でした(謝謝招待)」。其實短短嘅說話，係感謝所有為咗呢啲食物、食材而工作嘅人，感謝一齊食飯嘅人，亦有感謝食材嘅意思。喺呢啲生活小節就睇得出，對日本嚟講，時常心懷感謝之意係好重要。
11月23日「勤勞感謝日」，感謝每日有美食可以享用時，亦唔好忘記感謝周圍嘅人為咗日常而努力。仔細想想，呢日公眾假期真係美好。時常心懷感謝之意，並隨時將「感謝」表達出嚟，藉此仲可以加深家人、親朋好友等嘅感情，相當重要♪
Comments