如果係日本迷嘅話，可能已經有聽過「運動之日(スポーツの日)」。「運動之日」之前叫做「體育之日(体育の日)」，喺2020年先改名做「運動之日」。過去呢個假期係定喺10月第2個星期一，而2020年就特例咁移動到7月24日。呢個公眾假期有乜嘢意思呢？係為咗慶祝紀念乜嘢而設嘅呢？日本人會係呢日做啲咩？等我地一齊嚟大剖析！
「運動之日」係乜嘢？
「運動之日」原名「體育之日」，最初係為咗紀念1964年東京奧運期間創造輝煌成績同埋帶嚟無盡感動而被制定為「令國民更親近運動，培養健康身心」嘅日子。1964年嘅東京奧運開幕式係10月10日，所以最初「體育之日」係訂於10月10日，直到2000年，先改成10月嘅第2個星期一。 而為咗響應「體育之日」，有很多學校同埋機構團體都會揀喺呢個季節舉行運動會。
而喺2020年，藉住東京再次主辦奧運嘅時機，將呢個有50年以上歷史嘅「體育之日」改名做「運動之日(スポーツの日)」，理由係「スポーツ(SPORTS)」更加通用，令全世界都可以共享「運動價值」。順帶一提，「運動之日」係日本嘅公眾假期中，唯一一個無漢字，唯一一個用片假名做稱呼嘅公眾假期。
運動同體育有分別？
大家有沒有諗過運動同體育嘅分別呢？由詞語字面意義睇，「體育」即係Physical Education，義務教育課程中，通過適當嘅運動，促進身體健全發展，培養運動能力同健康生活態度等。透過學校專業嘅教學，強制令學生學習體育嘅意義。
而另一方面，「運動(SPORTS)」就有比較廣義嘅身體運動嘅意思，係追求樂趣或者一拼勝負嘅身體運動總稱。除左包括咗比賽較量嘅運動競技外，亦都包括埋休閒嘅運動。除咗有自發性之外，亦有透過運動進行地區交流或者國際交流等，運動所扮演嘅角色同地位價值正逐漸上升。
2020年限定 「運動之日」由10月變7月
正如上文介紹，東京奧運原本預計喺2020年舉行。所以就修法將2020年嘅「運動之日」由10月搬到7月。原本目的係考慮到奧運舉辦期間會有好多遊客，加上有好多海外政要會前嚟東京，為了舒緩開幕式同閉幕式前後嘅交通量，所以大家放假，希望令奧運順利舉行。不過好可惜係，東京奧運延期至2021年。至於下年嘅「運動之日」會係7月定10月呢？可能就要等當局宣佈奧運舉辦情況先知。
Comments