日本旅行時，有時會見到店舖前擺放著「狸貓擺設」。你有無諗過「究竟點解要放狸貓擺設喺門口呢？」，其實狸貓擺設係日本特有嘅吉祥物之一喔。
日本自古以來就有重視「象徵吉利事物」嘅習慣，亦會將「吉祥物」（日文稱為「緣起物」）放喺屋企、商店、辦公室，甚至作為禮物送畀重要嘅人。被認為「吉利」嘅事物，除咗有如習俗般無形嘅存在，亦有如食物般嘅有形物品。今次，小編會以大家喺日本旅遊景點裡，經常會見到嘅「擺設」進行詳細介紹。
究竟何謂緣起？
「緣起」源自梵語「pratītya-samutpāda」，意思為「萬物皆由各種因緣而成」，日文中稱為「因緣生起（いんねんしょうき）」，故簡稱為「緣起」。時至今日，經常會使用「緣起良好」、「緣起不佳」等用詞，含有「有預感將會發生好（壞）事情等要素」嘅意思。
緣起良好嘅吉祥物擺設4選
日本有贈送祝願大吉大利嘅緣起「吉祥物」等習慣，而吉祥物相關禮品亦有多項種類。以下落嚟，小編嚴選出好幾款送禮經典之選嘅吉祥物「擺設」，為大家作詳盡介紹喔！
招財貓：招攬顧客或財運嘅吉祥物
「招財貓」係生意興隆嘅經典吉祥物。最近，被外國遊客稱為「Lucky cat」和「Welcome cat」，係人氣嘅手信之選。
被稱為吉祥物嘅由來眾說紛紜，當中，東京豪德寺嘅發源地之說可謂最廣為人知。據傳說，某日彥根藩主井伊直孝於獵鷹歸來時，經過豪德寺前之際，因為見到貓咪招手，所以隨著貓咪帶領下，進入豪德寺。喺寺廟中逗留時，突然落起傾盆大雨，於是井伊直孝相信係因為貓咪令佢成功避雨，仲可以喺寺廟內與和尚相談甚歡。自此之後井伊直孝非常重視貓咪。及後，豪德寺將招福貓咪稱為「招福貓兒（まねきねこ）」，並為紀念祭祀招福貓兒，而建造招福殿。
唔同姿勢嘅招財貓，各具不同祈願含意。
- 基本上，舉右手係象徵「金運」，舉左手係象徵招「人」
※雖然亦有舉起雙手嘅商品，但有時會被理解成「舉雙手投降」，唔太吉利嘅意思 - 雖然大多數招財貓會手拎金幣，但亦有手拎鯛魚、槌仔、手耙等其他物件。
- 近年來，因時代變遷，亦含有「戀愛」、「長壽」、「中彩票大獎」等各種祈願嘅招財貓喔。
- 根據唔同顏色，其寓意亦有所不同。例如：
- 金色、黃色：財運上升
- 三色貓：招喚運氣
- 黑色：消災避邪、居家安全
全國各地都有多個關於招財貓嘅著名景點。作為誕生傳說舞台嘅豪德寺，除咗寺內招財貓滿載之外，就連附近嘅商店街都可以遇上多隻招財貓喔。另外，愛知縣常滑市亦有著名嘅「常滑招財貓通 」，瀨戶市有「招財貓博物館」，可以享受一個與各種招財貓相遇之旅。
狸貓：玄關處常見嘅生意興隆吉祥物
「狸貓擺設」作為生意興隆嘅吉祥物，經常會喺日本店舖前和玄關處出現，更加係作為新店開張嘅人氣送禮之選。
據聞狸貓擺設，係源自本家狸貓制陶所（現今為「狸庵」）嘅藤原銕造所製作嘅狸貓擺設。於昭和26年，昭和天皇到訪信樂並吟詩歌詠，自此便傳遍日本全國，變得廣為人知。
另外，信樂燒狸貓擺設嘅手持物品及其姿態，有著被稱為「八相緣起（はっそうえんぎ）」嘅表現特徵，具有8種不同嘅吉祥含意。
斗笠（帽）：平日經已有所準備，如遇到意想不到嘅災禍時，可以保護自身安全
- 大眼睛：環顧四周，多加注意，就能作正確嘅判斷
- 笑臉：彼此和藹可親，生意興隆
- 酒瓶：表示力求以德待人
- 帳簿：信用第一
- 大肚腩：保持冷靜和大膽
- 金袋：財運
- 粗尾巴：做任何事情都要圓滿結束！
滋賀縣甲賀市信樂町、京都府嵐山嵯峨野觀光小火車嘅保津峽站等地，都可以見到狸貓擺設， 遇到嘅話，記得要影相留念喔！
達摩不倒翁：除厄運、避免疾病和災難嘅吉祥物
「達摩不倒翁」即使跌倒亦能馬上起身，因此含有「七轉八起」（跌倒七次，就要爬起身八次）」嘅寓意，成為生意興隆、開運成功等吉祥物而聞名。
據聞達摩嘅原型為印度出身嘅佛教僧人「達摩大師」（又稱為達磨大師），出生於1600年前嘅南印度甘吉布勒姆（香至國），出家後以「菩提達磨」僧名修行。後來前往中國，係弘揚禪宗文化基礎嘅人物。
「緣起達摩」嘅發源地，係位於群馬縣高崎市「少林山達磨寺」。據聞達磨寺嘅東嶽和尚，向苦於饑荒嘅農民山縣友五郎傳授達摩不倒翁嘅製作方法，為「緣起達摩」嘅由來。高崎不倒翁嘅特徵係「眉毛如鶴，鼻到嘴之間嘅鬍鬚如龜」，將具有吉祥、長壽含意嘅兩種動物表現於臉上。達摩不倒翁被塗成紅色嘅理由眾說紛紜，其中一說係因為作為其由來嘅達摩大師和高僧，穿著緋紅色嘅法衣，以及包含「避邪」等意思。另外，親自為達摩不倒翁點睛係含有「將心眼打開嘅表現」。
想買日本嘅達摩不倒翁做手信嘅話，小編推薦前往位於達摩信仰發源地嘅奈良縣「片岡山達磨寺」和群馬縣高崎市附近嘅手信舖喔！另外，可以從東京輕鬆到達嘅川崎大師仲見通等地，亦有達摩不倒翁專賣店，有興趣嘅話就千祈唔好錯過啦！
木芥子：求子、祈求孩子健康成長嘅吉祥物
「木芥子」係傳統工藝品嘅木製人偶，為求子、祈願孩子成長嘅吉祥物。江戶時代末期，於東北地區嘅溫泉地，以木芥子作為當地特產，製作提供畀前往溫泉療養嘅客人，此舉為其由來。另外，關於「木芥子」嘅日文平假名「こけし」嘅由來，其實係於1940年喺鳴子溫泉舉辦嘅「東京木芥子會鳴子大會」上，聚集多位木芥子職人和相關人員，並決定統一「こけし」作為日文嘅正式稱呼。
遠刈田、鳴子、土湯溫泉3個地區，作為「三大木芥子發祥地」而聞名，每個地區所傳承嘅形狀、花紋、技法等都各不相同。
Comments