JR京都伊勢丹地下1樓美食樓層擴增空間，全新裝修咗啦。喺2018年12月5日（三）新開幕。全新嘅美食區以「Culture Foodie」為概念，重視京都特有嘅感性，追求提供各種各樣嘅精美商品，希望帶俾大家前所未有嘅價值感受，就等我哋從美食開始盡情感受日本文化嘅美麗。到底全新裝潢、擴增空間嘅美食樓層有啲咩唔同？快啲同小編一齊嚟搶先體驗睇睇啦！
體驗型態內用區「TASHINAMI」
嚟到日本，除咗行藥妝店、超市，仲有一個樂趣就係行百貨公司嘅地下美食樓層。而JR京都伊勢丹全新開幕嘅美食樓層所提供嘅商品多采多姿，多到令人眼花撩亂。行咗一圈之後，反而更加煩惱要買邊個先至好呢？推薦體驗型態嘅內用區「TASHINAMI」俾大家，話唔定你都可以搵到鐘意嘅商品吖。體驗型態嘅內用區「TASHINAMI」分為兩區，「菓子TASHINAMI」同「酒TASHINAMI」，呢兩區定期更新菜單，提供所推薦嘅嚴選菜色，俾大家品嘗。
「菓子TASHINAMI」唔單止提供精緻細膩嘅和菓子，仲有好多可愛嘅西式甜品。配搭日本茶、咖啡同紅茶等飲品一齊享用，享受甜品同飲品嘅完美結合。
「酒TASHINAMI」呢區會定期推出當季嘅美酒，同京都為主嘅老店料亭、酒店旅館、餐廳等佳餚一同品嘗。對於觀光客嚟講，平時唔係太容易入去日本料亭用餐，而喺呢度可以小嘗料亭手藝嘅美味，非常推薦。隔離嘅賣場仲可以直接購買到喺「酒TASHINAMI」所品嘗嘅美酒。呢度集結咗京都至日本全國各地嘅日本酒，仲有世界知名嘅葡萄酒，種類繁多，另外仲有利酒師常駐喺呢度，關於酒類嘅任何知識都會俾到你專業嘅回答。
全新品牌嶄新登場、仲有眾多日本初登陸嘅店家
眾多全新品牌喺JR京都伊勢丹嘅「Culture Foodie」出展。秉持傳統味道，以嶄新嘅創意構想，將和菓子嘅味道提升至另一個層次，宛如全新世界嘅新感受。單單只係欣賞呢啲商品嘅包裝外觀，睇到都好開心啦。
同一般常見嘅蕨餅唔同，簡直好似果凍一樣，色彩鮮豔，時尚指數滿分。
超級可愛嘅棉花糖。有櫻餅、黑糖黃豆粉等各種口味。就連平時唔係好食棉花糖嘅小編都俾佢誘惑咗。
日式傳統羊羹睇上去好似迷你蛋糕咁，件件精美可愛。居然仲有醬油丸子口味嘅奶油夾心餅乾，好得意吖。
無論係日式和菓子、西式蛋糕甜品，各種各樣嘅甜品點心應有盡有。想探索新奇有趣嘅甜品，一於嚟JR京都伊勢丹啦。視覺味覺嘅雙重享受，一齊嚟發現甜品嘅新世界啦！
京都先有嘅「世界價值」7大品牌
除咗法國本店，呢間「La Sablésienne」常設專櫃係海外第一間分店，餅乾嘅包裝充滿法國風格，超級可愛！使用百分百自然發酵奶油、無添加任何防腐劑同色素、散發奶油本身嘅香氣。
「HOLLANDISCHE KAKAO-STUBE」係喺德國擁有100年以上歷史嘅老品牌。除咗經典原味嘅年輪蛋糕之外，仲推出咗JR京都伊勢丹限定嘅抹茶年輪蛋糕。抹茶控嘅大家，絕對唔可以錯過呢份美味。
喺京都經營咗300多年歷史悠久嘅老店一保堂茶舖，長久以嚟深獲京都人喜愛，非常出名。呢度有販賣茶具組，好適合買嚟當做手信帶返去！
1988年喺巴黎開設咗第一間店「JEAN-PAUL HÉVIN」講究食材同味道，所販賣嘅朱古力宛如一件又一件精緻嘅藝術品。京都地區限定嘅馬卡龍仲使用咗一保堂茶舖嘅焙茶，可以品嘗到日式和風嘅美味。
喺「La maison JOUVAUD」呢間café， 好好享受美味嘅甜品時光啦。JR京都伊勢丹仲推出咗全新限定口味嘅蛋白霜麵包。同時店內仲提供咗各式各樣嘅蛋糕甜品，真係睇到心花怒放。感覺喺呢度，可以好好體驗一吓貴婦般奢侈慵懶嘅下午茶時光。
除咗甜品之外，麵包種類豐富，令人大飽口福
JR京都伊勢丹全新擴增、全新裝修咗嘅美食樓層，唔單止提供得意又好味嘅甜品點心、就連麵包種類都好豐富，滿足你嘅口腹之慾。從深受京都人愛戴嘅烘焙麵包店、到正宗法國口味等等，集結咗六大烘培麵包品牌，仲設置咗期間限定嘅「麵包SPOT」，每個禮拜更換當季美味同最新流行嘅麵包口味。
景點資訊
- 名稱：JR京都伊勢丹
- 地址：京都府京都市下京區烏丸通塩小路下る東塩小路町
- 交通方式：JR、近鐵、地下鐵「京都」站直通；鄰近JR京都站西口
Comments