日本嘅秋季氣候宜人、少落雨，仲有好靚嘅紅葉可以睇到，係最適合旅遊嘅季節嚟㗎！日本國土狹長、南北温差大。秋季時，有啲月份北邊已經落緊雪，但喺南邊仲可以著短袖添！咁呢個時候各地嘅平均温度又係點呢？喺各個月份旅行時穿著又有咩建議呢？同埋又有啲咩必備小物呢？一齊嚟睇吓以下嘅介紹啦。
日本秋季穿著
秋高氣爽、唔凍唔熱，啱唒去show吓你對潮流嘅品味，盡情做各種衣著搭配。所以要捉緊呢個機會扮靚靚，去多啲景點影靚相啊！不過同時，呢個季節嘅氣温都係瞬息萬變。除咗喺出發前要事先查好目的地嘅氣温之外，頸巾、羽絨等等可以禦寒嘅保暖衣物就梗係唔少得啦。而喺日本氣象廳嘅網站度，就可以check到各個地方嘅週間天氣報告，可以用嚟作為打包衣服嘅參考㗎。
日本各地氣溫同氣候
東京秋季平均氣溫
- 9月 平均氣溫 24.4℃ (平均最高27.9℃/平均最低21.5℃)
- 10月 平均氣溫 18.9℃ (平均最高22.4℃/平均最低15.9℃)
- 11月 平均氣溫 13.5℃ (平均最高17.1℃/平均最低10.2℃)
札幌秋季平均氣溫
- 9月 平均氣溫 18.8℃ (平均最高23.1℃/平均最低14.9℃)
- 10月 平均氣溫 12.1℃ (平均最高16.3℃/平均最低8℃)
- 11月 平均氣溫 5℃ (平均最高8.5℃/平均最低1.6℃)
仙台秋季平均氣溫
- 9月 平均氣溫21.4℃ (平均最高25.2℃/平均最低18.2℃)
- 10月 平均氣溫15.7℃ (平均最高19.9℃/平均最低11.9℃)
- 11月 平均氣溫9.7℃ (平均最高14℃/平均最低5.7℃)
金澤秋季平均氣溫
- 9月 平均氣溫23.4℃ (平均最高27.5℃/平均最低20.1℃)
- 10月 平均氣溫17.7℃ (平均最高21.9℃/平均最低14℃)
- 11月 平均氣溫11.9℃ (平均最高15.8℃/平均最低8.2℃)
京都秋季平均氣溫
- 9月 平均氣溫 24.6℃(平均最高29.5℃/平均最低20.8℃)
- 10月 平均氣溫 18.6℃(平均最高23.5℃/平均最低14.5℃)
- 11月 平均氣溫 12.4℃(平均最高17.2℃/平均最低8.4℃)
福岡秋季平均氣溫
- 9月 平均氣溫 24.9℃(平均最高28.9℃/平均最低21.9℃)
- 10月 平均氣溫 19.9℃(平均最高24℃/平均最低16.4℃)
- 11月 平均氣溫 14.2℃(平均最高18.1℃/平均最低10.7℃)
那霸秋季平均氣溫
- 9月 平均氣溫28℃ (平均最高30.8℃/平均最低25.8℃)
- 10月 平均氣溫25.8℃ (平均最高28.4℃/平均最低23.7℃)
- 11月 平均氣溫22.6℃ (平均最高25.1℃/平均最低20.4℃)
(資料來源：日本氣象廳 1997-2017年)
東京9月、10月、11月衣著建議
9月些少熱嘅初秋
喺東京嚟講，氣温仲係熱到好似夏天咁，而且呢個時間仲有可能會有颱風。依天氣預報著短袖衫或薄長袖，再可以加上配上夾克、牛仔外套、外搭背心或薄皮褸等。女生趁呢個時候著條長裙或針織長版等款式，男生就著polo衫配羊毛外套等，用多變嘅穿搭展現秋高氣爽嘅涼爽時啦！
10月萬聖節殺到
日本嘅10月就開始有寒意喇，著返件長袖衫或連帽T，外搭件皮褸、及膝乾濕褸等。或者係就咁著件針織衫、薄冷衫等，再擺件薄薄哋嘅羽絨落個袋度，夜晚變凍都唔驚啦。女生仲可以著啲布料厚少少嘅one piece配條中厚嘅襪褲。另外，著對好行嘅boot、唔露腳指嘅鞋，再圍返條綿布頸巾等薄頸巾做造型又可以保暖。
如果喺呢個時候嚟到東京、大阪等大城市，仲可以參加各種萬聖節狂歡party，買套衫扮鬼扮馬應吓景，或者畫個誇張嘅特殊妝，一齊變裝感受吓日本Halloween氣氛啦！
11月小心凍喇
日本11月嘅温度，對香港人嚟講己經係普通冬天嘅氣温嚟㗎喇。但係因為日本比較乾燥，體感温度又無咁低。呢個時候建議著返件保暖嘅發熱衣，配返件冷衫、厚長袖衫等，女生著裙時著埋厚襪褲或鋪綿內搭。著對厚啲嘅保暖boot，或保暖度強啲嘅高筒鞋，入面搭對冷襪等。當然保暖小物例如冷頸巾、手襪、冷帽等都係唔少得㗎啦。
以東京為例，11月中下旬係往年賞銀杏、賞紅葉嘅時節。觀賞紅葉或銀杏時會長時間喺戶外停留吹風，需要注意著夠保暖衣物，避免受寒感冒。
秋季必備小物推薦
1. 小心唔好冷襯感冒！
秋天善變難以預測嘅天氣，正正係感冒流行肆虐嘅時期。除咗要帶足夠保暖嘅衣物去因應臨時大幅降温之外，進出人多擁擠嘅公共場所，好似搭電車時，戴口罩預防傳染感冒都係方法之一。著重個人健康管理嘅日本人，都有好多好用嘅小物，除咗有好多唔同功能嘅口罩，仲有除菌噴霧劑、卡片型、筆型嘅都有，都係啲預防病菌威脅嘅好方法。
2. 提防乾燥
日本喺接近冬季時，空氣漸漸轉乾，尤其喺室外觀光時，皮膚特別容易乾燥，呢個時候記住要用返啲保溼產品，例如護唇膏、hand cream等等。夜晚沖完涼，就好搽返body lotion呀、敷返個面膜幫肌膚保溼補水喇。
3. 小心香港腳！
話就話秋季係著boot展現時尚嘅好時機，又型又帶點可愛嘅boot雖然係好睇，但都可能會唔係好透氣嘅問題，而搞到「有啲異味傳入我的鼻」嘅問題。尤其喺經常需要除鞋入室內地方嘅日本，咁就真係超尷尬喇！不過又唔使咁擔心，喺日本都有唔少呢啲方面嘅產品可以買嚟用。就好似除臭鞋墊、除菌消臭噴霧、備長炭除溼去臭棍等，或係特殊材質嘅珪藻土鞋墊。有好多種唔同款式, 揀款鍾意嘅嚟試吓啦！
Comments