唔知您對上一次，拎住本旅遊書出遊係幾時呢？又或者咁講，您有無試過袋住本旅遊書去旅行？
可能您會覺得大部分人都用緊智能手機，而家明明係一個只要一機在手，就可以喺短短幾秒鐘搜尋得到想要嘅旅遊資訊嘅年代，想查乜都可以請教Google大師，或者喺IG用主題標籤（Hashtag）搜尋就有大把資訊彈出嚟，做乜要特登買本旅遊書呢？如果您有咁嘅諗法嘅話就大錯特錯啦！皆因裏面有唔少書藉先有嘅高價值內容㗎～
喺大家等咗好幾年，終於可以準備再次踏上久別重逢嘅日本旅行之前，不妨先研究一下專業旅遊書，為下個日本之旅未雨綢繆喔。
由FJ員工向專家親自請教！最推薦嘅日本旅行方式~
當您問日本人「講起旅遊書會諗起邊一本？」嘅時候，相信十居其九都會答《RURUBU》（《るるぶ》，由JTB Publishing Co.，Ltd.出版）。RURUBU係一本介紹日本各地「景點」、「美食」、「玩樂」資訊嘅旅遊雜誌，於2010年曾被健力士世界紀錄™認證為「世界上出版數量最多嘅旅遊書系列」。於2022年8月，《Rurubu檀香山'23》（《るるぶホノルル'23》）發行時，更已高達第6,000期嘅紀錄。
有本事出版到咁多本旅遊指南，證明RURUBU絕對係旅行專家中嘅專家。究竟呢位專家所提的嘅旅行秘訣係咩呢？小編即刻同大家分享相關精彩資訊！好想飛日本嘅FUN! JAPAN讀者們，記得要Bookmark低以下介紹嘅旅行新玩法啦。
旅行新玩法①：靠幻想旅行，讓《ONE PIECE》旗艦喺腦海中航行
隔咗咁耐先至可以再次去日本旅行嘅話，東京、大阪或北海道等經典景點與路線雖然都非常吸引，但既然難得久別重逢，不妨試下至今未曾有過嘅新方式去重新認識「日本」呢個國家吧。
喺過去兩年幾未能隨便出國旅行嘅時期，《RURUBU》提出咗一個「幻想旅行」嘅方案，等您可以足不出戶就能體驗得到旅行嘅樂趣。不過，並非指打開 GOOGLE STREET VIEW，移動人仔圖標四處遊蕩嘅意思喔。「幻想旅行」嘅概念係與漫畫世界互相結合，可以前往出現喺作品中，以世界各國作為舞台嘅景點，進行不一樣嘅大冒險。
漫畫《ONE PIECE》於全球60個國家與地區出版，全球銷量超過5億冊，絕對係代表著日本嘅經典作品，相信FUN! JAPAN嘅讀者們亦有唔少《ONE PIECE》迷吧。而《RURUBU ONE PIECE》，正正係為咗紀念漫畫《ONE PIECE》連載超過1,000回而出版嘅旅遊書。
作為出版《ONE PIECE》嘅集英社亦公認嘅合作作品，喺推出《RURUBU ONE PIECE》之前，製作人員重讀並鑽研原作中每一個細節位，收集作者公認曾用作參考嘅地點，粉絲之間嘅情報消息等資訊，甚至嚴謹調較每一個拍攝角度，為求重現出與作品近乎一樣嘅畫面，並向大眾推薦相關景點。
《RURUBU ONE PIECE》搜羅咗日本、美國、意大利、印尼、中國、墨西哥等全球30個國家嘅旅遊景點，會由喺每個島曾出現過嘅漫畫角色，為大家介紹各個與原作非常相似嘅景點，景點相片旁邊亦附有漫畫中相關圖片，等大家可以對比兩者係有幾神似（圖片為作者漫畫家尾田榮一郎公認嘅作品參考地點「意大利威尼斯」）。睇完呢本《RURUBU ONE PIECE》，瞬間有種已環遊世界一周嘅感覺！另外，書中所介紹景點存在於世界各地，如果將來有機會環遊世界嘅話，記得親自去書中介紹嘅景點行個圈喔。
以上嘅旅遊方式，可謂將「旅行」一詞重新定義。不妨試試想像自己加入草帽大家族，與角色們齊齊出發航海，絕對可以感受得到與別不同嘅新鮮感喔。
例如可以飽覽雄偉富士山與松樹林嘅靜岡縣・三保松原，與路飛到達和之國嘅第一個地方——九里濱非常相似。
岐阜縣・白川鄉合掌造聚落亦係作者曾經一遊嘅聖地。除此之外，愛知縣・名古屋城、京都・清水寺等等、日本國内仲有唔少與作品中場景相似嘅景點。即使係粉絲們曾經去過嘅地方，若果以「聖地巡禮」嘅角度再去多次嘅話，映入眼簾嘅景色必定截然不同喔！
故事中尚未完成嘅世界地圖，係由ONE PIECE公式書公認嘅YouTuber和編輯部，根據各種情報資訊為基礎製作，綜合ONE PIECE中出現嘅各個島嶼而創建出「OP幻想海圖（OP妄想海図）」世界地圖。只要有「OP幻想海圖」在手，您就可以輕鬆掌握各個島嶼嘅位置啦！
封面上特別引人注目嘅莫過於由尾田榮一郎先生，親筆書寫嘅標語與簽名。今次呢個極具紀念性嘅合作，喺Twitter上亦成為粉絲們之間嘅人氣熱話。
雖然翻譯版本尚未出版，但係書裡面有超多插圖與相片，粉絲們淨係用肉眼欣賞相關相片，應該就會感到心滿意足！
《RURUBU ONE PIECE》
- 售價：1,100日圓（含稅）
- 頁數：112
- 商品網站： Amazon Japan
旅行新玩法②：有如收集Pokémon全寵物圖鑑！必收藏「御城印」
第2個要介紹嘅旅遊新玩法，就係「收集御城印之旅」喔。
相信讀者們都有聽過，甚至有收藏作為參拜神社和寺廟嘅印證——「御朱印」嘅習慣吧。相反，喺香港「御城印（*1）」嘅知名度，就唔算太高。
御城印嘅起源可追溯至1991年左右，長野縣・松本城向登城者派發嘅「天守閣登城紀念朱印符」。經過20年嘅歲月，現時御城印喺日本全國嘅城堡、城堡遺址內均有販售，當中種類款式更高達1000多種，計落仲多過新一代Pokémon（*2）嘅種類......
*1：到訪城堡時可以購買或拿取嘅登城紀念證明
*2：直至第8代為止。2022年8月為止未發售嘅《Pokémon Scarlet and Violet》除外
JTB Publishing更以席捲日本嘅 「御城印熱潮 」為主題，出版咗呢本《第一次御城印巡禮》（《はじめての御城印めぐり》）旅遊書。
正如書名所指，呢本書嘅主要對象係 「第一次 」購買御城印嘅初學者們。除咗以文字介紹有關城堡嘅基本資訊，仲會以大量照片去介紹每個城堡嘅御城印同埋必睇位，簡直就好似Pokémon圖鑑一樣，令人好想集齊晒佢哋吖。
您除咗可以喺御城印巡禮中，收集自己心儀設計嘅御城印，仲可以好好遊覽城堡與周邊嘅旅遊景點，令旅程更豐富更有樂趣。 例如朝早先去日本三名城之一嘅愛知縣・名古屋城，收集好御城印之後，就去名古屋城旁邊嘅金鯱橫丁嘆個Lunch，之後再去德川美術館或豐國神社（呢度都有御朱印喔），進行一場名古屋歷史景點之旅。
另外，小編亦有撰寫一篇關於御城印歷史、基本資訊等內容嘅文章，想了解更多相關資訊嘅話，可以參考一下呢篇御城印介紹文章喔。
要成為 「御城印達人」，由此時此刻開始亦為時未晚！ 不過要注意唔少御城印都係期間限定發售，只會喺限定登城時期或季節先至買得到，所以要集齊「御城印圖鑑」，可能比起收集Pokémon圖鑑更困難...... 不過，呢個亦係收集御城印嘅樂趣所在！
第一次御城印巡禮
- 售價：1,430日圓（含稅）
- 頁數：128
- 商品網站：Amazon Japan
究竟呢本旅遊書嘅價值係？
現今處於網上資訊發達嘅時代，無論係個人Blog、IG、抑或係互聯網媒體都多不勝數，上網就可以免費搵到一大堆旅遊資訊，點解仲要用錢去買本旅遊書呢？
答案係，旅遊書可以確保您從中得到正確嘅資訊。
首先，旅遊書係由當地在住嘅記者去採訪、拍攝，以及確認每個旅遊景點嘅最新狀況（尤其係東京、大阪等地嘅店舖經常轉換，變化比較大嘅城市）。由於喺發佈店家名稱、地址、營業時間等資訊時亦不容有錯，因此喺書本正式出版之前，相關人員會非常仔細地，根據各個景點進行確認。關於每年出版修訂版嘅「RURUBU」，喺出版前會對每個景點至少進行一次確認。如果加上電話確認嘅話，合計則會進行兩次檢查。假設《RURUBU東京》中有1000個地點，而工作人員需要對每個景點進行兩次聯絡和確認嘅話，就代表淨係聯絡次數就經已超過2,000次，齋諗都令人感到頭痛嘅檢查工作，亦保證讀者們可以得到正確資訊，係非常重要嘅一環。
跨頁地圖亦係旅遊書嘅講究之處。拎上手嘅瞬間，就會充滿一種「我去緊旅行吖！」嘅感覺！
今次介紹嘅係包含《RURUBU東京23》、《RURUBU北海道23》、《RURUBU九州23》在內嘅《RURUBU情報版[國內]》系列。以日本人角度所編輯撰寫嘅旅遊指南書，您都不妨拎上手睇睇？
Comments