日本全國至今仍然保留多座城堡，年中吸引唔少國內外歷史愛好者朝聖。FUN! JAPAN編輯部到目前為止曾經介紹過「【永久保存版】大阪城、姬路城…編輯部細數日本10大必睇名城」、「【日本名城系列】日本全國12座必訪現存天守12城總整理」、「【日本名城系列】姫路城、彥根城、松本城、松江城、犬山城—「日本國寶5城」您已征服幾座？」、「【日本名城系列】夜晚散發動人魅力 耀眼迷人「日本三大夜城」」等文章，內容包含多個城堡所在之處、歷史背景，仲有各式各樣嘅外觀及氛圍。而今次同大家介紹嘅係，就係日本人口中經常提及嘅「日本三大名城」」！
何謂「日本三大名城」？
所謂「日本三大名城」，依時代和定義會有所唔同，但一般嚟講係指名古屋城、大阪城、熊本城。至於未有明確定義嘅三大城，又係點揀出嚟？據聞係由城堡特色以及互相比較之下，以城堡喺日本各地嘅滲透度、知名程度去揀選而成！
名古屋城：「金鯱」遠近馳名
名古屋城喺德川家康嘅天下普請政策之下，於1612年建築完成。名古城又名稱「名城」、「金鯱城」、「金城〕等，因連結式天守閣屋頂正脊上兩端嘅「金鯱」而得名。呢兩尊純金打造嘅雌雄金鯱，據聞係德川家康向大名展示自身天下第一威嚴而製作。
1945年名古屋大空襲之下，大部分建築皆已燒毀，惟其後於1959年重建，而本丸御殿復原工程亦已於2018年完工。現時遊客可於大天守閣1樓至5樓內參觀名古屋城各式各樣展品，金鯱坐鎮嘅天守閣更係日本國內最高級嘅天守閣！
豐臣秀吉據點「大阪城」
豐臣秀吉為咗統一日本而以大阪城作據點，係一座難以攻下嘅巨大城堡，卻喺大阪冬之陣、夏之陣攻陷時所燒毀。1620年德川秀忠下令，重新建造大阪城，總共花費10年重建。由於大阪城喺豐臣時代大阪城跡上頭堆積咗好幾米高嘅填土之上重建而成，因此據聞喺地底極深之處仍埋藏著豐臣時期嘅石垣圍牆呢。
1931年復建嘅天守，作為歷史博物館展出大阪城至今嘅種種歷史。館內除咗展示戰國時代歷史資料之外，仲有豐臣秀吉生涯「佈景太閣記」透視畫等等，能夠詳細了解大阪城歷史。大阪城又名「錦城」，以天守閣為中心嘅大阪城公園種植咗非常多梅花與櫻花，春天成為知名嘅賞花景點，夜晚點燈後天守閣景色更加係著名嘅夜景景點。
熊本地震後維修中－「熊本城」
由豐臣秀吉部下加藤清正耗費7年所建嘅城堡，「熊本城」作為一座難以攻陷嘅名城而聞名。城堡建造時曾改變環繞丘陵一帶嘅河川流向，並以河川為城內護城河嘅巨大城郭，最後於1607年完工。熊本城坐擁稱為「清正流石垣」嘅優美石垣，以及靈活運用自然地形嘅高超築城技術而遠近馳名。
1933年熊本城全域獲指定為史跡，建築物亦被列為重要文化財，惟大部分本丸建築曾於1877年西南戰爭中燒毀，如今大家見到嘅熊本城係1960年天守閣修復後嘅面貌。遺憾地，2016年熊本大地震當中熊本城再次受到嚴重毀損，雖然熊本城天守閣已於2021年6月整體修復完成，但至整體修復完畢為止，預計仍然需要10幾年時間。
除咗三大名城，關於日本城堡嘅三大○○仲有非常多，例如：三大平城、三大連立式天守、三大山城、三大水城、三大湖城等等，今後亦會為大家陸續介紹相關內容！將來有機會去日本嘅話，不妨參考一下，出發一場日本城堡之旅。
Comments