大阪於江戶時代（1603～1867年）因貿易興盛，得以入手大量食材，因而造就當地美食文化蓬勃發展。日本有句形容大阪人熱愛美食嘅俗語「大阪の食い倒れ」，意思係為咗「食」即使傾家蕩產亦在所不惜，可見大阪人對「食」嘅熱愛與追求，今次等我哋齊齊去探索一下，大阪人嘅B級美食啦！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
大阪美味優勢
江戶時代（1603～1867年），大阪憑藉著發達嘅海運，成為物流商業中心，各地食材輕而易舉便可入手，加上大阪灣豐富嘅魚獲，更被美譽為「天下的廚房」（天下の台所），即使係昆布等原產地遠離大阪嘅食材，亦因北前船*航路運行至大阪，進一步造就大阪嘅「高湯文化」。（*北前船：江戶時代中期至明治30年（即1897年），經由日本海往返大阪與北海道嘅商船總稱）
大阪商人眾多，為咗傾生意嘅商人們又點少得高級豐盛嘅美食伴左右喔！因美食需求量大增，而孕育出唔少手藝高超嘅料理達人，另一方面，精打細算嘅大阪人亦追求高CP值，故此又誕生出多款又平又好味嘅當地庶民小食。
大阪B級美食
大阪嘅美食特色除咗高湯文化之外，亦不得不提「麵粉類美食」喔。無論係無人不知嘅章魚燒、關西風御好燒、炸串、烏冬等，都係用麵粉漿蒸煮烤炸，再放上各種配料烹煮而成。當中，麵粉類美食亦會融合高湯文化，於麵糊中加入高湯等，今次小編將會介紹完美融合高湯與麵粉文化嘅大阪B級美食。
章魚燒（たこ焼き）
章魚燒可以稱得上係大阪最經典嘅麵粉類美食，雖然係大家成日聽兼去大阪必食嘅人氣美食，小編亦經過一輪思前想後，最終都係決定將章魚燒列入今次嘅介紹清單，畢竟章魚燒確確實實係大阪人嘅靈魂美食，而且款式口味百變，可謂魅力無窮。今次要介紹嘅係章魚燒創始店「會津屋」嘅章魚燒喔。
「會津屋」（会津屋）總店位於大阪玉出，據說係章魚燒嘅發源店，創始嘅章魚燒其實非常簡單，並無加入華麗嘅醬汁、蛋黃醬、紅薑絲、柴魚片，只有以醬油高湯調味嘅麵糊與章魚粒，無加任何醬汁就已經相當好味道。鐵板燒烤至恰到好處嘅章魚燒，外皮與內餡皆為軟嫩口感，亦係大阪章魚燒嘅一大特色，相反，東京章魚燒食落口感係外脆內軟喔。
章魚燒煎餅（たこせん）
靈魂美食章魚燒嘅另一種食法，就係將章魚燒夾入脆薄煎餅中，加上天婦羅麵衣（天かす、Tenkasu）、醬汁、蛋黃醬等配料後，成為超級大阪風零食「章魚燒煎餅」。
章魚燒煎餅誕生於昭和40年代（1965年～）大阪南部嘅岸和田，有一間位於課後補習班（学習塾）前面嘅章魚燒店，每日都會湧入大量學生客，生意興隆嘅同時亦造成大批容器垃圾產生，於是店家靈機一觸，以煎餅取代承裝容器，唔單止可以減少垃圾、節省容器成本，更成為廣為流傳嘅章魚燒煎餅。
除咗夾章魚燒，有部分店家仲會加入煎蛋，變成材料超豐盛嘅「雞蛋章魚燒煎餅」（たまごたこせん），當章魚燒賣晒嘅時候，也會單賣「雞蛋煎餅」（たまごせん）喔。
魷魚燒（いか焼き）
就咁望日文「いか焼き」（ikayaki），可能會以為只係單純嘅燒魷魚，咁你就太睇小大阪呢個麵粉美食王國啦！「魷魚燒」係於高湯麵糊中混入經已切碎嘅魷魚，平鋪於鐵板上煎烤後，搽上醬汁後再對摺成半月型，大阪嘅「魷魚燒」就大功告成！柔軟嘅餅皮加上彈牙嘅魷魚，口感極佳！
不過，至今仍無法確定魷魚燒到底係幾時出現，據說一開始係出現於住吉大社中嘅攤販喺1957年梅田阪神百貨開店後，人氣瞬間爆增！一躍成為阪神名物，亦令到魷魚燒嘅美味開始傳遍大街小巷。
腐皮烏冬（きつねうどん）
喺日本嘅烏冬或蕎麥麵店見到餐牌上寫著「きつね」（kitsune）嘅話，意思即係「炸腐皮」，皆因炸腐皮係狐狸心儀嘅食物而被命名為「きつね」（kitsune）喔。
明明日本到處都有腐皮烏冬，點解會成為大阪嘅B級美食？因為腐皮烏冬正正係誕生於大阪！據說最早提供腐皮烏冬嘅店家係位於大阪船場，創業於1893年嘅「松葉家」（現為UNAKIMI亭MATSUBAYA「うさみ亭マツバヤ」），店家原先只係提供單點嘅腐皮，但發現唔少客人都會直接加入麵中享用，於是順勢推出腐皮烏冬。
烏冬亦係一款可以一嘗大阪「高湯文化」嘅推薦美食，簡單一碗腐皮烏冬，並無加入其他配料，用嚟決勝負嘅就係店家自豪嘅高湯。小編建議不妨走訪多幾間店家，品嘗多幾碗腐皮烏冬，好好享受出自於不同店家嘅美味高湯吧。
炸牛腸烏冬（かすうどん）
如果話腐皮烏冬係簡單嘅美味，咁炸牛腸烏冬就係簡單兼「粗暴」嘅美味。所謂嘅炸牛腸（かす、kasu），係大阪東南部南河內嘅鄉土料理，將牛腸等內臟以低溫長時間油炸，將多餘脂肪逼出後嘅內臟，講得直接啲其實係「炸牛腸渣」，外脆內軟嘅口感令人不禁食上癮。
口味優雅嘅烏冬放上一大把炸牛腸，既簡單又粗暴嘅組合，簡直令人一試難忘！難怪會成為現今大阪嘅經典烏冬口味之一。
肉湯（肉吸い）
其實正確嚟講應該係「牛肉烏冬走烏冬」，呢個咁神奇嘅點餐組合係嚟自日本「吉本新喜劇」嘅搞笑藝人「花紀京」，1980年代後半，花紀京去到難波千日前嘅烏冬店「千とせ」（chitose）用餐，但因宿醉無乜胃口食唔到太多，於是向店主嗌咗碗「牛肉烏冬走烏冬」，店主當時亦乖乖照整，結果所端出嘅肉湯大受好評，甚至被知名搞笑藝人「明石家秋刀魚」等人於電視節目上大為宣傳，自此成為新一代國民美食。
但可能淨係得肉湯係唔多夠，所以大部分人都會點多碗生雞蛋撈飯，有部分店家仲會喺肉湯裡面加豆腐、雞蛋等配料。
Comments