【日本美食】地道B級美食巡禮「北海道」〜道北、道東篇〜

擁有各種新鮮兼高品質食材嘅北海道，當地美食嘅滋味程度絕對係無庸置疑。每當提到日本最「好食」嘅都道府縣嘅時候，北海道絕對係前三名位置。湯咖喱、成吉思汗烤肉、海鮮、奶製品等等都係大家眾所皆知嘅北海道美食，但其實面積廣闊嘅北海道，各區風土⺠情亦有所不同，因此各區嘅當地美食亦各具特色。今次就等我哋齊齊去探索一下，北海道各地嘅B級美食啦！

何謂「B級美食」

除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。

北海道美食優勢

北海道位於日本最北端，係全國面積最大嘅行政區，本島土地總面積約為7萬8千平方公里（不包括離島）。由於北海道面積相當廣闊，所以根據唔同區域，自然環境及氣候亦完全唔同。有著咁得天獨厚嘅先天環境條件，難怪可以孕育出種類繁多嘅農產品，唔單止係產量多兼好食，品質亦極具保證！

北海道B級美食

湯咖喱、成吉思汗烤肉、海鮮、奶製品等等都係北海道嘅代表性美食。北海道喺地理上一般會被分為道北、道東、道央、道南4個地區，各地區嘅B級料理亦各具特色，本篇文章會為大家介紹道北、道東嘅B級美食。

道北。主要地區：稚內、旭川、美瑛、富良野

旭川「旭川醬油內臟拉麵」

昔日嘅旭川市養豬業興盛，食用內臟（ホルモン）一事可謂相當常見，當地更加有唔少內臟愛好者！唔知大家有無聽過「鹽烤內臟」呢？「鹽烤內臟」以鹽調味再燒烤享用呢個食法，其發源地就係旭川。當中，不得不提呢款當地特有嘅「旭川醬油內臟拉麵」（旭川しょうゆホルメン），除咗有筍、叉燒等旭川醬油拉麵常見配料，仲會加入炒過嘅內臟，係熱愛內臟地區先至打造出嘅代表性美食喔。

旭川「魷魚鬚丼飯」

先將魷魚鬚裹粉，以平底鍋仔細油炸之後，再將魷魚鬚起鍋，放喺熱騰騰嘅白飯上，淋上醬汁之後就成為「魷魚鬚丼飯」（ゲソ丼）。據聞呢款美食源自於昭和56年（1981年），當時「立食蕎麥麵 天勇」嘅老闆利用姊妹店「壽司屋 天勇」所剩底嘅大量魷魚鬚備料，靈機一觸下平民美食就此誕生。

美瑛「JUN DOG」

發源於美瑛町嘅B級美食，「JUN DOG」（ジュンドック）簡單嚟講就係洋風飯糰，但由於其外型為長條形，望落就好似美式熱狗一樣。細長嘅飯糰裡面，一般會包住炸蝦、炸雞等等，當然仲有包著熱狗腸嘅經典口味。

富良野「富良野咖哩蛋包飯」

唔好以為呢道菜式聽落無乜特別，好似好普通咁，其實要喺菜單上印上「富良野咖哩蛋包飯」（富良野オムカレー）係需要符合好幾樣條件喔。除咗飯、蔬菜、雞蛋、肉類、醃漬物等等嘅每一樣食材都必須要係富良野出產之外，使用嘅牛奶品牌僅限定「富良野牛奶」（ふらの牛乳），蛋包飯售價須控制於未稅1,100日圓以下，而且喺蛋包飯嘅中央位置必須插上證明旗仔，先至係名符其實嘅「富良野咖哩蛋包飯」！

道東。主要地區：根室、釧路、帶廣、網走

根室「escalope」

名為「escalope」（エスカロップ）嘅美食發源地為根室，係一款於番茄醬或牛油飯上放上炸猪扒，再淋上多密醬（demi-glace sauce）嘅菜式。「escalope」一詞源自於法文，意思係指薄切肉片，為咗可以加速烹煮時間，根室「escalope」嘅炸豬扒亦比一般日式炸豬扒薄。根室「escalope」根據飯嘅種類，可分為「紅esca」與「白esca」，據聞最初誕生時係使用番茄醬飯嘅「紅esca」，但現時以使用牛油飯嘅「白esca」比較受歡迎。

釧路「炸豬扒意粉」

「炸豬扒意粉」（スパカツ）被譽為釧路市民嘅靈魂食物，幾乎喺釧路市嘅每一間餐廳都可以品嘗得到。「炸豬扒意粉」誕生於1950年代，起源於釧路市餐廳「泉屋」，當時嘅釧路市，雖然西洋飲食文化尚未普及，但係「泉屋」務求令客人可以品嘗到一款食到最後一啖都可以感受到熱騰騰嘅好滋味美食，因此就創作出呢款「炸豬扒意粉」。

釧路「秋刀魚卷」

呢款「秋刀魚卷」（さんまんま）係一道將經已用醬汁浸泡入味嘅秋刀魚，放上煮好嘅飯上面，再用炭火燒烤嘅菜式。燒烤過程中，秋刀魚嘅油脂會慢慢滲出，每一滴美味都被飯粒所吸收，製成將秋刀魚嘅美味濃縮至極致。

網走「網走最寄鍋」

「網走最寄鍋」係使用鄂霍次克海所產嘅三文魚等海鮮所製作而成嘅網走當地鍋料理（「最寄」一詞嚟源自於當地嘅「最寄貝塚」）。「網走最寄鍋」（網走モヨロ鍋）亦有嚴格規定，除咗需要使用網走當地食材，甚至連湯底、鍋具亦有所指定，菜式主題亦必須與神秘嘅「鄂霍次克人」有所關聯。

北見「鹽味炒麵」

北見市嘅洋蔥生產量係全日本第一，當中「鹽味炒麵」（塩やきそば）就係使用當地特產嘅洋蔥，與各式各樣嘅豐富海產所製作而成。相比起一般充滿醬汁風味嘅日式炒麵，鹽味炒麵除咗指定以鹽作調味，仲一定要用鄂霍次克海所產嘅帆立貝。另外，仲有一個重點就係上餐時會準備好「魔法之水」（帆立貝高湯），試想像一下淋上魔法之水嘅瞬間熱氣蒸騰，即刻令您嘅視覺與味覺享受更升級喔！