秋天嘅日本有別於夏天，係大飽口福嘅「食慾之秋」，事關多款食材正值收割時期，零舍新鮮好味道！眾多食材當中，尤其不得不提代表秋之味覺嘅代表食材－菇類。無論係冬菇、鴻禧菇、金針菇、杏鮑菇等等，各式各樣嘅菇菇都鮮嫩多汁。今次，FUN! JAPAN「煮編」將為大家獻上一道用上長蔥與菇類所烹調而成嘅焗奶油通心粉，非常適合入秋微涼嘅季節享用，食落零舍好味又溫暖～
長蔥蘑菇焗奶油通心粉材料（2人份）
- 長蔥 2條
- 雜菇（香菇、鴻禧菇、杏鮑菇等等） 200g
- 煙肉（或牛肉煙肉、火雞煙肉） 2塊 (25-30g)
- 通心粉 75g
- 牛奶 500ml
- 濃縮高湯粒 1粒
- 芝士（芝士絲）40-60g
- 鹽 少許
- 牛油 30g
- 低筋麵粉 2.5湯匙
- 胡椒粉 少許
長蔥蘑菇焗奶油通心粉做法（2人份）
- 將長蔥斜切成闊1cm嘅片狀。將帶有蒂頭嘅菇類切好之後並切成容易入口嘅大小，將金針菇、鴻禧菇等不帶蒂頭嘅菇類分成一小束，並將煙肉切成1cm闊度大小備用。
- 煮一煲水後落少少鹽，將通心粉放入煲裡面煮。要注意，煮嘅時間要比包裝袋指定時間長少少。通心粉煮好之後，撈起瀝乾水分。
- 於平底鍋放入牛油，開中火加熱融化。放入煙肉與長蔥熱炒，直到長蔥炒至變軟後放入菇類繼續炒，直到炒熟為止。食材全熟兼變軟之後，加入低筋麵粉，繼續攪拌至不見粉粒為止。
- 將牛奶一口氣倒入步驟3嘅平底鍋中，仔細攪拌均勻。煮至沸騰後，將高湯碎粒放入鍋中攪拌，再落1/3茶匙嘅鹽以及少量胡椒粉調味。
- 放入通心粉，為免鍋底燒焦，請邊攪拌邊煮約10分鐘。煮好之後，倒入耐熱容器，灑上芝士絲，放入200℃預熱好嘅焗爐焗10～15分鐘，焗至呈金黃色即大功告成。
Comments