去東京旅行之際想親親大自然，但又怕舟車勞頓會好唔方便？好山好水嘅奧多摩就係您不二之選！
絕對稱得上係東京嘅秘境嘅奧多摩唔單止可以划獨木舟、橡皮艇、行山，仲可以去神秘洞穴進行大冒險！想知奧多摩有咩必玩同必去景點？小編為您嚴選出奧多摩人氣熱話旅遊景點，以及交通資訊等詳細介紹，即刻跟著小編腳步去感受奧多摩嘅魅力所在啦！
點解要去奧多摩？
距離東京市中心約2小時車程嘅奧多摩，屬於秩父多摩甲斐國立公園嘅一部分。除咗景色優美令人陶醉，仲有唔少令人驚喜連連嘅戶外活動可以參加，絕對係動靜皆宜嘅好地方。
奧多摩景色隨著四季變遷呈現出各異風情，一到秋天，由紅色、橙色、金黃色樹葉編織出嘅動人畫面更係一絕。染上一片紅嘅山頭景色倒映於湖水之上嘅優美景致相當吸睛，難怪奧多摩會成為日本人都爭相朝聖慕名而來嘅賞紅葉景點。
幾時去奧多摩暢遊最好？
奧多摩一年四季風情萬種，每個季節都有專屬精彩亮點。秋高氣爽時，遊客可以盡情行山參加戶外活動，又可以順便欣賞浪漫迷人嘅紅葉；春、夏季則可以盡情呼吸山林間清新空氣，體驗各種不同嘅水上活動。如果想玩得更盡興嘅話，推薦您體驗露營，基本上除咗部分需要進行養護或冬季暫停進入嘅區域之外，奧多摩基本上全年都適合去旅遊喔。
奧多摩必玩活動推介
奧多摩嘅大自然美景點多不勝數，除咗睇靚景影打卡呃like相之外，仲有唔少戶外、水上活動可以參加，令您嘅東京之旅更加充實。即刻去睇睇又咩必去必玩好地方喇！
推薦景點1. 奧多摩湖（小河內蓄水池）
小河內蓄水池係日本最大規模嘅飲用水水庫，亦係奧多摩人氣旅遊景點之一。
小河內蓄水池係一個於奧多摩川上修建水壩而形成嘅人工湖，亦稱為「奧多摩湖」，為東京提供高達接近2億噸水量。推薦您可以登上觀景瞭望台眺望眼前一大片奧多摩湖湖景；鍾意邊行邊睇靚景嘅話，不妨考慮行去其中一條可以穿越御岳山岩石公園嘅步道，沿途一邊聽著大自然嘅聲音、一邊欣賞岩石、瀑布、以及潺潺流水所交織出嘅世外桃園美景，非常寫意。
另一個必去景點，就係位於小河內神社附近、奧多摩湖上兩條浮橋之一嘅麥山浮橋，又被暱稱為「油桶橋」。點解會叫做「油桶橋」？皆因早期嘅麥山浮橋真係以油桶所建設而成，雖然而家已經改為由油桶狀嘅塑膠與金屬材質建造，外型依舊獨特非常不可思議。當您喺稍微搖晃嘅麥山浮橋上步行時，少不免會有幾分驚心動魄嘅感覺！第二條浮橋留浦浮橋位於距離比較遠嘅西邊方位，不過搭巴士的話約9分鐘即可抵達。
景點資訊
- 景點名：奧多摩湖（小河內蓄水池）
- 地址：東京都奧多摩町原5
- 交通方式：奧多摩湖位於奧多摩站西南方
景點資訊
- 景點名：小河內神社
- 地址：東京都西多摩郡奧多摩町河內149
- 交通方式：奧多摩站乘搭巴士至小河內神社站落車，位於山之故鄉村附近
推薦景點2. 日原鐘乳洞
日原鐘乳洞係關東地區最大規模嘅鐘乳洞，地底隧道全長800米。當您行入日原鐘乳洞時，眼前由彩色燈光下點亮昏暗洞穴嘅情景，就好似行咗入神秘莫測嘅地底皇宮進行大冒險旅程一樣，處處有驚喜！鐘乳洞內部室溫全年維持於11度左右，出發前建議拎定件薄外套傍身。
景點資訊
- 景點名：日原鐘乳洞
- 地址：東京都西多摩郡奧多摩町日原1052
- 交通方式：JR奧多摩站乘搭奧20往鐘乳洞方線嘅巴士，至鐘乳洞站落車；六日及公眾假期乘搭奧21巴士至東日原站落車。
- 營業時間：
4/1～11/30 09：00～17：00
12/1～3/31 09：00～16：30 - 定休日：12/30〜1/3
- 門票：成人 800日圓
推薦景點3. 奧多摩郊遊踏青推介
奧多摩眾多山峰裡面，當中海拔2,017米高嘅雲取山係東京最高山峰，亦係行山愛好者絕不能錯過嘅日本山岳之一。天氣好嘅話，登山人士可以眺望到富士山與奧秩父山地嘅壯觀景色，秋天則可以欣賞到一大片山毛櫸樹林染上紅燈黃秋葉嘅美景。除咗雲取山，海拔1,531米高嘅三頭山，又或大岳山、川苔山亦相當受歡迎。
奧多摩有一條極受歡迎嘅行山踏青路線，就係全長10.5km嘅「高水三山」路線！高水三山即「高水山」、「岩茸石山」、「惣岳山」3座山嘅統稱，由於3座山相鄰而且山頂距離非常近，行畢全程只需大約3～4小時，非常適合一日遊。想要輕鬆1日攻破3座山頂嘅話，下次不妨挑戰「高水三山」嘅行山路線喇！從境橋巴士站出發嘅「御前山初級行山路線」亦全程僅需5小時，途中可以欣賞到奧多湖與富士山嘅景致。
推薦景點4. 紅葉溪谷
奧多摩被一片雄偉山頭包圍，擁有清澈溪谷等大自然景色，秋天時絕景處處。奧多摩山頭紅葉景致相當夢幻不在話下，不得不提奧多摩湖倒影出蔚藍天空與紅葉嘅鮮明對比景象。
奧多摩範圍咁大，打卡位又點止一個？御岳溪谷擁有清澈蜿蜒溪流，溪谷兩側赤紅、橘黃景色不容錯過，沿途上有一間小澤酒造將為您嘅紅葉散步更添樂趣！另外鳩之溪谷，亦同樣設有紅葉遊步道。
景點資訊
- 名稱：御岳溪谷
- 地址：東京都青梅市御岳 ～ 澤井
- 交通方式：JR「御嶽站」步行約1分鐘
景點資訊
- 名稱：鳩之溪谷
- 地址：東京都西多摩郡奥多摩町棚澤
- 交通方式：JR「鳩之巢站」步行10分鐘
推薦景點5. 各式水上活動
奧多摩擁有天然河流、湖泊、峽谷以及群山等豐富大自然資源，造就出唔少精彩多元戶外活動。例如Gravity 獨木舟學校就為遊客提供獨木舟、SUP立槳衝浪、峽谷運動、泛舟、急流衝浪等等多項水上活動。可能您會擔心會唔會太難handle，又或者新手上路會「好驚驚」？Gravity 獨木舟學校非常貼心地準備好一系列各種程度嘅體驗活動，參加者可以根據自身經驗去參加相關程度體驗，仲有相關裝備出租等服務提供，而且所有活動都可以用團體或個人名義報名。無論您係新手定老手，都可以安心去大玩特玩。
景點名稱
- 景點名：Gravity 獨木舟學校
- 地址：東京都青梅市柚木町3-787-9
- 交通方式：從JR青梅線澤井站徒步約8分鐘
推薦景點6. 山之故鄉村
山之故鄉村係一座位於秩父多摩甲斐國立公園嘅自然公園，亦係另一體驗露營嘅好地方。山之故鄉村佔地廣闊，被一大片嘅青山碧水環繞，而且村內設備齊全，遊客中心、餐廳、工藝教室，以及星空鑑賞、野鳥觀察等等與自然相關嘅體驗活動一籮籮，啱晒發掘更多東京不一樣嘅魅力！
景點名稱
- 景點名：山之故鄉村
- 地址：東京都西多摩郡奧多摩町川野1740
- 交通方式：從奧多摩站乘搭奧09巴士，往鴨澤西方向至小河內神社站落車，徒步約35分鐘
- 營業時間：09：00～16：30
- 門票：免費
從東京出發去奧多摩嘅交通方式
要從東京出發去奧多摩的話，您可以喺新宿站乘搭JR中央線至青梅站，然後轉青梅線至奧多摩站落車後即可到達，車程約2小時、全程車費約1,100日圓。如果您有買JR周遊券嘅話，周遊券亦有包含相關範圍費用，非常抵玩！
如果係週末假日出發嘅話，就可以乘搭「假日快速奧多摩號」，將時間大大縮短至90分鐘。「假日快速奧多摩號」從新宿出發，每日有3個班次，回程終點站係東京站。下個旅程不妨去奧多摩嚟個「森呼吸」，感受一個不一樣嘅東京之旅。
Comments