2016年爆紅動漫電影《你的名字。》上映後，連續四個星期蟬聯日本電影排行榜冠軍，成為討論熱話，更令「新海誠」三個字傳遍全世界。故事講述東京高中生立花瀧與岐阜高中生宮水三葉2位主角雖然素未謀面，卻喺一覺瞓醒之後發現靈魂被交換。隨著劇情發展，動畫帶著觀眾走勻日來全國，而且電影場景更描繪得相當優美逼真，令人好想實際去一探究竟，從此出發一趟《你的名字。》朝聖之旅就成為遊日指定動作。各位又有無去過以下電影真實場景，現場對比一下與動畫場景有咩差異呢？
新宿（東京）
立花瀧係一個普通高中男生，電影情節中立花瀧與三葉交換靈魂時嘅場面令人印象深刻，當中包括立花瀧所就讀嘅高中。立花瀧雖然住喺東京，但所就讀嘅高中學校原型其實並非位於東京，而係遠在廣島嘅學校。由於場景每個細節都勾畫得既真實又細膩，令人對新海誠嘅「神還原」畫功充滿讚嘆聲。
東京新宿區多個著名地標都有出現喺《你的名字。》之中，由人來人往嘅JR新宿站、新宿山田電機LABI顯眼嘅YUNIKA VISION大型電子板、新宿警局附近嘅地下通道，以及高聳嘅NTT DOCOMO代代木大樓（DOCOMO塔），所有現實場景喺動畫中都忠實呈現，鍾意《你的名字。》嘅粉絲絕對要去新宿朝聖一番，一邊回想立花瀧與三葉戲中情節內容，一邊影相留念肯定非常過癮！
糸守町：青島×長野×岐阜構成體
鍾意冒險嘅話，就一定唔可以錯過東京嘅青島，亦係主角三葉嘅家鄉「糸守町」所在地。雖然「糸守町」純屬虛構，但有唔少景色原型都係參考自東京青島。如果要出發去青島，要有心理準備所使用嘅交通工具與路線會比較複雜－因為你需要從羽田機場搭飛機至八丈島，再搭直升機去青島（需要預約）。青島雖然離東京有一大段距離，卻被視為屬於東京嘅一部分。呢個明明遠距離卻又有所牽連嘅關係，唔通就係主角二人會有所聯繫嘅原因之一？！
三葉家鄉嘅巨大湖泊相信係唔少粉絲心目中嘅經場景之一。糸守湖同樣純屬虛構，但參考原型係位於導演新海誠家鄉—長野縣諏訪湖。電影中嘅糸守町雖然係位於日本岐阜縣飛驒，但係就算去到飛驒，亦唔會搵到糸守町呢個地方，但場景確實參考自飛驒市多個地方。當中比較著名嘅有飛驒古川站，飛騨山王宮日枝神社，亦即係糸守町神社「宮水神社」嘅原型所在，有機會記得要去一睹盧山真面目。
最後要介紹嘅地方位於東京，亦係電影中最具指標性嘅地方－通往四谷須賀神社嘅長樓梯。主角二人於此處重逢仲互相詢問對方嘅名字，更出現喺電影最後一幕以及宣傳電影海報當中，絕對係必朝聖經典場景。
東京：
- JR 新宿站
- YUNIKA VISION（新宿山田電機LABI）
- 新宿警局
- NTT DOCOMO代代木大樓（DOCOMO塔）
- 四谷須賀神社
- 青島
長野：
- 諏訪湖
岐阜：
- 飛驒市
- 飛驒古川站
- 飛騨山王宮日枝神社
Comments