從JR舞濱站徒步約8分鐘即達，與「伊克斯皮兒莉IKSPIARI」相鄰嘅「迪士尼大使大飯店」共有504間客房，酒店全館統一採用裝飾風藝術。一走入客房，您就會馬上有如置身於迪士尼明星世界，由充滿迪士尼明星特色嘅可愛明星主題客房，為您送上濃濃迪士尼氣息！今次，FUN! JAPAN編輯部將一口氣公開「迪士尼大使大飯店」嘅所有房型，無論邊間客房都保證會令您大叫「Kawaii！」
米奇客房
呢間以米奇為主題嘅客房，風格以米奇配色佈置，大紅色床單夠晒sharp醒！地毯上印有鞋印，就好似米奇實際喺客房內來回走動咁，而且牆紙上仲有擺出各種表情與動作嘅米奇。咦？細心留意燈罩開關的話，您更會發現呢個形狀似曾相識—呢個咪就係…米奇手套？！
鏡上發現感情要好嘅米奇＆米妮圖案！洗手盤附近畫有可愛米奇插圖，上頭放有米奇獨家隨身收納袋，係只有入住米奇客房嘅房客先可以拎到嘅禮物～
米妮客房
有米奇又點少得米妮！講起米妮，相信好多人都會立即諗起紅色波點花紋。不過呢間以米妮為主題嘅客房設計，則係以米妮初次於螢光幕亮相時嘅造型，所以床單以及地毯都採用水藍色基調，配搭紅色蝴蝶結靠枕，反而更能凸顯米妮嘅存在感。燈罩上嘅開關亦係米妮蝴蝶結造型，牆紙更佈滿各種姿態嘅米妮呢。
洗手盤旁邊嘅牆壁紙採用清爽藍色，上頭印有米妮嘅剪影。浴室門上同樣係大大個米妮圖案，而且米妮客房亦已大家準備咗豐富住宿房客小禮物！米妮客房版本嘅獨家隨身收納袋，上頭係以愛心圖案點綴嘅米妮剪影♪
唐老鴨客房
唐老鴨主題客房以唐老鴨服裝為構思，採用藍色水手服、黃色鴨腳以及紅色蝴蝶結領帶為概念，設計出活潑明亮嘅客房。留意返，床頭板更係唐老鴨大腳！燈罩圖案係唐老鴨頂帽，開關則係帽子緞帶，整間房間都充滿著講究細節。
當然，唐老鴨客房內都放有獨家隨身收納袋，並以紅色蝴蝶結領帶加上黃色鴨掌唐老鴨形象設計，歡迎住宿房客帶返屋企做紀念。而且客房內並唔只有唐老鴨，唐老鴨嘅女朋友黛絲鴨亦有客串其中𠻹！黛絲鴨究竟匿埋喺邊到呢？搵出黛絲鴨亦係住呢間客房嘅樂趣之一！
鋼牙與大鼻客房
呢間鋼牙與大鼻主題客房以啡色為基調打造出溫暖空間，除咗床板上畫有鋼牙與大鼻塊臉之外，床與床之間裝飾著鋼牙與大鼻最鍾意嘅「克莉絲」圖畫，地毯圖案設計更採用佢哋最鍾意嘅橡果圖案。入住呢間客房嘅住客，記得要仔細望一下梳化上嘅靠枕。您有無發現圖案其實就係佢嘅嘅鼻呢？其實呢個亦係大家用嚟分辨鋼牙與大鼻嘅方式之一呢！
廁所門板上畫著刷梗牙嘅鋼牙，浴室門板則畫著正要去沖涼嘅大鼻，就連浴室鏡上都係鋼牙與大鼻嘅圖案！同其他房間一樣，洗手盤放有一款鋼牙與大鼻剪影嘅獨家隨身收納袋，配色跟足客房一樣，都係啡色。
史迪仔客房
客房以迪士尼動畫電影《扮嘢小魔星》為主題，整個空間由融合作品舞台夏威夷與裝飾風藝術而成，例如床頭板描繪著快樂衝浪嘅史迪仔與妮露，而地毯花紋則默默地隱藏著史迪仔嘅腳印。
浴室與廁所門板都用上史迪仔與妮露嘅圖案設計，洗手盤上亦放有一款史迪仔獨家隨收納袋～
明星主題客房之外嘅標準客房
唔單只明星主題客房，其他客房都一樣能夠充分享受迪士尼氛圍！牆紙同地毯等各處都藏著米奇圖案設計，與館內整體設計相映成趣。仔細一睇，床單上都係滿滿米奇剪影圖案，就連牆紙都係大量米奇以及米妮，喺房內搵出匿埋嘅米奇圖案都係一種住宿樂趣！
浴室鏡上出現嘅，就係電影《幻想曲》中登場嘅魔法師徒弟米奇♪浴室同廁所門板上嘅圖案，則係於《幻想曲》中登場嘅魔法掃把。梳洗用備品當然都係印有滿滿迪士尼設計，設計圖案方面，則係於1樓迎賓大堂扮演電影導演嘅米奇以及乘搭飛機翱翔天際嘅米奇好友們。
今次為大家介紹「迪士尼大使大飯店」嘅客房，各位係咪覺得好吸引呢？無論係入住邊一間客房，都可以充分感受到迪士尼快樂氛圍，大人細路臉上都會不期然露出笑容！下一次去日本東京旅行的話，不妨就喺呢間酒店住返一晚啦！
酒店情報
- 酒店名稱：迪士尼大使大飯店
- 地址：千葉縣浦安市舞濱2-11
- 客房數：504間
- 交通方式：JR舞濱站徒步約8分鐘
- 免費wi-fi：有
- 入住時間／退房時間：15：00／12：00
Comments