喺全球都擁有超高人氣嘅東京迪士尼度假區®，唔單只有主題樂園，仲有好幾間迪士尼酒店，無論係咪粉絲都會想嚟體驗住返一晚！今次，FUN! JAPAN編輯部將介紹喺日本第一間開設嘅迪士尼酒店—「迪士尼大使大飯店」嘅觀光特色。
歡迎嚟到迪士尼大使大飯店！
「迪士尼大使大飯店」外觀以藍色與白色為基調，主題為「充滿夢想與羅曼蒂克嘅1930年代美國」，建築外觀與室內裝潢皆採用風靡當時嘅奢華裝飾風格藝術。
一入到正面玄關，首先映入眼簾嘅就係裝扮成電影導演嘅米奇，企喺高挑嘅接待大堂中央。沿著米奇嘅菲林攝影機拍攝方向望去，您會發現天花板上有一幅畫，上頭寫有酒店名稱以及畫有乘坐飛機嘅米妮、唐老鴨、高飛等角色快樂地遨遊天際。據聞，呢幅畫係以「米奇導演正在拍攝乘坐飛機夥伴們」嘅情境為主題呢。
樓高六層及地下一層嘅「迪士尼大使大飯店」共有504間客房、4間餐廳、婚禮顧問坊以及便利店等多樣設施。館內隨處都充滿著迪士尼明星及電影元素，通往宴會廳嘅樓梯以電影菲林底片為設計概念，上頭有往樓梯上跑嘅米奇與米妮，相當可愛。
所有客房都能感受到迪士尼明星就喺您身邊！
「迪士尼大使大飯店」嘅客房配置分成「標準樓層」及「大使樓層」2種。無論係邊種類型嘅客房，住客都能夠感受到迪士尼明星就喺您身邊！入住「標準樓層」嘅房客，會喺1樓大廳迎賓櫃台辦理入住手續；而入住「大使樓層」客房及套房嘅房客，則係到最頂樓6樓嘅「大使休憩廳」辦理入住、退房手續以及在此享用迎賓飲料。入住「大使樓層」嘅客房，更可以享受高人一等嘅住宿體驗呢。
各位如果想要了解更多有關房型嘅資訊，可以click呢邊睇詳細介紹→身處迪士尼明星世界 「迪士尼大使大飯店®」客房大公開
住宿房客限定服務！購買酒店獨家周邊商品及享受遊樂場樂趣
酒店內嘅商店「節慶迪士尼」除咗出售東京迪士尼樂園®及東京迪士尼海洋®嘅部分商品之外，仲有迪士尼大使大飯店先有嘅獨家商品，以及僅限住宿房客先可以購買嘅「Disney Hotel Exclusive 迪士尼飯店住宿紀念商品」。
此外，館內仲有提供小學生以下小朋友遊玩嘅「奇奇與蒂蒂遊樂天地（鋼牙與大鼻遊樂天地）」，整個空間設計超級可愛，亦係僅限住宿房客使用。遊樂場將鋼牙與大鼻嘅世界融入其中，牆紙、天花板以及擺放嘅枱櫈都令人有如走進入鋼牙與大鼻嘅松鼠世界。當住走入樹木之中，您仲會發現裡面都畫有鋼牙與大鼻嘅圖案，彷彿置身於秘密基地裡面呢。
※2021年2月文章刊登時，設施停止開放
滿滿米奇圖案嘅「大廚米奇」餐廳
「大廚米奇」係一間融合日式與西式嘅放題自助餐廳。餐廳最大特徵係「與明星們嘅共餐時光」，客人可以喺場內與迪士尼明星們一齊度過快樂嘅用餐時間。
※2021年2月文章刊登時，明星角色表演暫停
其他特色仲包括提供以迪士尼明星為主題嘅可愛三文治、麵包嘅烘焙坊「滴答餐車 」。每款包點都保證可以影出IG影相打卡吸睛美照，千萬不容錯過！米妮蝴蝶結造型士多啤梨菠蘿麵包及米奇手套造型麵包、米奇臉型香蕉麵包等，淨係睇到咁可愛嘅外表已經叫人忍唔住口水直流！
※2021年2月文章刊登時，只提供外賣服務
交通便利直通兩大園區與綜合商業設施「伊克斯皮兒莉IKSPIARI」
從JR舞濱站徒步約8分鐘即可以抵達「迪士尼大使大飯店」，而酒店所在位置剛好就位於東京迪士尼樂園與東京迪士尼海洋中間，從酒店前往兩大園區時可乘搭免費接駁車，無論要去邊到玩都可以直達，交通非常方便。同時，酒店緊鄰綜合商業設施「伊克斯皮兒莉IKSPIARI」，凡係伊克斯皮兒莉營業時間內，都可以從車站經由伊克斯皮兒莉館內直接抵達酒店呢！
從早到晚都沉浸於迪士尼世界
如果入住「迪士尼大使大飯店」，喺園區玩完成日後，夜晚仲可以繼續徜徉於迪士尼世界中，因此非常適合親子家人、情侶、以及友人們一同組團住宿！鍾意迪士尼嘅朋友們，下次搵住宿時識揀啦！
酒店資訊
- 酒店名稱：迪士尼大使®大飯店
- 地址：千葉縣浦安市舞濱2-11
- 客房數：504間
- 交通方式：JR舞濱站徒步約8分鐘
- 免費wi-fi：有
- 入住時間／退房時間：15：00／12：00
Comments