滾水熝過即可！用保鮮袋做出肉醬咖哩

擺入保鮮袋, 只係用滾水熝過就整得出嘅簡單食譜。將蔬菜切好放入保鮮袋就得喇, 唔洗太多餐具整成, 輕鬆簡單又好味呀! 

請注意用滾水熝時一定要用半透明又烚烚聲嘅觸感嘅保鮮袋呀。(總之係厚身保鮮袋, 唔好太薄啦!)

材料 （2人份量）

• 碎肉（牛肉又得雞肉都得, 揀你鍾意食嘅肉都OK）160g
• 洋蔥 1/2個
• 切好嘅蔬菜（鍾意食嘅蔬菜，紅蘿蔔或青椒都好吖） 適量
• 切碎嘅咖哩塊 60g（4大匙）
• 番茄(細size) 1個 
• 水 80cc

做法

1. 將保鮮袋套落碗，再將全部食材放入去。今次示範嘅蔬菜用咗洋蔥、青椒、仲有茄子。
2. 單手捏緊保鮮袋口，另一隻手揉搓保鮮袋。揉搓均勻之後放走保鮮袋入面嘅空氣，然後將保鮮袋嘅袋口綁緊。亦可以用橡筋綁就安全啲, 唔使驚漏出嚟。
3. 煲好水，將保鮮袋放入滾水之中，閂好蓋，煮20分鐘。熄火, 焗5分鐘，就上得菜喇！ ※依個人喜好，可以放隻溫泉蛋或者九層塔香草(羅勒)上去，增添色彩，等道菜睇起上嚟都pro(專業)啲吖嘛! 

＜隨手附贈教學＞

溫泉蛋嘅做法

1. 拎個鍋仔，加入大量水，煮滾之後熄火。
2. 加入約1大匙嘅凍水，稍微冷卻溫度，然後放入雞蛋，擺佢15分鐘。
3. 將煮好嘅雞蛋放入冷水整凍佢之後就完成㗎喇。