去東京千駄木體驗懷舊風情啦！

去一下東京嘅千駄木體驗其他地方都搵唔到嘅下町風情啦！屬於「谷根千」地區嘅一部分，有好多日式傳統房屋同商店等等，千駄木係感受東京歷史懷舊感最正嘅地方！

關於千駄木

千駄木係東京文京區嘅一個地方。著名嘅「谷根千」地區就係由谷中、根津同千駄木三個地方組合而成。呢個地區喺戰爭期間幸運躲過戰火嘅摧毀，所以可以喺呢度睇到好多傳統日式建築保留落嚟，滲透江戶時代嘅氣氛。

當你到訪千駄木，可以順便去參觀熱門景點嘅根津神社，嗰度有好多美麗嘅紅色鳥居。仲有谷中銀座，呢個係一條傳統嘅日式商店街，並且以貓而聞名！

再行遠一啲，仲可以參觀谷中靈園。可能你唔會將墓地作為旅遊目的地，但喺春天櫻花季，通往墓地嘅主要道路實在係非常美麗。

到千駄木旅遊，記得要去傳統糖果店「Ame細工吉原」呀。呢間店嘅師傅，僅利用剪刀同雙手，就創造出貓、兔、鳥等動物造型嘅糖果，令人驚嘆如此巧奪天工嘅手藝。

呢項係一項傳承咗幾代嘅技能，如果夠幸運，甚至可以喺現場觀賞師傅製作美觀又美味嘅藝術品！

Ame細工吉原嘅營業時間為平日下午1點至下午6點，而星期日同紅日則係上午10點至下午6點。製作糖果嘅Ame細工現場表演至下午5點。請注意商店星期二作休息。

如果想入住傳統日式旅館，我哋建議到千駄木旅遊嗰陣體驗一下。同現代酒店相比，日式旅館更為古典，並提供更輕鬆嘅入住體驗。

千駄木地區我哋推薦澤之屋旅館。呢度係由「澤」嘅家族喺呢個地區由好耐以前開始經營。佢哋提供日式客房，可容納1至3人。

收費取決於一個房間嘅入住人數，但一般從5,600円起到16,900円不等，視人數同房間大小而定, 可以信用卡支付，提供早餐服務（340円），免費Wi-Fi，甚至仲提供單車租借服務！

如果有興趣入住嘅話，建議提前預訂。入住嗰陣，請一定要享受旅館嘅浴池，舒緩旅遊一日落嚟嘅疲勞！

千駄木車站於1969年因東京Metro地鐵千代田線而開通，可由表参道，明治神宮前，日比谷，大手町等電車站轉乘即可輕鬆前往。位於「谷根千」地區, 地點便利，係一個俾你探索谷中、根津同千駄木之旅嘅最佳起點！