相信大家都有聽過「控糖diet」，意思係控制糖分攝取，具體嚟講就係主要食以蛋白質同脂肪為主嘅食物，例如魚類、貝類、豆腐、納豆同芝士等。控制唔食白麵包、白米飯同麵類，或是係零食中好常有嘅含有白砂糖之類嘅精製糖攝取，如果想食炭水化合物時，就要選擇未精製類嘅穀物類（糙米、全麥麵包等）。另外，飲品嘅話，果汁同有糖嘅食品全部唔可以飲。因為想減肥而採用「控糖Diet」嘅人好多，但亦有啲人係為咗想健康而採用。今次就請嚟一位東京OL，分享點樣返工同出街食飯，都以進行控糖Diet。
星期一：喺公司附近嘅型格cafe享用沙律餐
控制糖份攝取，要實行起嚟真係唔容易，白飯、麵包或者麵類都全部唔食得，所以如果出街食飯，就幾乎乜都唔食得。如果係自己帶飯就還好，但要朝早起身整定飯餸都唔容易。所以午餐通常都會去有提供沙律嘅餐廳，或者去便利店買低糖食物做午餐。星期一呢日，就去Cafe食咗個1,000日圓嘅沙律餐，仲有餐湯，食完成身都暖哂，營養又均衡健康。啊！相入面嘅麵包就讓咗畀一齊去食飯嘅同事食。
星期二、三、四都食同一樣嘢？
連公司嘅同事都會覺得驚訝，但我真係每日食同一樣嘅LUNCH都唔會厭。要控制糖份攝取嘅話，揀肉、魚、蔬菜同蛋就實啱，魚類嘅話好難喺便利店搵到，所以午餐就通常好似張圖咁嘅組合。
肉嘅話會揀炸雞，日本便利店嘅炸雞種類好多，對我嚟講係件好事，雖然炸嘢個衣或多或少含有糖份，但就咁少少嘅話，尚可接受啦！蔬菜就會揀凱撒沙律，最近好多沙律會連意粉，當然連意粉嘅我都唔會揀啦。所以扣除跟咗意粉嘅，就只剩返三幾種可以揀，其中我最鍾意就係凱撒沙律！而烚蛋係控制糖份攝取嘅好伙伴，唔單止營養價值高，而且食咗又會有飽肚嘅感覺，撐到夜晚都唔會覺得肚侔，所以有時下晝會食件半熟蛋做下午茶！咁樣全部夾埋先500日圓，係咪好扺又慳錢呢！
工作全部搞掂，較輕鬆嘅星期五就去Cafe！
今次喺公司附近嘅Cafe咖啡廳，點咗勁多蔬菜嘅野菜通心粉套餐，事先確認過有無用砂糖，呢間Cafe樓底好高，所以感覺好開揚舒適。而且播放嘅背景音樂都好正，一邊睇書一邊食Lunch嘅時間都係一個享受！
假日午餐，同朋友去靚餐廳
控制糖分攝取嘅午餐係蔬菜、肉同埋芝士！大家記得嗎？哈哈！我鍾意呢間餐廳嘅沙律，因為加咗大量火腿絲同埋芝士。假日樂趣之一，就係由中午開始就飲少少酒，紅、白酒類等無加糖份，同啤酒、Cocktail或者日本酒比起嚟，係更好嘅選擇，而且紅、白酒同芝士好搭，所以我一直都係揀紅、白酒。今次就揀咗Chardonnay白酒嚟品嚐！
呢篇「控糖DIET」嘅東京OL分享你鍾意嗎？大家中午都會食乜嘢呢？可以同我地分享吓啊！有乜嘢美食推介，或者大家嘅公司附近有乜嘢午餐選擇呢？我地好期待您嘅分享！
Comments