2023年1月新開幕嘅東京新景點「羽田機場花園(Haneda Airport Garden)」可謂魅力沒法擋！即使唔係要去搭飛機，都令人好想去羽田機場大玩特玩。
呢個新開幕嘅「羽田機場花園 (Haneda Airport Garden)」商業設施除咗有購物區、仲有可以飽覽富士山美景嘅天然溫泉、以及日本最大嘅機場酒店，真係超級多精彩位！加上直通羽田機場第三航廈，相當方便，絕對係你下個東京之旅必去嘅好去處！
※文中所提及嘅商品及其價格 (含稅)皆為2023年2月採訪時內容。因可能會出現變動，有關詳情請於各店家官方網站確認。
直通羽田機場嘅最新旅遊景點「羽田機場花園 (Haneda Airport Garden)」3大精彩位
位於羽田機場嘅大型商業設施「羽田機場花園 (Haneda Airport Garden)」於2023年1月正式開幕。
從京濱急行線、東京Monorail「羽田機場第3航廈」站徒步約1分鐘即可抵達，更直通2樓嘅國際線抵達大廳，地理位置優越。
由於從機場即可直達，令你可以喺上機前或抵達日本後嘅空餘時間過得更充實。
除咗位置優越之外，仲有一點非常加分，就係營業時間較短嘅店收舖後，部分餐飲店仍會營業至晚上10點或11點，溫泉設施更加係24小時開放。即使你係深夜抵達羽田機場，亦唔洗擔心無旅遊景點去啦。
另外，亦設有巴士總站、餐廳區、購物區、酒店、天然溫泉等設施配套，令旅客唔係齋等航班飛行，仲可以滿足埋「食」、「玩」、「住」等各種觀光需求。「羽田機場花園 (Haneda Airport Garden)」真係一個東京旅遊嘅好幫手喔！
羽田機場花園 (Haneda Airport Garden)精彩位①：購買日本手信的購物區
以下落嚟要為各位介紹「羽田機場花園 (Haneda Airport Garden)」3大精彩位！首先出場就係，想揀手信返香港，就絕不可錯過嘅購物區！當中，可以入手得到極具日本特色嘅手信，與第三航廈相連嘅「Japan Promenade」，就絕不可錯過！
能夠購買日本各地手信的「日本長廊 (Japan Promenade)」
穿過閘口，就可以見到「日本長廊 (Japan Promenade) 」，迎接你大駕光臨。
當中，除咗有販售和菓子、日式雜貨等12間店舖，仲有提供宇治抹茶甜品和魚定食嘅3間餐廳，其中有8間店舖係首次進駐東京。另外，一大片玻璃窗嘅設計讓陽光穿過玻璃窗，增添不少時尚感。大家絕對可以搵到淨係喺度先至買得到嘅東京特產和日本商品喔。
猶如鳥居設計為特徵的「羽田參道」
當你走過「日本長廊 (Japan Promenade) 」，跟住落嚟會見到「羽田參道」嘅入口。正如其名，以多個鳥居重疊嘅設計理念，令人經過「羽田參道」就會聯想到神社嘅鳥居。
呢度有提供日本酒、和菓子、筷子、餐具等各種商品嘅17間店舖，非常適合各位嚟尋找日本手信喔！
可尋找實用的旅遊小物件或服裝的「羽田精選 (HANEDA COLLECTION)」
享受完「羽田參道」嘅日本文化之旅後，可以前往對面嘅「羽田精選 (HANEDA COLLECTION)」。
呢度係一個經過精心設計嘅空間，販售各種旅行必備嘅時尚小物、美容用品和化妝品。你可以喺度買到恤衫、眼鏡、帽、手錶，或一整套嘅時尚配搭。甚至可以入手得到智能手機配件，一站式解決你旅遊時嘅需求。
集結日本美食餐廳的「羽田美食精選」&「大江戶美食廣場」
「羽田美食精選」可以享受到日本各地多款美食，當中包括銀座嘅排隊名店，人氣烏冬店「五代目 花山烏冬」、以及有超過90年歷史，由鰻魚批發商所經營嘅「鰻魚四代目菊川」等具口碑名店。
羽田機場花園 (Haneda Airport Garden)精彩位②：能飽覽富士山美景的溫泉設施「泉天空之湯 羽田機場」
如果你去到「羽田機場花園 (Haneda Airport Garden)」就一定要去埋位呢個溫泉設施「泉天空之湯 羽田機場」。繼愛知縣中部國際機場、北海道新千歳機場之後，第3個直通機場嘅溫泉設施，全國僅有，相當罕見喔。
該溫泉設施位於建築物嘅最上層，面積約2,000平方米，可以欣賞到唯有喺羽田機場先至體驗得嘅絕景！
男湯名為「銀翼之湯」，可以觀賞到飛機嘅起飛降落，而女湯名為「富士見之湯」，可以欣賞到多摩川，天氣好嘅時候甚至可以眺望得到富士山。機場四周並無高樓大廈嘅位置優勢，令你可以用最佳視野去飽覽眼前美景！
溫泉使用地下約1,500米嘅自家源泉，有效治癒手腳冰冷、能恢復疲勞，亦具有保濕、保溫性等功效。
館內提供租借衣物、毛巾服務，以及各種洗漱用品，因此無論何時都可以兩手空空去浸返個靚溫泉。另外，仲有提供2種唔同嘅桑拿、3種唔同嘅岩盤浴，可以充分療癒旅途中嘅疲勞！
泉天空之湯 羽田機場
- 營業時間：24小時 (10:00〜13:00無法入浴)
- 休館日：不定期
- 費用：成人4,800日圓，兒童2,000日圓 (包括毛巾、浴衣和岩盤浴)
- 官方網站：https://www.hvf.jp/chi/hanedaairport-grand/spa/
羽田機場花園 (Haneda Airport Garden)精彩位③：直通機場的2大型酒店「Hotel Villa Fontaine Grand/ Premier」
對於早晨或深夜航班嘅乘客而言，從機場直達嘅酒店絕對係一個非常方便嘅選擇。
位於「羽田機場花園 (Haneda Airport Garden)」嘅「Hotel Villa Fontaine Grand」和「Hotel Villa Fontaine Premier」呢兩間酒店皆可從機場直達，只要穿過2樓「日本長廊 (Japan Promenade)」即可抵達。唔使搭電車或巴士，便可輕鬆前往機場。即使喺落雨天或攜帶大量行李嘅情況下，亦可以輕鬆暢順地辦理登機手續。
「Hotel Villa Fontaine Grand」(左) 共有12種房型和1557間客房 (18至42平方米)，而「Hotel Villa Fontaine Premier」(右) 共有6種房型和160間客房 (33至173平方米)，係日本國內客房數量最多嘅機場酒店。可以喺度欣賞到單軌電車和多摩川等機場特有嘅景色。
價錢實惠的羽田酒店？可選「Hotel Villa Fontaine Grand 羽田機場」
從標準雙人房到高級雙床房、高級三床房和傳統日式客房，最多可以容納4位住客。如果以2人住1間客房計算每晚住宿費用嘅話，每人由10,950日圓 (僅限住宿) 起，相當划算。特別適合夜機抵達嘅旅客，絕對係必收嘅心水酒店精選喔。
想住豪華酒店？那選「Hotel Villa Fontaine Premier羽田機場」！
如果你想入住羽田機場嘅豪華酒店，可選被定位為高級酒店嘅「Hotel Villa Fontaine Premier」。除咗設豪華客房外，仲有令人印象深刻嘅豪華大堂、禮賓服務、24小時客房服務、免費提供住客使用嘅健身房等豪華設施，可以令你享受一個極致嘅住宿體驗。
Hotel Villa Fontaine Grand 羽田機場、Hotel Villa Fontaine Premier 羽田機場
- 入住時間：15:00-20:00
- 退房時間：11:00
- 官方網站：
https://www.hvf.jp/chi/hanedaairport-grand/
https://www.hvf.jp/chi/hanedaairport-premier/
究竟喺羽田機場花園 (Haneda Airport Garden)可以買到咩手信呢？
雖然已經介紹過購物區、溫泉設施、酒店嘅相關資訊，但羽田機場花園 (Haneda Airport Garden)其實仲有好多精彩位！你又想唔想知道編輯部推薦嘅羽田手信係咩呢？想知嘅話，就記得睇埋呢個主題文章嘅後續篇啦。
羽田機場花園 (Haneda Airport Garden)
- 地址：東京都大田區羽田機場2-7-1
- 營業時間：
- 【購物、服務】08:00 – 21:00
- 【餐廳、咖啡店】08:00 – 23:00
※部分商店營業時間有所不同。
※營業時間可能會有所變動。最新信息請查閱官方網站。
- 交通方式：從京濱急行、東京Monorail「羽田機場第三航廈」站步行約1分鐘 (從2樓國際線有連接通道直達)
- 官方網站：https://www.shopping-sumitomo-rd.com/haneda/shopping/
Comments