繼「【日本東京】合羽橋道具街推薦購物景點 —「KAPPABASHI STREET」前篇」今次就要為大家介紹合羽橋必去嘅超人氣店舖！徹底分析呢間網羅高達60種、1000件廚刀，以及深受顧客喜愛嘅原創平底鍋等商品，人氣店家「釜淺商店」嘅魅力所在。
「釜淺商店」裝修風格既時尚又精緻！可以喺度搵到心儀廚刀和烹飪器具
當你去到合羽橋道具街（河童橋道具街），一定唔可以錯過呢間成立於1908年、歷史悠久嘅老字號店舖「釜浅商店」！除咗有賣廚刀、鍋具、南部鐵器，仲有平底鍋等各種烹飪器具。唔單止吸引一般普通人，亦受到專業廚師嘅青睞，可謂魅力沒法擋！
「釜浅商店」分為廚刀賣場與烹飪器具賣場兩棟建築，並於2020年完成重建和翻新工程！呢間既時尚又精緻嘅「釜浅商店」，各賣店皆擁有不同魅力，商品琳瑯滿目，今次小編就要帶大家親身了解箇中魅力所在！
釜淺商店 廚刀專賣店：尋找「你想」廚刀必去！網羅高達60種、1000件廚刀任君選擇！
釜淺商店嘅廚刀賣場共有兩層。
1F主要販售西式與日式廚刀以及磨刀石與各種烹飪相關器具；2F則陳列其他款式嘅廚刀，如中式廚刀、切麵刀、吞拿魚刀等。
廚刀可分為西式與日式兩大類。西式廚刀為雙刃刀，專門用於快速切割食材。例如三德刀、小刀等可同時用於切肉、切菜嘅多用途刀具，以及用於切除肉中筋膜嘅筋引刀、將肉從骨頭上切離嘅去骨刀，皆為西式廚刀。
另一方面，日式廚刀則屬於單刃刀。
其特徵係可以美觀地切斷食材而不傷害其纖維，製作「和食料理」時，會因應各用途而使用唔同款式嘅刀具，例如有專門用於切割魚類嘅出刃刀和切刺身用嘅柳刃刀等種類嘅刀具。
釜淺商店1F嘅廚刀會分門別類，放置於展示櫃中，等你可以實際拎上手，感受其觸感和重量，挑選最符合個人需求嘅好刀。
牆壁展示櫃上，更擺放著深受到專業人士和一般民眾喜愛嘅西式廚刀、日式廚刀，等大家可以輕鬆比較得到每把刀嘅刀刃形狀、大小等各種不同地方，亦係其魅力所在之一。
店內桌面為砧板材質，可以拎起心儀廚刀喺上面試切，設計相當貼心。小編喺今次嘅採訪中，亦有遇到正認真試刀嘅外國遊客。
除咗各種類嘅刀具之外，相關配件亦一應俱全。有唔少人會購買附帶磨刀石嘅套裝，以及選購水果刀作手信喔！
走上2F，映入眼簾嘅係中式菜刀，以及只會喺魚市場先至會見到嘅吞拿魚刀。
另外，呢度仲有設置可以俯瞰合羽橋街景嘅休息區，帶埋屋企人同遊嘅旅客們仲可以喺度欣賞街景，稍作休息。
釜淺商店 烹飪器具賣場：玉子燒煎鍋、雪平鍋等，日本特有烹飪器具一應俱全
廚刀賣場旁嘅大樓，就係烹飪器具賣場，自然採光與時尚裝修設計，完全顛覆大眾對「老牌烹飪器具專賣店」嘅刻板印象。
大家對合羽橋廚具專賣店嘅印象，可能係將各式各樣、唔同尺寸嘅商品通通疊埋一齊擺放。不過，釜淺商店嘅陳列方式卻相當注重商品能否一目瞭然、清晰易懂，等客人一眼就可以搵到自己想要嘅商品位置，更可仔細比較各款商品！
進入店舖1F後，首先映入眼簾嘅就係鍋類、平底鍋！
據聞由專業職人親手打造嘅鍋具、釜淺商店原創鐵製平底鍋，仲有日本特有嘅日式玉子燒煎鍋等，皆為店內嘅熱銷商品。
另外，銅製刨刀、鐵盤類亦係人氣商品。尤其係大小尺寸應有盡有嘅鐵盤，吸引唔少人一口氣將唔同尺寸嘅鐵盤通通買返屋企。
樓梯嘅牆壁處，掛滿各式各樣嘅食物料理夾！燒肉夾等料理夾，其設計仲相當貼心，當你平面放置料理夾時，其最前端並唔會觸碰到檯面，超級好用！亦係大獲好評嘅日本製「MADE IN JAPAN」商品之一。
2F則陳設多款專業設備、商業用尺寸嘅商品。如果想親眼睇睇平日難得一見，日本餐飲業嘅專業烹飪設備嘅話，就一定要去合羽橋行個圈啦。
只要消費滿一定金額，拎住護照就可以喺釜淺商店合羽橋店兩間賣場即場辦理退稅手續。另外，店內亦有精通外語（英語、法語）嘅工作人員。詳情請於官網查詢！
店鋪資訊
- 店鋪名稱：釜淺商店
- 地址：東京都台東區松之谷2-24-1
- 營業時間：10:00～17:30
- 定休日：全年無休（年末・年始期間除外）
- 交通方式：東京地下鐵銀座線「田原町」站出站後步行8分鐘；筑波快線「淺草」站出站後步行6分鐘。
※每月最後一日為內部研修日，營業時間至16:30為止 - 官網:https://www.kama-asa.co.jp/en/
Comments