埼玉縣春日部市作為人氣漫畫、動畫「蠟筆小新」嘅故事舞台固然出名，但其實除咗「蠟筆小新」之外，更加係以擁有全世界最大規模嘅地下防洪設施——「首都圈外圍排水道」（首都圈外郭放水路）嘅街道而廣為人知。
「首都圈外圍排水道」位於埼玉縣東部，係為咗減輕受水浸、洪水等災害困擾而建造嘅洪水對策施設。地下林立著多支巨型柱狀嘅「調壓水槽」，就好似地下神殿一樣，充滿著神秘嘅氣氛，喺社交媒體上亦備受矚目。今次，小編會為大家講解「首都圈外圍排水道」嘅必睇位、參觀路線嘅相關介紹喔。
「首都圈外圍排水道」係？
自古以來，地勢較低嘅中川、綾瀨川流域係屬於容易積水嘅地形，經常受到水浸、洪水等災害。為咗防止洪水嘅破壞，地下防洪設施「首都圈外圍排水道」嘅建設工程於1993年開始動工，花費13年時間於2006年全部完工。全長6.3公里、地下深達50米、內徑約10米嘅地下放水隧道連接從各河川引入洪水嘅流入設施、5個豎井、調壓水槽等設備。
據估計，世界上最大嘅地下防洪設施「首都圈外圍排水道」從2006年到2019年嘅12年間，減輕洪水所帶嚟約1,271億日圓嘅損失，有效地保護多項財產與生命，避受洪水災害。
主要設施與防災機制
「首都圈外圍排水道」嘅調整洪水機制主要如下:
- 中小河流嘅洪水從「流入設施」與地下第2至第5個「豎井」流入；
- 通過連接5個豎井，全長6.3公里嘅隧道；
- 流入被稱為地下神殿嘅「調壓水槽」减輕水勢；
- 最後從巨大泵（排水機場），通過排水管，將其排出江戶川。
吸睛位：①巨大豎井「第1豎井」
各豎井深度約70米、內徑約30米，係連美國自由女神都放得入嘅巨大圓筒狀豎井。第1豎井與其他4個豎井唔同，不設「流入設施」，其作用為積存經由隧道從各豎井所流入嘅水，將所積存嘅水流入「調壓水槽」。
參加參觀行程嘅話，可以從上往下俯瞰其神秘光景。從豎井嘅巨大程度，除咗可以想像得到其積存水量，仲可以同時感受此設施於防止水災方面至今為止確實起咗好大作用嘅真實感。
吸睛位：②簡直就好似地下神殿一樣 ⁉ 「調壓水槽」
調壓水槽位於22米深嘅地底，長177米、闊78米。順帶一提，調壓水槽上面嘅地面被建成一個草地足球場喔。
調壓水槽最大特徵係聳立於水槽內各處嘅巨型柱。每條柱長達7米、闊2米、高18米、重約500噸，而且數量竟然有成59條！從下往上望，就好似置身於歐洲古代神話中所登場嘅宮殿一樣，展現於眼前嘅神秘景象，其動人程度足以令人窒息！
另一個備受關注嘅因素係，呢個調壓水槽亦被用作日本歌手嘅MV、電影、電視劇等外景拍攝場地。 例如，喺家喻戶曉嘅名作品「幪面超人」系列嘅戰鬥場面、人氣電影「飛翔吧！埼玉」中，作為埼玉解放戰線嘅秘密基地於劇中登場。
免費入場嘅地底探險博物館「龍Q館」
設於「排水機場」內嘅博物館「龍Ｑ館」，係可以了解有關排水道機能與建設、相片與影像等展示嘅設施。同時，通過模型等展示，可以更快樂更輕易學習各設施與泵嘅結構、由第1至第5豎井去到調壓水槽嘅水流構造等相關知識。
可以參觀「豎井」、「調壓水槽」等「首都圈外圍排水道」嘅參觀行程係？
如果想參觀「首都圈外圍排水道」嘅話，可以從官方網站預約參觀行程喔！除咗可以參觀著名嘅「調壓水槽」，仲可以喺「第1豎井」嘅作業通道俯瞰70米深嘅地底，場面非常震撼！不妨到此一遊，享受一個非日常嘅獨特體驗吧！
參觀行程總共有4條路線，根據唔同嘅路線內容，參觀路線與參加費用亦有所不同。
①葉輪路線（2022年新登場路線）
- 參加費用：4,000日圓
- 路線內容：龍Q館展示室⇒第1豎井⇒調壓水槽⇒最內部葉輪
- ※葉輪運轉中時，會變更為豎井路線
②豎井路線
- 參加費用：3,000日圓
- 路線內容：龍Q館展示室⇒調壓水槽⇒第1豎井
③泵房路線
- 參加費用：2,500日圓
- 路線內容：龍Q館展示室⇒排水機場泵房⇒調壓水槽
- ※2022年11月現正暫停舉行
④地下神殿路線
- 參加費用：1,000日圓
- 路線內容：調壓水槽
※下雨後，設施正在運轉中情况下會變更部分路線內容。
※會於龍Q館展示室說明洪水對策施設嘅概要與構造。
參觀行程可於網站預約，全程皆以日文作口頭說明。為安全起見，喺日文不通嘅情况下，必須帶上可作日文翻譯嘅人士陪同，記得要自行事先安排好喔。
從東京到「首都圈外圍排水道」嘅交通方式
從東京站乘搭「上野東京線」與「東北新幹線」或從新宿站乘搭「湘南新宿線」，到大宮站轉乘「東武野田線（東武都市公園線）」。喺南櫻井站落車之後，從北口乘搭「春日部市Community Bus（春巴士）」或搭的士到龍Q館落車。由於班次唔多，記得要多加注意喔。
景點資訊
- 名稱：首都圈外圍排水道管理支所、莊和排水機場（龍Q館）
- 地址：埼玉縣春日部市上金崎720
- 交通：從南櫻井站北口徒步行約25~30分鐘（約2.3公里），或者乘搭巴士/的士喺龍Q館落車。
- 官網：https://gaikaku.jp/
Comments