【來自編輯部嘅挑戰書】FUN! QUIZ 達人挑戰！自問鍾意日本嘅您可以答啱幾多題？～大阪篇～

大受好評嘅FUN! QUIZ返嚟啦！

根據上次FUN! QUIZ東京篇嘅留言等意見，第2回FUN! QUIZ嘅主角決定係被揀選為「全球最宜居城市（*1）」TOP10嘅大阪！關於奪得2025年世界博覽會主辦權嘅大阪，您又知多少？

事不宜遲，可以趁機瞭解更多關於大阪嘅FUN! QUIZ達人挑戰（大阪篇）正式開始！8條4選1問題，睇吓您可以答啱幾多題～？

*1：源自英國經濟雜誌「The Economist」嘅調查部門「The Economist Intelligence Unit」所發表嘅「全球最宜居城市排行榜2022」。

＜基本情報篇＞首先從大阪基本資訊開始！

Q1：大阪人口總人數排名為日本全國第幾位？

1. 第1位
2. 第2位
3. 第3位
4. 第4位

講起日本兩大城市，可能好多人都會諗起東京同大阪。但如果從人口數目去睇嘅話，您又知唔知大阪排名為第幾位？

Q2：大阪有幾多個機場？

1. 0個
2. 1個
3. 2個
4. 3個

相信唔少去日本旅遊嘅外國遊客，都會有聽過關西旅行嘅必經大門「某」機場大名。但除此之外，大阪內仲有其他您未曾聽過嘅機場存在…？

Q3：直至2022年7月，大阪嘅世界遺產數目係？

1. 0個
2. 1個
3. 2個
4. 3個

有住喺東京嘅FUN! JAPAN員工睇完上次東京篇之後，表示對於東京有2個世界遺產呢件事毫不知情（笑）。

＜旅遊名勝篇＞經典旅遊勝地・人氣排隊名店小知識

Q4：直至2022年7月，作為「日本第一高大廈」而聞名嘅「阿倍野海闊天空大廈」究竟有幾高？

1. 250m
2. 300m
3. 350m
4. 400m

提示：大廈同東京鐵塔差唔多高。如果參考東京篇嘅話，或者可以搵到正確答案？

Q5：關於大阪美食名物嘅問題——大阪內有一間以豬肉包聞名嘅中華餐廳，請問出現喺呢間店名裡面嘅數字係？

1. 99
2. 100
3. 551
4. 888

旅遊書幾乎必定會記載相關介紹嘅超有名店舖，基本上只要係日本人，都一定有聽過呢間店舖嘅大名！

Q6：大阪地標「道頓堀固力果廣告板」嘅設計現時究竟係第幾代？

1. 第1代
2. 第3代
3. 第6代
4. 第10代

雙手舉起、配上自信笑容嘅跑手係固力果廣告板嘅經典設計。但其實您又知唔知廣告板設置後，設計原來亦隨著時代一點一點出現變化？

＜大阪2大美食＞大阪府民亦感到驚訝嘅排行榜2選

Q7：相信大家講起大阪美食，唔少人都會聯想到章魚燒。究竟喺大阪已註冊為「章魚燒店」嘅數目（以平均每10萬人口計算），喺全國排第幾位？

1. 第1位
2. 第3位
3. 第5位
4. 第10位

Q8：承接Q7，御好燒與章魚燒並列為大阪府美食名物。究竟喺大阪已註冊為「御好燒店」嘅數目（以平均每10萬人口計算），喺全國排第幾位？

1. 第1位
2. 第3位
3. 第5位
4. 第10位

章魚燒店同御好燒店喺大阪街頭可謂隨處可見。兩者同樣係人氣經典美食，店舖嘅密度竟然出現如此驚人嘅差距…！？

解答出爐！最緊張嘅對答案時間即將開始

Q1：大阪人口總人數排名為日本全國第幾位？

正確答案：第3位

根據日本總務省統計局所發佈嘅「令和2年人口普查」數據顯示，大阪嘅人口數目約有883萬人，僅次於東京（約1,404萬人）、以及神奈川縣（約923萬人）排名第3位。從數據資料得知，大阪人口數目佔日本全國總人口嘅7%。（順帶一提，大阪府喺全日本都道府縣中，土地面積為倒數第二細嘅行政區喔！）

• 相關文章：【日本47都道府縣特輯：神奈川篇】逃離東京、移居神奈川嘅日本人正激增中！？

Q2：大阪有幾多個機場？

正確答案：3個

包括去關西旅行時，外國遊客必經嘅關西國際機場（簡稱關西機場）在內，大阪府仲有大阪國際機場（伊丹機場）以及八尾機場，總共3個機場。

大阪國際機場（伊丹機場）雖然有「國際」二字，但於關西機場啟用後，變成國內航線專用機場。對於乘搭新幹線、巴士移動嘅遊客嚟講可能會比較陌生。

而另一個八尾機場並無定期運行航線，主要為航空文宣、照片量測，或者由陸上自衛隊、消防、警察航空隊使用，因此喺三個機場之中知名度最低。

• 相關文章：大阪國際機場(伊丹機場)
  

Q3：直至2022年7月，大阪嘅世界遺產數目係？

正確答案：1個

2019年7月，堺市「百舌鳥・古市古墳群」被聯合國教科文組織登錄為世界遺產，自此大阪就擁有第一個世界遺產。

百舌鳥古墓群係指位於堺市內東西、南北約4公里範圍內嘅古墓群，當中嘅仁德天皇陵古墳（大山古墳）與埃及・古夫王嘅金字塔、中國・秦始皇陵並被稱為「世界三大陵墓」。

Q4：直至2022年7月，以「日本第一高大廈」而聞名嘅「阿倍野海闊天空大廈」究竟有幾高？

正確答案：300m

2014年3月開業嘅超高層複合式大廈「阿倍野海闊天空大廈」，樓高300m（地底5層、地面60層），超過當時國內最高嘅橫濱地標大廈（296m），成為「日本第一高大廈」。

不過喺2023年，東京都港區將會誕生一座與東京鐵塔一樣高（330m）嘅超高層大廈。完工後，「日本第一高大廈」嘅記錄又會被更新…

• 相關文章：日本第一高樓：大阪阿倍野海闊天空大廈

Q5：關於大阪美食名物嘅問題——大阪內有一間以豬肉包聞名嘅中華餐廳，請問出現喺呢間店名裡面嘅數字係？

正確答案：551

以提供外賣豬肉包聞名嘅「551蓬萊」一日最大銷售量為13,000個，其超高人氣更曾被電視節目選為「就算要排隊買嚟食都值得嘅排隊名店」。

名店現時於關西內約有60間店鋪，亦會喺全國嘅百貨公司開設限定期間店舖。

Q6：大阪地標「道頓堀固力果廣告板」嘅設計現時究竟係第幾代？

正確答案：第6代

固力果廣告板於1935年開始設置於道頓堀。現時使用嘅係於2014進行翻新後嘅第6代設計，共採用約14萬個LED燈。

對歷代設計感興趣嘅人，可以去參觀位於大阪市西淀川區嘅江崎固力果株式會社嘅江崎紀念館。隨著時代變遷，廣告牌設計亦有所變化，例如有喺霓虹燈塔下方設置舞臺嘅設計，亦有從霓虹燈塔中央噴射出12噸水嘅設計。喺度可以欣賞到第1代到第5代固力果廣告板嘅微縮模型，細節位都製作得相當仔細，簡直就好似將廣告板真實重現於此，仲可以喺度影相留念。

江崎紀念館

• 地址：大阪府大阪市西淀川區歌島4-6-5
• 交通方式：從JR塚本站徒步約16分鐘
• 官方網站：https://www.glico.com/jp/enjoy/experience/ezakikinenkan/

Q7：相信大家講起大阪美食，唔少人都會聯想到章魚燒，究竟喺大阪已註冊為「章魚燒店」嘅數目（以平均每10萬人口計算），喺全國排第幾位？

正確答案：第1位

根據「TOWN PAGE DATABASE」（NTT東日本，NTT西日本）數據顯示，如果以平均每10萬人口計算去計算職業分類被註冊為「章魚燒店」數目嘅話，大阪2021年嘅章魚燒店數量居高全國第一，不愧係章魚燒嘅聖地！

順帶一提，第2位係大分縣（4.14間），第3位係石川縣（4.13間）。相信大部分人對於以上2個縣都無乜與章魚燒相關嘅印象，可能會令唔少人覺得意外吧？

• 相關文章：
  「擅長烤章魚燒」會受歡迎啲！？日本各地章魚燒大調查
  【日本47都道府縣特輯 Vol.3】 大阪每個家庭都有一部章魚燒機是常識吧！盤點日本全國城市傳聞 ～大阪篇～

Q8：承接Q7，御好燒與章魚燒並列為大阪府美食名物。究竟喺大阪已註冊為「御好燒店」嘅數目（以平均每10萬人口計算），喺全國排第幾位？

正確答案：第10位

同樣由「TOWN PAGE DATABASE」（NTT東日本、NTT西日本）所發表嘅資料顯示，以平均每10萬人口去計算經已註冊為「御好燒店」嘅數據當中，以廣島式御好燒而聞名嘅廣島縣以39.6間排名位居第一，其次係德島縣（16.9間）、愛媛縣（14.8間）。

大阪其實有成894間「御好燒店」，如果單睇店舖數量嘅話，數目絕對唔算少，但以平均每10萬人口去計算嘅話，就只有10.1間，排名為第10位，係一個令人感到意外嘅排名結果。

• 相關文章：
  【日本美食】廣島燒其實叫「御好燒」？廣島縣民靈魂美食介紹與必食3大御好燒店
  大阪燒 VS 廣島燒 VS 文字燒，你知道分別嗎？最鍾意邊種？

唔知大家究竟答啱幾多題呢？記得login之後喺comment位留言話畀小編知喔。

記得睇埋其他與大阪相關嘅介紹文章喔。趁著呢個機會，盡情抒發對關西嘅愛吧！