相信各位FUN! JAPAN讀者對日本嘅喜愛程度絕對係毋庸置疑！特別係見到關於日本旅遊資訊嘅時候，身體本能反應下好奇心頓時油然而生，簡直就好似呼吸一樣咁平常，加上FUN! JAPAN日常文章薰陶下，大家對日本都一定有相當程度嘅認識⋯
既然係咁，以下就請接收FUN! JAPAN編輯部向您哋發出嘅挑戰書！
接落嚟將會有10題關於東京嘅問題，當中包括旅遊、地理、歷史等等唔同範疇，越後面嘅問題難度亦越高。想追求高分數嘅話，記得去複習一下過去相關嘅文章喇！
事不宜遲，FUN! QUIZ達人挑戰正式開始！10條4選1問題，睇吓您可以答啱幾多題～？
<初級篇>首先從東京基本資訊開始！
Q1: 以下邊一個選項係錯誤嘅組合？
- 淺草 × 淺草寺
- 新宿 × 阿美橫丁
- 原宿 × 明治神宮
- 澀谷 × 澀谷站前交叉口
第一題係超級基本嘅問題，如果您答錯嘅話就真係會「面都紅晒」…
Q2：以下邊一個縣並非與東京相隣接？
- 埼玉縣
- 千葉縣
- 靜岡縣
- 神奈川縣
以上4個縣，從東京出發交通都非常方便，但只有一個縣並非同東京相隣接喔！
Q3：以下邊一個機場係位於東京都內？
- 關西國際機場
- 茨城機場
- 成田國際機場
- 羽田機場
基本上係2揀1嘅問題？遊客去東京旅行時會用到嘅兩個機場當中，究竟邊一個先至係正確答案呢？
Q4：東京有幾多個特別區？
- 21
- 22
- 23
- 24
FUN! JAPAN最近先介紹完有關東京特別區嘅資訊，平時有follow開我哋嘅話，呢一題應該係送分題喔。
<中級篇>關於東京旅遊必搭嘅山手線、著名旅遊名勝等資訊問題
Q5：東京嘅舊稱係？
- 江戸
- 昭和
- 鐮倉
- 平成
以上4個選項都係日本曾經用過嘅年號。 溫馨小貼士：2021年「東京台場大○○溫泉物語」閉館消息令人感到非常可惜，當中嘅○○就係答案！
Q6：直至2022年5月為止，JR山手線一共有幾多個站？
- 28
- 29
- 30
- 31
溫馨小貼士：唔好唔記得2020年新開嘅車站喔～
Q7：東京鐵塔係咩色？
- 紅色 × 白色
- 橙色 × 白色
- 啡色 × 白色
- 紅色 × 橙色
其實有唔少日本人都認為東京鐵塔係「○○色」…知道正確答案嘅話絕對可以同朋友炫耀一番喔！
Q8：以下邊一個設施或景點係位於東京都內？
- 東京迪士尼樂園
- 東京德國村
- 東京國際大學
- 東京大神宮
雖然以上4個選項裡面都有「東京」兩個字，但真真正正位於東京都內就只有一個。即刻張開您嘅金睛火眼睇清睇楚喇！
<高級篇>高難度題！考考您連東京都民都未必知道嘅2條終極問題
Q9：直至2022年5月，東京嘅世界遺產數目係？
- 0個
- 1個
- 2個
- 3個
其實去到東京想要一睹日本世界遺產嘅風采，都唔洗一定要去到隔離嘅山梨縣欣賞屬於世界文化遺產等級嘅富士山。就算身處東京都內都可以參觀得到世界遺產喔！
Q10：「東京之日」係幾月幾號？
- 6月16日
- 7月17日
- 8月18日
- 9月19日
知道呢條題目答案嘅日本人絕對係少之又少！ 實不相瞞，FUN！JAPAN編輯部裡面都無人知道…（據小編調查所得）
燈燈燈凳！最緊張嘅對答案時間即將開始
Q1: 邊一個「目的地 × 景點」選項係錯誤組合？
正確答案：新宿 × 阿美橫丁
長約500米嘅商店街，裡面有成400多間店鋪嘅「阿美橫丁」並唔係位於新宿，而係位於JR上野站與JR御徒町站之間嘅位置喔。
- 相關文章：點玩東京上野嘅阿美橫丁好呢？
Q2：邊一個縣並非與東京相隣接？
正確答案：靜岡縣
與東京相鄰嘅有埼玉縣、千葉縣、神奈川縣、山梨縣。 屬於中部（北陸）地區嘅靜岡縣係位於山梨縣嘅左下角。
- 相關文章：圖解日本道都府縣＆旅遊資訊整理
Q3：邊一個機場係位於東京都內？
正確答案：羽田機場
係咪成田國際機場、羽田機場兩個選項唔知點揀至好呢？以上4個選項當中，位於東京都內嘅機場只有屬於東京大田區嘅羽田機場（東京國際機場），成田國際機場係位於相鄰嘅千葉縣成田市。 除此之外，東京仲有調布機場、八丈島機場、新島機場等等共7個機場。
- 相關文章：千葉縣：成田國際機場所在地的首都圏地區
Q4：東京有幾多個特別區？
正確答案：23
特別區係指位於東京都內嘅23個區，起源自1947年（昭和22年）由《地方自治法》施行後所實施嘅特別區制度。答錯嘅話，趁著呢個機會睇睇以下文章複習相關資訊吧。
Q5：東京嘅舊稱係？
正確答案：江戸
東京，曾經被稱為江戶。
1868年7月，明治政府頒發一道「將江戶稱為東京（江戸を東京と称す）」嘅詔書，自此「東之京」（「西之京」為京都）、「東日本最大城市」就被宣稱為「東京府」（1943年改稱為「東京都」）。 現時皇居外苑附近一帶範圍，就係昔日江戶城嘅所在之處。
Q6：直至2022年5月為止，JR山手線一共有幾多個站？
正確答案：30
「高輪Gateway」（到2020年為止，東京山手線時隔49年所開通嘅新車站）啟用後，山手線嘅車站數量變成30個。環繞山手線一周，大約需要1小時。
Q7：東京鐵塔係咩色？
正確答案：橙色 × 白色
東京鐵塔成日都被誤以為係「紅 × 白」色，但其實係「橙 × 白」色（嚴格嚟講係「黃紅」、「國際橙」）。航空法規定下，為方便飛航辨識，60米以上高嘅建築物必須設置日間障礙標誌（以東京鐵塔為例，就係從最上方開始油成「國際橙 × 白色」相間模樣）。
另一方面，東京晴空塔因為設置咗高光度航空障礙燈，所以無需特別上色。
Q8：以下邊一個設施或景點係位於東京都內？
正確答案：東京大神宮
答案係位於千代田區嘅東京大神宮。其他所在地如下。
- 東京迪士尼樂園…千葉縣
- 東京德國村…………千葉縣
- 東京國際大學………埼玉縣（第一校園及第二校園）
Q9：直至2022年5月，東京嘅世界遺產數目係？
正確答案：2個
繼2011年6月小笠原群島被列為世界自然遺產後，2016年7月包括東京上野國立西洋美術館在內嘅「勒·科比意的建築作品」亦被聯合國教科文組織列入世界文化遺產，成為首個東京都內嘅世界文化遺產。
Q10：「東京之日」係幾月幾號？
正確答案：7月17日
請留意返Q5答案，「江戶」正式改名為東京嘅日期（7月17日）其實就係「東京之日」。 順便話埋畀大家知，每年10月1日係東京都嘅「都民之日」喔。
唔知大家究竟答啱幾多題呢？記得login 之後係右手邊嘅Comment位留言話畀小編知喔。
Comments