【食譜影片】超吸睛！用章魚燒機自家製「一口迷你蛋包飯」～

「章魚燒」（又稱為章魚小丸子）擁有圓碌碌得意外型，咬落鬆軟兼口感豐富，再配搭醬汁同埋蛋黃醬，甜鹹口味令人愛不釋手，忍唔住食完一粒又一粒！難怪章魚燒除咗紅遍日本之外，喺海外亦相當受歡迎。唔少日本家庭都會喺屋企自家製章魚燒，亦因此發展出利用章魚燒機製作章魚燒之外嘅其他美食。今次小編就係要分享其中一款章魚燒機創意美食－「一口迷你蛋包飯」嘅食譜。

製作方法非常簡單，下次不妨跟住以下食譜，挑戰一下自家製迷你蛋包飯，無論係即時嘆返幾粒用嚟「醫肚仔」，又或者整嚟為飯盒加餸都一流喔。推薦大家喺迷你蛋包飯上面，用番茄醬畫上心心、笑哈哈等圖案，更添樂趣！

食譜影片請參考（附有CC字幕）👇👇👇

「一口迷你蛋包飯」材料（2人份量）

• 白飯 200g
  
• 煙肉 4〜5塊
• 西蘭花 適量
• 鹽・胡椒 適量
• 茄汁 2湯匙
• 雞蛋 2個
• 沙律油 (塗抹用) 2茶匙
• 乾番茜碎 適量
• 蛋黃醬 適量

*配料可以隨意配搭，不妨揀返幾款鍾意嘅食材自由配搭喔。

「一口迷你蛋包飯」製作方法

1. 將煙肉及西蘭花切碎。
2. 於耐熱容器中，倒入白飯、煙肉、西蘭花、茄汁、鹽・胡椒，攪拌均勻後包上保鮮膜，以600W微波加熱2分30秒。
3. 整體攪拌均勻後，包上保鮮膜，再以600W微波加熱1分鐘後，茄汁飯即完成。
4. 於碗內打入雞蛋，然後打成蛋液再過篩。
5. 於加熱好嘅章魚燒機掃上沙律油。
6. 將過完篩嘅蛋液倒入至半滿，再放入茄汁飯。
7. 蛋液凝固後，用竹籤或牙籤翻面整圓。
8. 放上碟之後，根據個人喜好淋上茄汁、蛋黃醬、撒上乾番茜碎即大功告成。