【食譜影片】日式簡易食譜：照燒三色椒釀肉

照燒雞肉、照燒漢堡、照燒豬肉等一眾照燒（Teriyaki）美食可以話係家傳戶曉嘅日式美食。云云照燒美食之中，您又有無聽過照燒三色椒釀肉？今次就同大家分享簡單又輕鬆就可以煮出色香味美嘅日式住家菜－日式照燒版之三色椒釀肉！不妨跟著以下食譜試吓整，歡迎同小編開心Share您嘅成品喔～

照燒三色椒釀肉材料（2人份量）

三色椒 4個

醬汁材料

• 蠔油 1/2湯匙
• 醋 1/2湯匙
• 味醂 2湯匙
• 醬油 1湯匙
• 水 1湯匙

肉餡材料

• 豬肉碎 200g（可用雞肉代替）
• 葱末 半條
• 薑泥 1/2茶匙
• 蒜泥 1/2茶匙
• 麵包糠 3湯匙

麵粉

沙律油 2湯匙

照燒三色椒釀肉製作方法

開火前先製作好醬汁備用。

1. 將肉餡材料倒去一個大碗裡面攪拌混合好之後，稍微整成圓狀。
   ☆小貼士：將上述肉餡攪拌混合成可以一下子拎起嘅程度，有助攪拌混合時鎖住肉汁，防止烹煮過程中肉餡變乾收縮嘅情況出現。
2. 將三色椒切對半，並將中間嘅核清除。
3. 將2湯匙麵粉與三色椒放入保鮮袋然後封好袋口，充分搖勻，使三色椒均勻覆蓋上麵粉。
4. 喺每個三色椒裡面加入1/8分量嘅肉餡，用手指將肉餡塞入青椒，不留空隙。記得要塞好塞滿，將肉餡塞到去三色椒嘅四周角落，中間部分則呈微凹狀態。
   ☆將三色椒與肉餡塞得夠滿夠緊貼嘅話，煎嘅時候就唔易出現椒肉分難嘅情況出現。
5. 以中火加熱平底鍋，倒入1/2湯匙沙律油，把塞好肉餡嘅三色椒並排放入並以中火煎熟後，加入照燒醬汁，將三色椒釀肉輕輕翻面並同時沾上醬汁，煎至醬汁呈現光澤感以及充分收汁後熄火即成。