相信唔少讀者都因為一場疫情青亂旅遊計劃，對日本一切一切朝思暮想。為回應廣大讀者訴求，FUN! JAPAN編輯部特地走訪東京各地採訪，為大家獻上各式各樣最新店家介紹！最新一輪FUN! JAPAN編輯部新開幕店家介紹系列，就有2021年8月1日於原宿站前綜合設施大樓「WITH HARAJUKU」盛大開幕嘅「PEANUTS Cafe SUNNY SIDE kitchen」主題café！
自1950年開始於晨間報紙連載以嚟，由查爾斯・舒茲創作嘅著名漫畫《PEANUTS》多年來一直深受世界各地粉絲喜愛，尤其係FUN! JAPAN粉絲之中都有唔少係作品嘅忠實擁躉？
充滿《PEANUTS》特色嘅「PEANUTS Cafe」主題café陸續於東京中目黑、南町田、兵庫縣神戶、愛知縣名古屋等地開設店舖，而日本國內第5間分店就選址於原宿「WITH HARAJUKU」登場 ！今次新店主題為「一天幸福健康的飲食」，事不宜遲，馬上就一齊嚟睇睇呢間「PEANUTS Cafe SUNNY SIDE kitchen」與眾不同之處啦！
JR原宿站徒步約3分鐘！史努比與一眾好朋友恭候大家光臨
從JR原宿站徒步約3分鐘，就會見到大大個顯眼史努比招牌，一睇就知道已經抵達「PEANUTS Cafe SUNNY SIDE kitchen」！店面正門採用一整片落地玻璃窗，營造出開放寬敞空間感。
一行入店內，白色基調設計店內裝潢立即映入眼簾，配搭木調餐枱，非常簡約時尚！陽光從窗外灑入店內，令整個空間顯得更加明亮寬敞。
唔使多講，每位客人嘅目光都一定會最先被右側牆上嘅壁畫吸引！
除咗仰躺望著天空發呆嘅史努比之外，仲有椅背上放著畫著PEANUTS GANG嘅道具板、梳發座位上嘅靠枕等，《PEANUTS》內登場嘅一眾各角色都會喺店內大小角落迎接大家光臨。
再往右邊露天座位區，即會發現室外亦有忠實呈現史努比嘅紅色小屋！每個座位上都放有「史努比擺飾」，除享用主題美食與飲品之外，亦可以趁機同史努比影相留念，體驗走進原作世界般嘅氛圍。
「PEANUTS Cafe」菜單設計為您健康著想！
介紹完店內眾多角色之後，跟住就要進入令人滿心期待嘅主題—「主題美食」！
「PEANUTS Cafe SUNNY SIDE kitchen」主題café菜式有相當多以健康為主要考量嘅款式，例如自家製吞拿魚三明治、香草沙律、上頭擺著荷包蛋嘅焗多士等，充滿健康意識嘅餐點全天候供應，亦好適合當早餐享用。
眾多菜式當中，小編真心大推無麩質冬甩，一共有7種口味！冬甩不含麵粉，而係選用富含蛋白質、維他命B1、維他命E嘅米粉，於店內每日新鮮烘烤出爐，鬆軟綿密口感叫人即使要食幾多個都不成問題💗
無麩質冬甩不單可以堂食，亦歡迎外賣。外賣盒上印著史努比圖案，不禁令人想買一盒帶走，小編有預感疫情後絕對會成為東京旅遊全新手信！
爆買東京旅行手信！原創獨家商品大檢閱！
如果係《PEANUTS》嘅粉絲，就一定唔可以錯過店內左側嘅商品販售區域。
店內販售嘅商品包括餐具、流行雜貨，以及眾多提倡可持續理念嘅原創周邊商品，架上款式應有盡有。推薦大家下次去原宿行街購物途中，順便放低幾兩銀兩～
以眾人熟悉主題顏色為構想設計而成粉彩色調餐具，餐盤、餐碗、馬克杯⋯⋯係咪想要全包先？
目前用餐時間限定90分鐘，雖然店家提供即場walk-in名額，但小編會建議大家事先預約比較保險。2個月前就可以從官網上預約訂位(預約人數最多6人)，所以當您一訂好機票，不妨就馬上預約「PEANUTS Cafe SUNNY SIDE kitchen」，如此一來就可以更有效率安排其他行程啦～
※店內商品及菜單為採訪當時的內容。
店舖資訊
- 店名：PEANUTS Cafe SUNNY SIDE kitchen
- 地址：東京都澀谷區神宮前1-14-30 WITH HARAJUKU B2F
- 營業時間：09：00～21：00(最後點餐時間為20：00)
※目前縮短營業時間。正常營業時間為09：00～21：30(最後點餐時間為20：30)，最新資訊請上官網查詢 - 交通：從JR原宿站徒步約3分鐘
© 2021 Peanuts Worldwide LLC
Comments