當您去東京旅行，要填寫酒店、Airbnb等地址嘅時候，一定會見到澀谷區、新宿區、目黑區等等地方名會跟著個「區」（相當於英文「Ward」）字吧？
點解會有「區」呢個行政劃分呢？咁係因為東京都喺第二次世界大戰嘅時候，為咗加強首都行政機能而將地域分為區市町村，當中23個東京都特別區被稱為「東京23區」。今次呢篇文章就簡單為大家介紹一下日本嘅市町村制度以及東京都23區～
東京：23區、26市、5町，仲有偏遠地區！
要管理東京呢個大城市，當然係相當複雜，因此就需要將東京劃分成一個又一個比較細嘅區域，猶如一部功能良好嘅機器咁正常運作。
東京都由23個特別區、26個市、5個町，以及8個村所構成。基本上，23區隸屬東京都管轄，但福利、教育、居住等管理方面擁有更多自主權，喺某部分層面上甚至更加完善。
日本政府機關
日本政府將國土行政區劃分為都道府縣，底下再劃分成市町村。日本47都道府縣底下有各個市町村，數目超過1,700個。
一般只分為市、町、村，惟東京都於1943年特別畫出23個特別區並沿用至今。而特別區嘅規劃，除咗東京，京都府和大阪府等都市都有「區」嘅劃分。不過，東京都特別區、京都、大阪特別區喺税源分配比率與權限卻又會有所差異。
東京都23區
東京23區特別區與英國倫敦、美國紐約嘅行政區相當類似，擁有獨立地方自治權限。供水、污水及消防等服務由東京都共同管理，東京都政府會好似普通市政府一樣徵收部分稅項，而喺財政方面被賦予一定程度嘅自主權，各「區」擁有各「區」行政管理方式。
講咗咁耐，東京23區其實一共係有邊幾個「區」呢？名單如下：
- 足立區
- 荒川區
- 文京區
- 千代田區
- 中央區
- 江戶川區
- 板橋區
- 葛飾區
- 北區
- 江東區
- 港區
- 目黑區
- 中野區
- 練馬區
- 大田區
- 世田谷區
- 澀谷區
- 品川區
- 新宿區
- 杉並區
- 墨田區
- 台東區
- 豐島區
23區當中，千代田區、中央區、港區係東京主要商業地區，商業大廈林立，通常被稱為東京都心或都心3區。千代田區、中央區、港區以上3區喺日頭出現嘅人數，比起夜晚足足多成7倍咁多，千代田區更加係東京政治中心，亦係皇居與政府機關嘅所在地。
東京其他直轄市
東京都主要由23區、多摩地區以及眾多島嶼所構成。
多摩川流經多摩地區，擁有豐富自然景色，係一個相當舒適嘅地方，多摩地區係指位於23區西側嘅市町村，包括八王子、立川、多摩、府中、駒前、町田等都市。當中唔少地區深受遊客歡迎，例如位於三鷹市嘅井之頭公園、三鷹之森吉卜力美術館，賞楓人氣景點與知名瀑布眾多嘅奧多摩町，日之出町、瑞穗町更加係郊遊踏青嘅好去處。
另外仲有國家公園、山地與島嶼等等，通通都可以喺呢一片偌大廣闊嘅東京都裡面搵得到，無論係要搭渡輪前往偏遠島嶼，或者登上有成2,000米高嘅雲取山等，選擇多多，絕對可以滿足您奔向大自然嘅心，甚至有時候更會令人忘卻自己明明正身處大都會中！東京都既熱鬧又僻靜，同時擁有城市與自然共存嘅光景，難怪成為唔少遊客心目中最佳旅遊城市～
東京人氣旅遊區域
東京旅遊景點多不勝數，而且年年都有新事物、新流行誕生，令人好想一次又一次地踏上東京呢一片土地。如果您想要一次過玩晒成個東京，係相當困難。推薦初嚟報到嘅遊客，先揀出幾個心水地區，會比較好安排。然後就以揀咗嘅心水地區為主，去規劃一場東京之旅，保證令人玩到唔想返屋企。
澀谷區：流行時尚尖端，繁華熱鬧街道
東京旅遊景點排行榜裡面，澀谷可以話係敢認第二無其他景點敢認第一。JR澀谷站、惠比壽站等站以及周邊地區購物景點與美食店舖林立，第一次去東京嘅話，點可以唔去澀谷行個圈先？
當您一提到澀谷，浮現喺大家腦海中嘅景象肯定係，可以見到人潮洶湧、行人同時穿越馬路光景嘅JR澀谷站八公口「澀谷全向十字路口」。出現喺各大廣告，甚至電影、戲組取景嘅經典外景場地。JR澀谷站八公口有一尊忠犬八公像，更係聞名全球，唔少遊客一到澀谷就係先去搵忠犬八公像影相，忠犬八公像嘅所在地更加係日本人相約見面嘅指定地點。
時尚潮流嘅愛好者，推薦去澀谷109百貨或散步到原宿熱鬧嘅竹下通，挑揀時下最新潮流款式服飾。原宿與日本著名神社之一嘅明治神宮及代代木公園相連，非常適合坐喺代代木公園悠閒地野餐。
想要探索美食，則不妨去澀谷正中心嘅新地標宮下公園探索一番，內裡有唔少餐廳選擇之餘，宮下公園附近仲有一條復古又懷舊嘅飲兵衛橫丁，擁有1950年代風情嘅街巷，順便感受一下當地日本居酒屋文化。
新宿區：極致景色、極致夜晚
東京中心之一嘅新宿區，從JR新宿站出發行幾分鐘即可以去到新宿都廳，登上免費展望台，欣賞一棟棟耀眼燈光嘅建築物所營造出嚟嘅夜景。遊客亦可以散步行去新宿御苑，欣賞典雅嘅日本庭園，四季美麗花卉。
新宿站附近有非常多間百貨公司、商業設施林立，絕對係大買特買，購物嘅好時機，仲可以行入各個百貨公司嘅地下美食樓層，品嚐美味嘅輕食或日本先買得到嘅限定美食。另外仲有，不夜城新宿歌舞伎町，以及小型酒吧林立「新宿黃金街」，要享受東京精采夜生活話咁易！
雖然探索夜晚歌舞伎町，既新鮮又刺激，但記住亦要留意潛藏危險，甲為有可能遇上劣質店家強行拉客等等，千祈唔好失去理性而得不償失，出門旅遊記得要留意自身安全。
台東區：探索秋葉原、淺草雷門
作為東京都面積最細嘅特別區，多數人可能比較少聽過台東區，但就一定聽過鼎鼎大名嘅淺草。淺草就係位於台東區，淺草寺，上野、藏前等等保留昔日風情嘅人氣景點盡在台東區。
淺草擁有歷史悠久嘅街道、淺草寺等知名寺廟、神社，亦有唔少商店及美食老店都係從以前傳承落嚟，一年從頭到尾舉辦唔少祭典與活動，吸引相當多遊客嚟朝聖。
跨越台東區和千代田區嘅秋葉原，更加係遊戲和動漫次文化聖地，以電玩商場、女僕咖啡廳、以及動漫相關嘅周邊商店林立而聞名。
上野除咗上野公園、上野動物園，仲有東京國立博物館、東京美術館、國立西洋美術館等等眾多藝術景點，係一個藝術氣息相當濃郁嘅地方。
另外推薦一個地方畀以上景點都去過嘅人，就係谷中。谷中保留著下町風情，喺度散散步，走入谷中銀座商店街邊食邊行，或者喺古民家Café嘆個下午茶時光，放慢腳步，享受一趟悠閒嘅東京之旅。
中央區：東京下町風情
中央區除咗有銀座、日本橋，仲有築地、月島等充滿東京下町風情嘅地方。
日本橋富有歷史嘅街道景色，殘留著東京下町風情，附近百貨公司林立，當中亦有唔少足以代表東京嘅老字號店家和名店，吸引無數遊客到此一遊。日本著名商業區域有樂町，除咗商業大樓林立之外，又點少得畀上班族收工後可以鬆一鬆嘅地方，因此附近居酒屋更加係多不勝數。
但如果想要忘卻都市煩囂，可以去濱離宮恩賜庭園一遊，喺護城河圍繞嘅公園裡面嘅日本茶屋內品嚐美味日式點心，欣賞動人庭園景緻，將城市總總煩惱拋諸腦後。
雖然東京魚市場已經搬咗去豐洲，但係築地仍然人氣高企，仲有保留著多間餐廳與攤販店舖，可以品嘗到新鮮嘅海鮮料理，當中更加有唔少可以買手信嘅店舖，非常適合喺度揀返幾款手信留個美好回憶！
Comments