【日本文化】日本3月3日傳統活動：祈求女孩健康長大「女兒節」

3月3日女兒節，係日本祈求女孩子健康長大嘅傳統活動，亦被稱為女孩子專屬節日。至於日本點解會慶祝女兒節呢？下面就會為大家介紹女兒節嘅由來，以及日本人會喺呢一日點樣慶祝！

關於女兒節

女兒節係祈求女孩子健康長大嘅傳統活動，亦稱作「桃花節」。有女兒嘅家庭通常會準備女兒節人偶（雛人形）、桃花、雛米果等裝飾，品嚐「散壽司」（將各式各樣食材放於一碗醋飯上嘅一種壽司食法）或蛤蜊等菜餚，慶祝女兒節來臨。

女兒節由來眾說紛紜，其中最有力嘅一項說法為，女兒節其實係源自中國嘅「上巳節」。「上巳節」本為驅邪解厄嘅節日，將自己身上厄運與邪氣轉移到人形娃娃身上，再將娃娃沿著河川水流流放，叫作「流放人偶(流し雛)」。隨著時代演變，娃娃製作技術越來越精進，製作成品相當精緻，就從放水流演變為家中擺飾。

另外，據講女兒節最早係於江戶時代被訂為3月3日，自此就成為祈求女孩幸福健康長大嘅傳統節日活動。

日本人會將女兒節娃娃當作女孩嘅替身，守護女孩遠離疾病與意外事故，因此會喺女兒節擺設娃娃及慶祝女兒節，祈願女孩能夠充滿活力、幸福健康地長大。

而擺設桃花嘅原因，係因爲中國上巳節同樣會使用桃花。喺中國，桃花自古以來就係人人熟悉嘅花卉，被視為長壽象徵、擁有驅魔力量。另一方面，由於女兒節正值桃花盛開嘅時節，因此亦係以桃花點綴裝飾嘅理由之一。

日本人通常會喺立春（2月4日左右）至2月中旬左右擺設女兒節娃娃，一直至女兒節結束為止。娃娃大致可分為「立式人偶」、「坐式人偶」兩種，而日本各地嘅女兒節娃娃亦有各式各樣款式，例如係七層、三層等。

雛米果係女兒節代表性食品之一，基本由3、4種顏色組成，3色款式為「粉紅、綠、白」。粉紅意味著血液、性命等生命能量；綠色為自然生命力與能量；白色則係以白雪大地為形象，代表大地旺盛能量，寓意女孩子能夠獲得以上種種自然能量，健康長大。

而四種顏色嘅版本則再添加黃色，代表春夏秋冬。粉紅為春暖花開嘅春天；綠為新綠茂盛嘅夏天；黃色為染上楓紅嘅秋天；白色則為雪白嘅冬天，意味著「祈求女孩子一年四季健康長大」。

散壽司內會放滿各式各樣嘅食材，祈求小朋友將來能夠食得溫飽。另外，飲蛤蜊湯則係希望女孩子能夠搵到一個「夾得埋」嘅終身伴侶，如蛤蜊貝殼般緊密貼合，陪伴度過一生一世。

以上就為大家簡單介紹咗日本嘅女兒節，下次去日本如果有機會遇上女兒節慶祝期間時，不妨入境隨俗，食個散壽司、買個雛米果，體驗一下日式女兒節嘅氣氛吖。