MEGA WEB係一座隸屬於日本「豐田汽車(TOYOTA)」旗下嘅體驗型主題樂園。遊客除咗可以參觀學習與汽車歷史相關嘅展覽及維修過程之外，亦可以體驗試坐豐田汽車。集「參觀」、「乘坐」、「體驗」元素於一身，無論係大人定細路，都可以盡情感受汽車嘅樂趣！
MEGA WEB體驗內容
MEGA WEB因應主題，一共劃分成3大設施。無論係邊一種設施都歡迎遊客入場參觀，不妨可以從最感興趣嘅設施開始，好好享受一番～
豐田都市陳列館
豐田都市陳列館係3大設施中面積最大嘅區域。場內透過展品與體驗，為遊客介紹為實現未來移動性社會所作出嘅努力以及最新技術。眼前所見全部都係最新科技，不禁令人情緒高漲，想要體驗多幾次呢！
館內劃分出多個區域，當中包括介紹豐田企業運動活動嘅「TOYOTA × 運動區」；展出跑車嘅「GR區」；展出TOYOTA最新車款嘅「移動載具區」；可以邊玩邊體驗TOYOTA次世代技術嘅「科技展區」。
同場更有「RIDE ONE駕車遊」試乘體驗，歡迎各位遊客實際喺專用車道上親身駕駛豐田汽車嘅新款車輛！
・TOYOTA × 運動區
您可以於體驗區內參與「地板滾球」、「輪椅籃球」等殘疾運動。「地板滾球」即係將滾球拋到地板上，然後比較邊一位選手嘅滾球最靠近白球嘅一項競技比賽。
・GR區
於380吋大螢幕上映魄力十足嘅虛擬賽車運動，現場極具臨場感，畫面無比震撼！
・移動載具區
展出豐田眾多最新車款，總有一款啱您心水！
・科技展區
利用模擬器，親身體驗豐田安全技術。亦有藉由賽車遊戲，讓入場人士體驗汽油車與油電混合車所耗費嘅燃料多寡分別。經由模擬器，即使唔係自駕一族，都可以輕鬆體驗到豐田汽車嘅技術賣點～
・RIDE ONE駕車遊
您可以喺全長1.3公里嘅試乘車道上，駕駛心水豐田汽車。車道途中會經過石板道路以及由燦爛燈飾點綴嘅道路，令試乘更加愉快有趣。試坐體驗須事先預約，請於試坐30分鐘前到現場完成預約手續。
- 費用：1輛／300日圓
- 開放時間：11：00～18：00
※目前僅接受現場預約。（網路預約請於當日凌晨12點整到試乘30分鐘前完成預約手續）
汽車史冊寶庫
專區內展出咗包含豐田汽車在內嘅世界名車。身處於重現出1960年代東京街景嘅場區內，您可以一邊回顧過去普通汽車、賽車等歷史軌跡，一邊瀏覽1950年～1970年代世界各國名車，感受復古又雅緻嘅光景。
編輯部特別推薦，一定要去參觀名車修理站。事關工匠技術將昔日名車恢復成新車時嘅性能與內外裝，令人歎為觀止！
歡樂駕乘館
細路大人都可以愉快學習揸車樂趣，場內設有學齡前兒童（3～5歲）都適合駕乘嘅「小小駕車遊」，以及適合小學生以上駕乘嘅「PIUS」等。（PIUS初學者講座設有英文、中文、韓文說明）
參加駕駛體驗必須持有一般汽車駕照，或者先參加初學者講座，合格後就可以取得準執照開始體驗。
MEGA WEB營業時間、入場費與交通方式
- 地址：東京都江東區青海1-3-12
- 交通方式：臨海線「東京電訊站」徒步約3分鐘／百合鷗線「青海站」直通本館
- 入場費：入館免費（體驗遊樂設施項目會另外收費）
※部分遊樂設施營運方式或會作出變動，詳情請上官網確認。
※為預防新冠肺炎，以下內容敬請到場人士協助與見諒。
■館內工作人員均會戴上口罩。
■館內各處均設有酒精消毒設備，請務必多加利用。
■若出現身體不適症狀，請告知鄰近工作人員。
Comments