無論你係啱啱落飛機想直衝去旅遊景點，抑或係經歷完一段購物之旅，喺人潮擁擁例如東京澀谷等地拖住個沈重嘅行李箱，都真係幾唔方便！呢個時候，投幣式儲物櫃（日文：コインロッカー、英文：coin locker）同寄存行李嘅地方對於遊客嚟講，絕對係相當貼心嘅服務，既方便又實用。
目前，由於渋谷正進行重新開發項目，相關建築工程亦正進行中。與疫情前相比，車站內外嘅環境都有幾大變化。本文將會為大家介紹有關澀谷地區提供寄存行李嘅地點等最新資訊，等大家可以輕鬆舒適地度過旅遊時光。
澀谷邊度可以搵到投幣式儲物櫃？
喺澀谷多個地方都有設置投幣式儲物櫃，主要喺各鐵路車站附近。喺「JR澀谷站」、「東急澀谷站」、「東京Metro澀谷站」、「京王井之頭線澀谷站」附近一共有超過15處，將近1,000個儲物櫃。但要注意，由於前往澀谷嘅遊客人數眾多，經常被使用，較少出現空嘅儲物櫃喔。另外，日本嘅儲物櫃主要分為3種尺寸，費用有異，一般小型（S）為300～400日圓、中型（M）為500～600日圓、大型（L）為700～900日圓。
投幣式儲物櫃尺寸與費用如下（※根據儲物櫃嘅種類、大小會有所不同）
- 小型（S）：300～400日圓、約高 257 x 長355 x 闊575（mm）/ 約高317 x 長355 x 闊 575（mm）（可放手袋、背囊、購物袋等大小嘅物品）
- 中型（M）：500～600日圓、 約高 550 x 長355 x 闊575（mm）（可放手提行李箱）
- 大型（L）：700～900日圓、約高880 x 長355 x 闊575（mm）（可放一般行李箱）
以下落嚟，會根據車站各個閘口同出口，分別介紹投幣式儲物櫃嘅所在位置。另外，車站內亦有指示牌顯示儲物櫃位置，就算係外國旅客都易搵到。而且部分儲物櫃仲可以喺網上事先預約添！
※以下為2023年2月資訊，日後或會有所變動，敬請留意。
JR澀谷站附近的投幣式儲物櫃
現時JR澀谷站嘅閘口（日文為「改札口」）有4個，分別係「八公改札口」、「中央改札口」、「南改札口」和「新南改札口」，改札口附近嘅7個地方有設置投幣式儲物櫃。
當中，八公改札口因為非常方便通往各熱門觀光景點，所以人潮會比較多，儲物櫃亦相對容易爆滿。另外，如果想使用中央改札口內嘅儲物櫃就必須要先入閘先用到，所以如果你係乘搭唔同路線嘅話，可能使用其他地方嘅儲物櫃會比較適合。而南改札口附近嘅儲物櫃則分別設置於不同方向嘅出口——「東口」和「西口」。
4個閘口當中，人潮最少嘅係新南改札口，因此附近儲物櫃亦相對較空。不過要注意嘅係，因為該位置距離車站月台比較遠，所以使用時需要注意返行走距離呢一點喔。而設置於澀谷Scramble Square嘅儲物櫃，人流較少，且方便前往主要觀光景點，所以都推薦大家到呢個地點使用儲物櫃。
※可於網上確認投幣式儲物櫃使用情況和事先預約，詳情請瀏覽此網站。
| 地點 | 預約網站上的標記（日語版） | 設置數目 |
| 從「八公改札口」出閘，「宮益坂口」通道旁邊 | 改札外 八公口（宮益坂口通路旁邊） | 小：9 中：18 大：14 |
| 從「八公改札口」出閘，位於售票處附近 | 改札外 八公口（售票處附近） | 小：10 中：9 大：13 |
| 「中央改札口」閘口內 | 改札內 中央改札口 | 小：14 中：9 大：3 |
| 從「南改札口」出閘，左側通道旁（「西口」） | 改札外 西口 | 小：42 中：19 大：19 |
| 從「南改札口」出閘，正面位置（「東口」） | 改札外 東口 | 小：47 中：29 大：14 |
| 從「南改札口」出閘，於「東口」搭扶手電梯到B1F，喺澀谷Scramble Square的通道上（出口「B6」，「B7」附近） | 澀谷 Scramble Square | 小：49 中：25 大：25 |
| 從「新南改札口」出閘，正面位置 | 改札外 新南口 | 小：8 中：7 大：7 |
※費用：（小）400日圓、（中）500日圓、（大）700日圓。
※另外，「西口」外邊與「綠色窗口」（みどりの窓口）附近亦有設置投幣式儲物櫃。
東京Metro澀谷站附近的投幣式儲物櫃
儲物櫃地點：【B】B2F 澀谷站觀光案內所旁
照片：由東京Metro提供
儲物櫃地點：【A】B2F 澀谷站觀光案內所附近
照片：由東京Metro提供
喺行經東京Metro澀谷站嘅3條線路中，「半藏門線」和「副都心線」附近都設有投幣式儲物櫃。特別係位於地庫2樓（B2F）通道上的「東急東京Metro澀谷站旅遊資訊中心」附近嘅儲物櫃為數最多。距離觀光中心最近嘅出口係「A12」，因此小編建議大家可先往「A12」前進，去到再搵觀光資訊中心同儲物櫃。
※可於網上確認投幣式儲物櫃使用情況，請瀏覽此網站。
| 地點 | 網站上的標記（中文版） | 設置數目 |
| 出口「A12」附近的旅遊資訊中心附近 | 【A】B2F 澀谷站旅遊信息中心附近 | 小：42 中：27 大：7 特大：1 |
| 出口「A12」附近的旅遊資訊中心旁 | 【B】B2F 澀谷站旅遊信息中心旁邊 | 小：33 中：13 大：7 |
| 「20b」前往出口通道升降機旁 | 【C】旁邊20b EV退出 | 小：12 中：4 大：1 |
※收費：（小）400日圓、（中）500日圓、（大）700日圓、（特大）900日圓。
東急澀谷站附近的投幣式儲物櫃
東急澀谷站周邊嘅物櫃可分成4大區域。當中，地庫2樓（B2F）的出口「A2」附近嘅投幣式儲物櫃係最推薦之選。因為呢個區域嘅儲物櫃數量較多，而出口「A2」直通SHIBUYA109，方便前往澀谷嘅中心地帶觀光。
※可於網上確認投幣式儲物櫃使用情況，請瀏覽此網站。
| 地點 | 網站上的標記 | 設置數目 |
| 地庫1樓（B1F）出口「A2」附近 | A1, B | 小：24 中：6 大：16 |
| 地庫2樓（B2F）出口「A2」附近 | A2, D, E, F | 小：83 中：33 大：18 |
| 地庫2樓（B2F）出口「A4」、「A5」附近 | C | 小：18 中：7 大：7 |
| 地庫3樓（B3F）閘口「澀谷Hikarie2改札口」附近 | K, L | 小：22 中：9 大：3 |
※收費：（小）400日圓、（中）500日圓、（大）700日圓。
京王澀谷站附近的投幣式儲物櫃
車站閘口「中央改札口」正前方通常人流較多，建議使用出閘後轉右搭電梯後正前方嘅投幣式儲物櫃。有小、標準、中、大，4種唔同尺寸和收費。但需要注意嘅係，有別於其他車站，「小」嘅尺寸真係非常地細，為高130×長320×闊575（mm），喺選擇尺寸時記得要多多注意喔。
※可於網上確認投幣式儲物櫃使用情況，請瀏覽此網站。
| 地點 | 預約網站上的標記 | 設置數目 |
| 從2樓（2F）「中央改札口」出閘後，向前行25米之處 | A、B | 標準：30 中：9 大：3 |
| 從2樓（2F）「中央改札口」出閘後，右側電梯下方 | C | 小：5 標準：26 中：20 大：10 |
| 1樓（1F）「西口」閘內 | D | 標準：16 中：3 |
※收費：（小）300日圓、（標準）500日圓、（中）600日圓、（大）900日圓。
※除京王澀谷站，「Shibuya Mark City」內外皆有設置投幣式儲物櫃嘅地方。
搵投幣式儲物櫃的小小建議！
澀谷嘅投幣式儲物櫃經常被人用到滿，比較少空櫃出現，所以小編建議可以去比較容易被人忽略嘅車站地庫和附近設施尋找儲物櫃。
不過，澀谷車站內嘅路線錯綜複雜，萬一蕩失路，甚至會唔記得自己將行李擺咗去邊個儲物櫃等情況出現，亦會有一定風險。如果你係比較容易蕩失路，唔係擅長搵路嘅話，咁就最好利用「八公口」附近嘅儲物櫃、或位於SHIBUYA109地庫2樓入口附近等，著名商業設施嘅投幣式置物櫃會比較隱陣喔。
日本投幣式儲物櫃的用法
日本嘅投幣式儲物櫃主要分成兩種類型，一種為鎖匙型，一種為觸控螢幕型。利用鎖匙上鎖嘅儲物櫃比較舊式，只可以投幣使用。而新型嘅觸控螢幕操作，可以用「SUICA」、「PASMO」等電子交通卡或現金支付。以下落嚟，會介紹一下如何操作呢兩種儲物櫃。
鎖匙型
將行李放入儲物櫃後，閂好門。投入指定金額嘅硬幣，金額正確無誤，即可上鎖拎出鎖匙。
觸控螢幕型
將行李放入儲物櫃，閂好門。喺觸控螢幕選擇你所使用嘅儲物櫃號碼和付款方式。可以使用現金或電子交通卡支付。請注意，如果使用現金付款，收據上頭印有取出行李時所需嘅密碼，請記得保管好避免遺失。當你從儲物櫃拎出行李時，請輸入密碼或再次拍電子交通卡，即可解鎖拎出所寄存嘅行李。
日本投幣式儲物櫃的寄存時間
使用投幣式儲物櫃時，請注意其寄存一日嘅意思，並非代表完完整整嘅24小時。一般係由開始使用儲物櫃嘅當日起，直至淩晨1、2點，或者直至儲物櫃設置地點嘅營業時間結束，為之一日。
換句話說，如果你喺第二日朝早8點先去拎行李嘅話，就必須支付2日嘅費用。如果呢個情況發生喺使用傳統鎖匙型投幣式儲物櫃，喺拎行李時要先插入鎖匙，再投入被追加收取嘅金額，如總金額無誤，方可轉動鎖匙開鎖拎出行李。
澀谷站附近的行李寄存服務
寄存行李服務亦係一項既方便又貼心服務，可以事先網上預約，咁就唔使擔心到時會無儲物櫃用，因為喺你抵達澀谷之前，就會預先為你預留好行李寄放空間，但收費會比投幣式儲物櫃高。澀谷站周邊會有部分店舖、商業施設提供行李寄存服務，以下落嚟會為大家介紹澀谷站附近有咩地方提供行李寄送服務。
| 地點 | 服務時間 | 費用 |
| shibuya-san | 10:00-20:00 | 500日圓/1日 |
| WANDER COMPASS SHIBUYA | 10:00-20:00 | 700日圓/1日 |
| Sun Ticket行李寄存處 | 10:00-18:00 | 800日圓/1日 （長度超過100cm的物品則每日收費為1000日圓） |
| Ecbo Cloak | 每個地點不一，請事先確認。 ※可預約 | 400日圓/1日 (最大邊長不超過45cm的行李箱，一般手袋、背囊等尺寸) 700日圓/1日 (一般行李箱尺寸) |
喺日本點用寄存行李服務？
雖然部分店家有提供即日使用方案，但特定嘅行李寄存服務好多時候都需要事先預約，當然亦可以直接行入店家詢問，但以防萬一，建議事先預約好比較穩陣。一般流程係必須填寫預約表格，並提供聯絡方式，以防行李寄存時出現任何需作聯絡嘅突發情況。
「投幣式儲物櫃」或「行李寄存服務」如何抉擇？
投幣式儲物櫃和行李寄存服務各有利弊。如果你希望旅遊行程順順利利，唔想花太多時間搵邊度有吉嘅儲物櫃，又或唔多擅長搵路，行李寄存服務就係你嘅最佳選擇。唔單止可以慳返尋找投幣式儲物櫃嘅時間，亦可以事先確保有地方寄存行李，並確認自己嘅行李尺寸能夠正常使用該服務。
另一方面，對於預算有限，或想喺澀谷好好享受7點後嘅夜間觀光行程嘅話，建議使用投幣式儲物櫃，因為部分可使用至深夜時段。行李寄存服務嘅收費方式基本上與行李尺寸大小無關，皆為固定收費。但如果淨係寄存一個細行李，選擇較為經濟實惠嘅小型投幣式儲物櫃會比較合適。
Comments