講到單車比賽，之前曾經介紹過「單車公路賽」同埋2020年東京奧運備受注目嘅新增競技項目「BMX極限單車」，都係火熱話題之一！而壓軸為大家介紹嘅就係香港人可能比較熟識，香港「牛下女車神」李慧詩擅長嘅項目「競輪賽（又叫凱林賽）」！
競輪賽係？
競輪，同賽艇、賽馬、競賽電單車一樣，喺日本都係以賭博為目的嘅「公營競技」之一。喺賽道上，選手會騎單車奔馳鬥快，睇比賽嘅觀眾可以落注賭邊個會贏，而落注嘅部份收入會用嚟做促進社會福利、增進體育產業同製造產業發展嘅事業，補助支援有益社會嘅各種活動。而同樣嘅單車競賽，喺日本，公營競技中會用漢字顯示「競輪」，而場地單車競賽時，就會用片假名顯示「ケイリン（KEIRIN）」。呢篇文章主要會為大家介紹前者嘅「競輪」。
令人驚訝其一！ 競輪源自日本！
實際上競輪賽係源自日本嘅職業運動。喺2000年嘅悉尼奧運會開始，將「競輪(又名凱林賽)」正式列作奧運比賽項目。喺2008年北京奧運中，日本嘅永井清史選手就獲得銅牌，而2012年倫敦奧運中，香港嘅李慧詩喺呢個項目獲得銅牌。
喺日本嘅「競輪賽」，主要係選手組成直線隊伍，同其他隊伍競爭，係團體賽事；而奧運會上嘅「凱林賽」，就完全係個人賽事，選手互相牽制，爭取第一名嘅寶座。兩種項目都唔單止係比速度，仲要比同對手之間嘅牽制策略，正正就係呢個項目嘅奧妙之處。
令人驚訝其二！快而有力！選手與單車合為一體，無煞車掣！
競輪賽所使用嘅單車，稱為「Racer」，係因應選手嘅各項條件而度身訂造嘅比賽車款。重量大概係7~8公斤、為咗可以提升速度，移除咗同速度唔相關嘅零件，所以競輪比賽用嘅單車，係無迫力煞車！速度係全靠選手自己以踩踏板嘅力量去調節。另外，單車軚超薄，闊度只有22mm！係為咗減少同地面接觸時摩擦力。
令人驚訝其三！唔係鬥快就贏咁簡單！
競輪賽唔單止係不止係鬥速度，仲著重於同競爭對手之間嘅牽制等等，好多策略。要贏得第一名，就要擬定作戰策略，例如「保持領先」就算被其他小分隊嘅選手從後方畀壓力，亦堅持由內側勉強領先嘅行走法；亦有「咬緊領先」，跟緊前面隊伍，趁對方未加速時，一口氣加速踩踏板超前對方，最後保持領先嘅比戰略。喺咁多選手錯綜複雜嘅戰略同臨場應變吓，經常可以睇到充滿戲劇化嘅比賽情況！
競輪選手厲害之處！
男子競輪選手區分為最高級嘅S級S班、S級1~2班、A級1~3班，一共6個級班，每年2次依照成績重新分班。如果持續成績表現唔好，就會被取消選手註冊資格，被逼退出競輪賽，係一個相當嚴格嘅地方。而比賽嘅注目點，應該係選手嘅體態，特別係大腿；大退嘅粗幼據說係選手強度嘅重要指標。大腿係競輪選手自豪嘅身體部位。
總結
日本全國各地由北海道函館至九州熊本一共有超過40間競輪場，幾乎每日都有比賽。如果想喺東京近郊睇比賽嘅話，推薦西武園、京王閣、千葉、川崎等場地，交通較為方便。凱林賽投注只限20歲以上先可以購買（學生不可購買）。另外，幾乎大部份場地都係免費入場，但亦有部分場地要會員先可以入場，去之前一定要事先做下功課調查！
投注賭單車賽事嘅飛叫「車券」，買嘅方法有兩種，分別係網路購買或到競輪場內或場外投注站購買。後者要填寫現場投注卡，選擇想買嘅投注方式，勾選預測嘅車號、組號等，將填寫好嘅投注卡拎到售券窗口或者自動售券機，就可以買到車券。如果買中咗心水，獎金可以喺比賽舉行嘅競輪場內或場外投注站，又或者主辦單位指定兌換場所領取。
而網路投注就必須事先喺銀行開戶，用嚟買車券或者領取獎金，註冊會員之後，將用嚟投注嘅金額匯入專屬帳戶，就可以喺網上畫面到買車券。
單車系列文章，大家鍾意嗎？歡迎大家留言畀意見！
大家覺得今次刊登嘅六篇單車系列文章點樣呢？有任何想睇想知嘅主題或內容，歡迎留言畀我地！
Comments