去海外旅行嘅時候，當然唔可以錯過機會體驗當地嘅山水自然、文化傳統。而日本嘅自然美景非常多，有嘅地方好難依靠公共交通同雙腳去，好多時唔係自駕遊就去唔到。今次我地就試下唔係揸車，亦唔係徒步行路，取其中間嘅單車之旅吧！以下介紹3個單車遊嘅路線，一齊出發感受單車遊嘅獨特樂趣吧♪
１. 穿梭「世界絕景」四季分明嘅花田 國營常陸海濱公園(茨城県)
春天開滿粉藍嘅粉碟花，秋天佈滿桃紅嘅掃帚草；呢度嘅花田，會隨天氣變化，喺四季呈現出唔同表情，有唔同鮮花盛放。係適合一家大細一齊嚟玩嘅景點。踩單車嘅話，就可以一面迎接爽快嘅微風，一面穿梭喺色彩艷麗嘅花田當中。單車路線全長11公里，喺咁廣闊嘅公園入面一邊踩單車去唔同嘅位置，一邊可以慢慢遊覽欣賞景色，真係好方便。而且喺公園入面有4個「單車租借中心」，真係總有一個喺左梗可以租車還車，非常推介以單車代步遊園。
景點資訊
- 名稱：國營常陸海濱公園
- 地址：茨城県常陸那珂市大字馬渡大沼６０５−４
- 交通：由東京品川站搭JR常磐線特急到茨城縣勝田站，需時約85分鐘。於勝田站東口2號乘車處搭巴士到海濱公園西口約15分鐘，到海濱公園南口約20分鐘。
- 營業時間：：9:30 – 17: 00 (因應季節或有變動)
- 租單車費用：大人410円、小童250円（3小時）
２．360度眺望日本象徵「富士山」―山中湖畔(山梨縣)
應該無人唔識嘅日本最高最靚嘅山—「富士山」。去日本旅行嘅話，相信好多人都想一睹富士山嘅風采。雖然可以去啲觀景位置影靚相，但如果踩單車環繞遊覽嘅話，可以去發掘唔同角度嘅富士山魅力。被綠色包圍嘅單車路線長約15公里，因為喺圍繞住山中湖畔嚟行，所以真係可圍繞富士山以環遊一周！喺大自然之中，有令人平靜嘅山中湖，遠觀雄偉嘅山峰，請務必要體驗一吓呢個非日常嘅世界。
景點資訊
- 名稱：山中湖
- 地址：山梨県南都留郡山中湖畔
- 交通：
- 高速巴士：由新宿站南口坐向富士急Highland方向嘅中央高速巴士，需時約100分鐘。再轉中央巴士至山中湖約34分鐘。
- 電車：由新宿站坐小田急電鐵線（富士號）至御殿場站約100分鐘。由御殿場站乘搭富士急行路線巴士至山中湖約需40分鐘。
推介單車租借店
- 名稱：山中湖 Marine House momo
- 地址：山梨県南都留郡山中湖村山中212-5
- 營業時間：：6:00～17:00
- 租借費用：1人１小時 700円、半日 1,500円
3．制霸日本第一嘅單車徑！—瀨戶內 島波海道 (廣島縣＆愛媛縣)
喺日本國內都好受歡迎，被稱為「單車人士聖地」嘅日本最長單車徑。由愛媛縣嘅今治市一路去到廣島縣嘅尾道市，總共跨越六個海島，全長70公里嘅單車徑。一邊遊覽瀨戶內海上嘅島嶼，一邊呼吸染上海水嘅空氣味道，真係超級正。呢個亦係日本第一個過海嘅單車徑特有嘅觀景。係途中會經過海老山展望公園，可以係呢度俯覽來島海峽大橋、同一眾瀨戶內海嘅島嶼，仲有好幾個可以欣賞美景嘅地方，推介大家可以去呢啲觀景位，停落嚟休息下欣賞美景。
景點資訊
- 名稱：瀨戶內島波海道
- 地點：愛媛縣至廣島縣嘅一般國有道路
推介單車租借店
- 店名：吉海Rental Cycle Terminal (道之站「よしうみいきいき館 Yoshiumi Iki-Iki Kan」
- 地址：今治市吉海町名4520-2
- 營業時間：9:00～17:00
- 租借費用：大人500円、小學生或以下300円（1日）
今次介紹嘅3條單車遊路線，大家覺得點樣呢？去日本旅行時，試一次特別唔同嘅單車旅遊體驗，相信留下深刻嘅回憶♪亦請你可以睇埋其他有關單車系列嘅文章！
Comments