鍾意去日本旅遊同血拼嘅人必睇，有好消息！離東京都都心大概30分鐘車程嘅南町田Grandberry Park，開咗全新嘅大型購物商場「南町田Grandberry Park」，一共進駐咗241間店舖，除咗購物好扺嘅Outlet之外，仲聚集咗好多美食餐廳、戶外用品店、親子設施同埋娛樂設施，既適合一家大細去逛行，亦都適合情侶約會！今次FUN! JAPAN編輯部為大家嚟攻略一吓，當行街行到腳軟時，「南町田Grandberry Park」有咩正嘢食補充能量！
相關文章：
燒肉×數碼科技！？「TORAJI HIGHLANE」
呢間燒肉餐廳嘅概念係「提供全新燒肉體驗」，只要用座位旁邊嘅平板落單，就會透過特急快線傳輸帶，將令人垂涎三尺嘅燒肉自動送到客人度！可以體驗日本點樣將先進科技近用喺日常生活上，又可以品嘗新鮮美味嘅燒肉，有肉汁超多嘅厚切五花牛肉，仲有超有口感嘅牛舌等等。
被植物環繞 綠悠悠嘅「the Farm UNIVERSAL & FARMER’S KITCHEN」
鍾意綠色嘅人，窩喺呢個綠悠悠嘅空間入面，相信會非常舒適自在。喺「the Farm UNIVERSAL」呢度，於鬧市中嘅一片悠閒綠色空間，相信實可以搵到自己鍾意嘅植物，仲可以享受綠化植栽DIY樂趣，工具一應俱全。而「 FARMER’S KITCHEN」就係氣氛舒適嘅咖啡廳，被綠化空間包圍住，令人心情平靜，同時可以品嘗當季新鮮嘅蔬菜唷！
「AMANOYA繁田商店」尋找童年回憶，買懷舊糖果餅乾
日本駄菓子屋會賣好多日本嘅小型糖果餅乾，有少少似幾十年前嘅士多，喺小朋友會去買零食嘅地方。各種各樣嘅糖果餅乾色彩繽紛，有嘅造型仲好可愛得意，充滿咗懷舊嘅氣息。另外仲可以試吓玩「塑型（型抜き）」等日本懷舊嘅食玩，未玩過嘅人不妨可以花啲時間挑戰一下。
停唔到手勁影相！「超級無敵羊咩咩 商店＆餐廳 」
呢間概念咖啡廳重現英國人氣黏土動畫「Shaun The Sheep 超級無敵羊咩咩」嘅世界觀，入面嘅菜式同埋周邊產品，都充滿咗可愛嘅羊咩咩，配埋店內嘅優雅嘅英倫風格，好難制止自己瘋狂影相。另外仲有工作坊同埋體驗活動，畀大家一齊入去超級無敵羊咩咩嘅爆笑幽默世界。
充滿日式風格嘅手信店「AKOMEYA TOKYO」
外國遊客都識嘅米舖「AKOMEYA TOKYO」，係一間出售好多種類嘅生活用品店，除咗白米之外，仲有售高湯、調味料、烘培點心、料理工具等等。唔單只有食品賣，仲有好多優質嘅生活雜貨，可以活用喺日常生活，不妨嚟呢度搵吓有無適合嘅手信帶返去畀親朋戚友！
設施資訊
- 名稱：南町田Grandberry Park
- 地址：〒194-8589 東京都町田市鶴間3-4-1
- 交通方式：由東京都「澀谷站」乘搭東急田園都市線急行電車前往「南町田Grandberry Park站」，車程約36分鐘。
- 營業時間＆休日：依各店舖而異
Comments