橫跨山形縣同宮城縣嘅藏王地區，有可以品嚐到日式料理、和菓子等當地名產嘅餐廳。今次小編就為大家介紹3款推薦嘅美食，去到藏王地區就千祈唔好錯過喇。
1. 冷肉蕎麥麵
冷肉蕎麥麵係山形縣河北町嘅特產美食。採用山形縣產、彈牙有咬口嘅蕎麥麵條，配上雞湯嘅醬汁，再加上叉燒同長蔥等配料。濃郁嘅雞湯同蕎麥麵完美結合，食一啖就已經好味到齒頰留香。
藏王溫泉地區有好多餐廳提供冷肉蕎麥麵。其中推薦嘅有食事處 KIKUCHI（食事処 きくち）、湯之花茶屋 新左衛門之湯等。價錢大約750円起，非常經濟實惠。（截至2019年8月資訊）
2. 成吉思汗燒肉
成吉思汗燒肉係藏王溫泉嘅名產美食。據聞山形藏王溫泉地區係成吉思汗燒肉嘅發源地，當年緬羊協會會長為咗技術交流而前往蒙古，睇到蒙古人燒羊肉嘅方式，因而誕生呢道料理。當地有好多提供成吉思汗燒肉嘅餐廳。藏王成吉思汗羊肉嘅肉質鮮嫩多汁，無羊騷味。醬汁係用整個柑或蘋果榨出，酸味同甜味嘅配搭達到絕妙的平衡。
想食成吉思汗燒羊肉，推薦藏王成吉思汗羊肉元祖「Genghis Khan Shiro（ジンギスカン・シロー）」，或者當地熱門店舖「食事處 TOMITA屋 （食事処 とみたや）」等。
價格因店而不同，單嗌大約1,000～1,400円，套餐大約1,400～1,800円。（截至2019年8月資訊）
3. 稻花餅
稻花餅係藏王溫泉區自古以來備受當地人喜愛嘅和菓子。將米做嘅粉蒸過後，包紅豆沙茸，上面再加上黃色米粒就大功告成。口感彈牙，擺放喺下面嘅竹葉亦散發著獨特嘅香氣。另外，因為無加任何添加物同防腐劑，建議購買後盡快享用。如果放一段時間先食，稻花餅變硬咗，用微波爐加熱返又可以食啦。
如果想喺店坐低享用稻花餅，只有藏王溫泉 稻花餅之里SANBE（蔵王温泉 稲花餅の里さんべ）可以堂食。加多杯茶嘅套餐價格約600円。另外，白樺商店、傳承YUBESHI作和莊（伝承ゆべし 作和庄）等和菓子店都可以買得到。（截至2019年8月資訊）
Comments