喺著名嘅溫泉鄉，長野縣山之内町，志賀高原，澀溫泉等觀光景點附近嘅住宿設施都非常豐富。特別係最有名氣「地獄谷野猿公苑」，因為可以睇到野生日本猿猴浸溫泉而聞名。今次小編就同大家介紹位於地獄谷野猿公苑附近，山之内澀溫泉一帶嘅住宿設施。
「上林酒店 仙壽閣」：距離地獄谷野猿公苑最近、附近用餐都好方便
「上林酒店 仙壽閣」擁有長野縣最大規模嘅「源泉溫泉」（溫泉水從地底水源直接流進泉池)。大量嘅溫泉水以每分鐘720公升、1日1,036噸嘅驚人泉水量，如瀑布般從露天溫泉旁嘅巨岩同大浴場壁面流入泉池內；再猶如河川般嘅規模，喺溫泉池內流動著。
上林酒店 仙壽閣提供5種房型可以選擇。其中，室內附設露天溫泉嘅特別豪華，由「12.5疊榻榻米嘅和室」同「睡房」兩個房間組成，再加上內附露天風呂同室內溫泉添。
此外，酒店內仲有寬敞嘅庭園同溫水池等設施。餐飲方面，可以享用嚴選嘅食材，例如信州牛，或由當地農家種植嘅有機蔬菜等，製作成一道道無添加嘅懷石料理。絕對可以帶俾你一個難忘嘅日式旅館體驗。
景點資訊
- 景點名稱：上林酒店 仙壽閣
- 地址：長野縣下高井郡山之内町平穩1410
- 交通方式：於長野站乘搭長野電鐵特急約45分鐘，於湯田中站落車，乘搭巴士約15分鐘（湯田中站設有接送服務）
- 是否提供Wi-Fi：有
- 對應語言：英文
- 可否使用信用卡：可以
入住山之內旅遊：感受具有懷舊風情的石板街道
擁有1300年歷史嘅澀溫泉鄉，充滿懷舊風情嘅石板街道兩旁都有旅館、商店、餐廳林立，可以著浴衣同木屐悠閒散步，或者試吓9個不同外湯嘅「九湯巡禮」都夠唒特別吖！
澀溫泉的「澀酒店」：充滿昭和時代氣氛的溫泉旅館
「澀酒店」提供3款「源泉溫泉」（其中2種為包場式溫泉），觸感滋潤柔滑、溫暖身心。住宿旅客除咗可以免費使用館內所有溫泉，包括包場式溫泉，仲可以免費享用九湯巡禮。
晚餐提供信州牛，信州產豬肉，信州三文魚，山野菜等，由大廚精心嚴選出當地食材，製作精緻嘅會席料理。早餐提供健康又美味嘅料理。家族經營嘅「澀酒店」一共有20間客房，有種讓你感到好似喺屋企一樣咁舒服嘅氣氛，服務都好周到。如果冬天入住，呢間提供嘅源泉溫泉同美食佳餚嘅旅館一定可以令你暖上心頭啦！
景點資訊
- 景點名稱：澀酒店
- 地址：長野縣下高井郡山之内町大字平穩 2173（澀溫泉）
- 交通方式：長野站乘搭長野電鐵特急約45分鐘，於湯田中站搭車約8分鐘。設有往返湯田中站以及地獄谷野猿公苑入口嘅免費接送服務。
- 是否提供Wi-Fi：有
- 對應語言：中文、英文
- 可否使用信用卡：可以
- ※晚餐需於3日前，早餐需前一日進行預約。（設有附設／不附設早餐的選擇，價錢會有所不同）
- ※包場溫泉無需預約
擁有400年以上歷史嘅「澀溫泉 古久屋」
「澀溫泉 古久屋」位於澀中央位置，係一間附設源泉掛流溫泉嘅住宿設施。家主代代襲名為「市左衛門」，現今為第17代。當地溫泉鄉有6種珍貴源泉，而住宿旅客可以浸旅館內有9個溫泉泉池，享受「九湯巡禮」。其中「福六之湯」將6種源泉引入浴槽，可以享受唔同溫度同泉質嘅泉水。古久屋一共有19間客房。普通和室有9間，另外10間和室則各附設唔同風情嘅露天溫泉。
入住內附露天溫泉嘅客室，就唔使在意其他人嘅目光都可以隨心所欲咁浸溫泉啦，所以唔只日本人，仲好受外國觀光客歡迎添。館内有2個住宿旅客專用包場浴池，住宿於普通和室，可以喺私人空間內悠閒浸溫泉，亦係古久屋其中一個魅力。料理方面以信州牛為首，提供當地當造嘅食材所製作成會席料理。創業超過400年以上，提供住宿旅客最佳住宿體驗。
景點資訊
- 景點名稱：古久屋
- 地址：長野縣下高井郡山之内町澀溫泉
- 交通方式：長野站乘搭長野電鐵特急約45分鐘至湯田中站，再揸車約8分鐘（下午3點後有接送服務）
- 是否提供Wi-Fi：有
- 對應語言：中文、英文、德文、韓文
- 可否使用信用卡：可以
Comments