喺伊勢志摩都可以進行跳傘活動喇！！
以上資訊係由社交網站入手得知㗎～
以前一直都話好想玩跳傘活動，諗返起，已經係15年前嘅事喇。
朦朧記憶之中，喺中學時代，阿爸阿媽同我講話喺鳥羽有期間限定嘅跳傘活動。所以就即刻打電話去問，但對方話「中學生唔可以飛」所以當時就打消咗個念頭，不知幾失望呀！！！(※但喺監護人嘅同意下似乎可以玩....原來主謀係阿媽！)。既然近近地可以玩嘅話，我又點可以錯過呢。就係咁，我就懷著雀躍不已嘅心情、向伊勢志摩跳傘活動出發。
預約當日係一個天氣晴朗無比嘅日子。猶如為我嘅初次跳傘活動體驗加油打氣。集合地點係田曽白濱海岸。抵達當地，已經睇到待機嘅直升機為我哋嘅飛行之旅做好準備。
挑戰跳傘活動！
加埋我，今日一共有４個人參加咗跳傘體驗活動。由於今次係初次跳傘，我哋同來自紐西蘭嘅專業教練一齊完成呢次嘅雙人跳傘活動。
日本有5個可以進行跳傘活動嘅地方，而講到伊勢志摩跳傘活動嘅魅力所在，就係眼前呢一片無敵大海景！最特別嘅係，凈係得呢度可以降落喺沙灘隔離！從英虞灣・溺灣・富士山・知多半島・名古屋方面到紀伊半島方面嘅景色都可以一次過飽覽。
行喺我前面，向直升機走去嘅T桑同K桑，背影莫名顯得勇猛。
一瞬間直升機已經變得咁細粒・・・
直升機邊旋轉直達高空10,000呎（約3,000m）。STAFF大叫「要飛啦。就嚟打開降落傘啦」。正當我瞇著眼，諗緊直升機飛咗去邊度呢・・・赤紅色嘅降落傘打開咗!
降落傘喺大概5,000呎(約1,500m)嘅地方打開咗。
由直升機跳落嚟，自由下降嘅速度竟然達到30s/250km嘅高速！從打開降落傘到返回海岸全程只需要3-4分鐘。
T桑同K桑都平安返到嚟。睇睇佢哋從容不迫嘅表情！
・・・終於到咗呢個時刻。我嘅拍檔係來自紐西蘭嘅Rhys。就係咁，將條命仔交咗俾佢，睇上去Rhys係一個非常值得信賴可靠嘅拍檔。同我一齊乘坐直升機嘅O桑其實喺兩個回合之前啱啱先飛完，而家又飛多次。「哎呀ー、真係超級正啊！」滿臉笑容嘅O桑說道，睇得出佢係一個深受跳傘活動所吸引嘅狂熱粉絲。諗到呢度真係越來越覺得期待啦。
撲通撲通，成個心都要跳出嚟嘅感覺，刺激感滿分
乘坐直升機，出發！離開地面，慢慢咁升高。今日呢個好天氣真係神嘅恩賜。伊勢志摩嘅遼闊海洋，溺灣，晴空，眼前所望到嘅一切事物都非常美麗。
到達高空10,000呎(3,000m)。先由O桑出發。要飛嘅一瞬間有少少緊張。我將成個身體貼近Rhys。咁樣嘅話，飛嘅時候就可以有效抵抗空氣阻力。
偷偷哋望落去。哇..好高。
出面流動緊嘅空氣有啲凍。心情好high呀・・・・
I CAN FLY！
30秒間嘅自由降落。好似成個人跌咗落去嘅感覺，衝破空氣同風嘅感覺。映入眼簾嘅係一望無際嘅風景，真係令人心情舒暢，超級正啊。
跟住落傘就打開咗、我同Rhys擊掌！腎上腺素飆升嘅快感，從上空望落去嘅伊勢志摩風景非常美麗，即使係當地居民都會有新發現。
Rhys耐心教導我降落傘嘅操作，只要拉下左右兩邊嘅手拉環就可以向左右兩方旋轉，徹底享受翱翔天空之旅。
就嚟靠近海岸，降落嘅任務交俾Rhys負責。伸長雙腿為降落做足準備。
平安歸來！最後同受到關照嘅Rhys擺pose合照。
今次可以喺伊勢志摩體驗跳傘活動真係非常開心。有機會嘅話，好想再飛多次。2018年嘅營業日去到10月21日，下次就要等到2019年預定5月先可以玩。雖然可能需要花上一段時間，有朝一日都想試下單獨跳傘！
伊勢志摩SKYDIVING CLUB 資訊
- 申請方法：請參照官方網站
- 電話號碼：050-5435-2629
- 官方網站：https://iseshimaskydiving.com/
- 停車場：有
YUICHIROU HAMAJI
作者出生於南伊勢，於伊勢成長長大。鐘意體驗同發掘三重縣嘅未知世界，比一般人嘅好奇心都要強。特別鐘意參與戶外體驗活動，注重人與人之間嘅嘅關係。三重縣到處都充滿有趣嘅事物與人，想透過文章向大家傳遞三重縣嘅魅力。
Comments